Les Pages Jèrriaises

Lé Vent

Scène : Dans eune salle parouaissiale. Caractèthes

Audienche 1 - 5
Lé Connêtabl'ye
Madame Feu d'Artifice
Lé Ségrétaithe
Moussieu Souothis, Miché
Moussieu Van den Vlicot
Moussieu Dara, Seigneu d'Frémont
 

Ridgieaux  
   
Lé téléphone sonne.  
   
Ségrétaithe Oui
  Oui
  oui,
  OUI .... !
  Mais oui.....
  Nânnîn.....
  Nânnîn.....
  Nânnîn
  NANNÎN.....
  A bêtôt! (rempliaiche lé téléphone) Et les mêmes sentiments à vous étout.
  Oh mais - èrgarde tchille heuthe tch'il est. La réunnion va c'menchi dans tchiques moments. I'm' faut ouvri la porte pour l'audienche. Ch'est eune affaithe hardi importante - et né v'chin l'Connêtabl'ye dêjà arrivé !
   
  (L'Connétabl'ye et l'audienche prannent lus pliaiches)
   
Audienche 1 : Mais, tchi vent qu'j'avons à ces se - ch'est un vent du dgiâbl'ye !
   
Audienche 2: Je n'savais pon qu'not' Connêtabl'ye souffrait autant !
   
Connêtabl'ye : Mesdames, Mesdemouaiselles, Mêssieurs, invités et expèrts, Bonsouair. J'sommes assembliées ichî à ces se pour distchutter tchiquechose hardi séthieuse. Janmais dans l'histouaithe d'not chiéthe paraisse d'St. Dick qu' j'avons ieu eune telle chose tchi pouôrrait nos dérouter, nos couôter des millions d'louis, tchi pouôrrait , tchi pouôrrait (au ségrétaithe) tchi pouôrrait tchi ?
   
Ségrétaithe : Vent.
   
Connêtabl'ye : Vent ?
   
Ségrétaithe : Vent, vent
   
Connêtabl'ye : Eh ? Vont, vont ? Vont iou ?
   
Ségrétaithe : Pas vont, vent (souffliant)
   
Connêtabl'ye : Ah, véthe ! Tch'est qu'chenna veurt dithe ? Vent (souffliant)
   
Ségrétaithe : Voul'ous qu'j'explyique la situâtion ?
   
Connêtabl'ye : Tchi bouonne idée!
   
Ségrétaithe : L's Etats ont décidés dans lus séance du 31 d'avri d'accepter la proposition du Conmité d'Pliein Air pour êtablyi des Fèrmes à Vent dans châque paraisse. Des reunnions sont à prendre pliaiche dans touos les treize paraisses dé l'île (les douze originelles et not' nouvelle paraisse dSt. Dick ichîn sus l'bel endrait dèrcliamâtion). I' nos faut décider si les habitants d'nos paraisses sont en faveur d'aver eune ferme à vent, dé tchi sorte et éyou qu'i' daivent êt' bâties.
   
Audienche 3: J'înmaginne qu' j'allons aver d's expèrts – et j'veurs saver combein qu' ch'na va couôter – et tchi qui s'en va payi pouor !
   
Ségrétaithe : Lé Conmité d'Pliein Air ont assez d'sou pouor payi l's expèrts – et i' nos en faut. I' n'y a personne dans l'île qu'a vraiment d's expéthiences auve les moulîns à vent.
 
   
Audienche 3 : Manque d'expéthience n'a janmais èmpechi l'monde d'offri d's opinnions sus BBC Radio Jèrri.
   
Connêtabl'ye : Vethe, je m'rappelle achteu. Ch'est les moulîns à vent. Je n'pouvons pon continnuer d'aver l'électricité par la câbl'ye souos la mé d'la Grand'Tèrre, viyant qu'les Dgérnésiais ont jointent lus wiyeur et la pliaiche eyou qu'il est attachi est hardi dangereuse – I' y a dé l'électricité tchi s'est écappé du cabl'ye et achteu nou vaie un tas d'mac'thé fricachi dans la Déroute.
   
Audienche 2: Et i' y a eune vèrte lueu sus Dgérnésy la niet
   
Audienche 1 : J'aim'thais mus en vaie eune rouoge, me !
   
Audienche 4: Est-che pa'c'que la vie en Dgérnésy s'est arreté ?
   
Connétab'lye : L'idée est d'faithe des Fèrmes d'vent dans chaque pâraîsse. Comme chenna j'pouôrrons èrcolter du vent auve les moulîns, pour faithe l'êlectricité. D'vant qu'j'stértons, en veue d's événements dreinement, i' y' a t-i' autchun d'vous tchi dait décliaithi un întéthêt ?
   
Audienche 4: J'ai un întéthêt dans la pêque, mé.
   
Audienche 5: Me, j'aime les timbres. Oh, qu'i' sont belles - les p'tits portraits et les belles couleurs et...
   
Connétab'lye : Et j'ai un întéthêt dans mes vaques – mais chenna n'a rein à faithe auve chutte affaithe. Ch 'est l's intéthêts finnancièrs tchi nos concernent ichîn. Av'ous d's întéthêts dans la finnance ?
   
Audienche 4: J'ai un compte à la banque, mais i'n'y a qu'tchiques louis là.
   
Connêtabl'ye : (laisse tchaie un long soupi)
   
Ségrétaithe : J'peurs t-i' întroduithe nos trais expèrts ? Moussieu Van den Vlicot est v'nu d'la Hollande, eyou qu'il ont tout pliein d'expéthience auve les moulîns à vent. Madame Feu D'Artifice est française, et ou travâle pour l'Eléctricité d'France. Et né v'chîn Moussieu Souothis….
   
Souothis : Faut faithe servi man nom d'baptême - Miché
   
Ségrétaithe : ... tch'est v'nu nos visiter d'la Floride, eyou qu'il' ont justement ieu des terribl'yes vents dans un ouragan.
   
Audienche 3: J'en avons étout 'à St. Cliément!
   
Audienche 1 : Mais l'vent est tréjous l'pièthe à St. Jean
   
Connêtabl'ye : Mess Van den Vlicot, voul-ous nos donner un rapport.
   
Van den Vlicot : Ja - dank U wel. Pour les cheins tchi n'en connaissent pon, la Hollande est un pays pliat, pliat comme un crêpe! J'avons un tas d'vaques. L'tout temps passé, i'taient toutes néthes, les vacques, mais en Hollande j'avons tréjous du vent. Ch'est viyant qu'j'sommes à côté d'la Me du Nord, et l'pays est comme des vagues d'sablion, et i'n'y a pon un tas d'bouais. II)nl)y a rein à émpêchi l'vent d'soUfflier, et auprès des siècl'yes, eune partie des pieaux des vaques ayant 'té usé par l'vent, i' sont dev'nues néthes et blianches. Ch'est assez drôle, mais I'fronmage n'l' est pon, nier et blianc, viyant qu'ch'est tout rouoge. J'avons des belles flieurs étout, et j'sommes ërnommes pour nos tulipes, tchi sont d'toutes les couleurs. Nou peut vaie des clios'sées d'tulipes partout, des bliancs, des jaunes, des rouoges... (L'audienche c'menche a éternuer) des blius, des niers....
   
Connêtabl'ye : Moussieu Van, Van den, Machinne-chouette, ou n'êtes pon ichin pour attither des Jérriais 'à visiter la Hollande. J'y étais là mê-même i'y a d's années et je trouvis la pliaiche bein enn9yante - même pus pliate qu'eune crêpe - et nou pâle d'fraid - l'vent vos cop'tha comme un couté. Je n'l'aimais pon du tout. Mais i'faut nos dithe comme tchi qu'ou faites sèrvi du vent en Hollande.
   
Van den Vlicot (ernifflant) : Man nom est Van Den Vlicot. Man pays est bé, même qu'ch'est pliat, pon comme chutte horribl'ye île - nou n'peut pon même cachi eune bike ichîn auve touos ches monts et vallées - sans pâler des risques d'être écrasée par des ouadgins halant d'la pierre d'un côté dé l'île à l'autre.
   
Audienche 2: Ch'est pa'ce qu'i sont à bouogi les pus hauts parties du nord de l'île pour les mettre au sud i'vont faithe not' île pus pliate étout !
   
Van de Vlicot : J'avons fait sèrvi du vent pour nos mourins à vent; j'en avons des chents tchi empêchent la mé d'inonder la tèrre. I'gardent l'ieau salée au bouon bord des digues.
   
Audienche 1 : Je m'd'mandis combein longtemps qu'lé Moussieu Hollandais pouôrrait continnuer sans pâler du sexe. Nou-s' a ouï d'ches « digues », et j'n'en voulons pon d'ité dans not' paraisse, si vos pliait !
   
Ségrétaithe : Mais ch'n'est rein à faithe auve l'sexe – les digues sont des muthâles faites pour sépather la mé et la terre - comme Lé Di à St. Cliément ! Vos rappelle-ous d'l'histouaithe du bouon garçon tchi y trouvit un creux et il y mint san dé. Il avait à rester là je n'sai pon combein longtemps, mais ch'tait eune bouonne bordée. Est-i' acouo là, Mess Van den Vlicot ?
   
Van den Vlicot : J'crai qu'nânn^m. Les mourins à vent pompent Pieau des cannieaux et l'èrtouônne à la me.
   
Connêtabl'ye : Ne Vlà assez d'vot' baliverne, Moussieu. Les Hollandais font servi les moulins à vent pour haler d'ieau. Tch'est qui' font en Floride, Mess Souothis ?
Souothis : Miché, s'i' vos pliait. J'avons r'chu l'e-mail à l'office.
 
Connêtabl'ye: E-mail ?
   
Souothis : Véthe. Lé sien env'yè au chef – Moussieu Dise-né - l'couôsîn améthitchain d'vot' Moussieu Grose-né.
   
Ségrétaithe : Moussieu Grose-né ? Voul'ous dithe Moussieu Grosnez ?
   
Souothis : Oui. Moussieu Grose-né avait env'yè l'e-mail entouor vos besoins auprès tch'il avait pâssé la niet à l'Auberge des Fermiers. Mais j'n'attendais pon d'aver un si long viage en allant de Miami à Nouvieau Jérri - J'pensis qu'il éthait 'té un coupl'ye d'heuthes dans l'avion, pon la maimtchi d'un jour.
   
Audienche 3: Mais ou n'êtes pon en Nouvieau Jerri- ous êtes dans l'Vièr Jèrri.
   
Souothis : Lé Vièr Jérri ? Je n'avais janmais oui pâler du Viër Jérri.
   
Ségrétaithe : Mais ch'est ichîn - eyou qu'ous êtes tout près d'la France.
   
Souothis : Eh bein, ne v'la eune surprînse - Etre tchiquebord sans janmais en aver ouï pâler. Ch'est justement comme à Dise-né-World.
   
Connêtabl'ye : Mais les moulins ?
   
Souothis : Les - moulins ?
   
Connêtabl'ye: Mess Souothis, ous êtes v'nus ichîn pour nos explyitchi entouor les moulins à vent.
   
Souothis : Oh ? Ou voulez quj'vos pâle entouor des moulins à vent; eh bien, à chein qu'nou m'dit, j'en avons, des moulins avants tchiquefais - et des moulins arrièthes ètout- ch'na dépend combein vite qu'ou voulez viagi. D'habitude, j'avons les cheins en arrièthe seulement, mais j'pouvons trèjous fabritchi des pus grands auve de moulins des deux bords. Mais i'vos faut des bouons navigants!
   
Audienche 4: Des navigants - pour des moulins ?????
   
Souothis : Véthe - pa'ce qu'autrement nou peut mantchi la France
tout entchiéthement.  
   
Audienche 2: Pour de me, je s'sais bein aise d'mantchi la France - j'aim'thais mus rester ichim. Mais pouv'ous nos explyitchi tch'est qu'les moulins ont à faithe auve la France ?
   
Souothis : Ch'est comme chennechin - les moulins touônnent et i'font l'vent pour cachi les batchieaux en avant - v'là chein quj'appellons des mourins-avants. J'pouvons vos vendre des chents d'nos batchieaux tchi sont faite servi sus nos bouoillons – des swamp-boats - il ont les moulins pour l'pouvé.
   
Audienche 1: Si chaque fanmil'ye ichîm en avait iun, i'n'y etha pon besoin pour I's Etats à acater lé Solidor Chînq!
   
Connêtabl'ye : Chenna pouôrrait être la solution pour iun d'nos problièmes – mais ch'n'est pon la sienne qu'j'sommes, ichîn pour distchutter. Madame Feu d'Artifice, s'i'vos pliait?
   
Madame Fd'A: J'sis ichîn pour vos vendre du gaz.
   
Connêtabl'ye : Ou n'allez pon pâler des Fermes d'moulins ?
   
Madame Fd'A: Bein, en France, j'en avons des Fermes à vent partout. l' sont hardi belles auve touos I's ailes en touonnant dans l'vent. Mais v'là la problième. Ch'est l'vent. J'en avons souvent, mais j,n'en avons pon pour des longues bordées étout. V'là pourtchi qu'j'faisons servi du gaz pour rempliaichi l'vent quand i'n'souffl'ye pon. Et je s'sons bein contents d'vos en vendre étout.
   
Audienche 2: J'n'avons pon besoin d'vot' gaz, Missis. J'en avons tout pliein ichîn- et i'faut pon payi pour - ch'est gratuit. Ch'est tout simplièment un tchestion d'I'collecter et ldistribuer à chaque paraisse.
   
Connêtabl'ye : Tch'est qu'ou voulez dithe ?
   
Audienche 2: Si j'pouvons trouver tchique moyen d'happer tout l'air caud tchi va d's Etats touos les mardis, j'n'ethons pon besoin du gaz français.
   
Madame Fd'A: Mais j'pouvons vos vendre un grand' tchuyau tchi s'en va en d'ssous d'la me pour pomper not' gaz tout drait ès moulins à vent pour vos rasseuther qu'i'n'y etha jamnais d'manque d'électricité, ni des cop'thies d'pouvé.
   
Audienche 1 : Mais si par chance i'y etha un creux dans l'tchuyau, nou pouôrrait vaie des paîssons enfliéthis par l'gaz à voler au d'sus dé 1'lle !
   
Audienche 5 : Et à la pliache d'faithe sèrvi des vaules à petchi dans la me, nou pouorrait les happer auve des drannets entre les bouais !
   
Connêtabl'ye : Me, j'sis acouo pus morfondu qu'au c'menchement d'la réunnion. J'avons les Dgernesiais à nos donner des « power-cuts », les Hollandais tchi font servi des moulins à vent pour pomper l'ieau, les Améthitchains auve des moulins sus des batchieaux, et les Français tchi veulent nos vendre du gaz. Mais i'nos faut décider aniet tchi faithe.
   
Mess Dara : Moussieu l'Connêtabl'ye, j'ai eune suggestion. l'y a tchique temps, j'accatis la Seigneurie du Frémont pour tchiques penîns, mais l's Etats ont bâti eune grand tou là sans d'mander ma permission. J'lus m'nichit auve un procès d'vant la Cour, mais pour tchique raison, il' ont décidé d'm'donner la tou ! Ach't'heu, j'vos offre l'usage d'la tou pour bâti l'pus grand moulin à vent dans l'monde entchi. Comme chenna y'etha pus d'électricité qu'ou n'en pouorrez faithe servi, et ou pouvez en vendre ès Français !
   
Connêtabl'ye: Mèrcie bein des fais - v'là la solution à touos nos problièmes ! J'm'en vais d'mander au Ségrétaithe d'faithe les minnutes d'la réunion et d'inscrithe vot' nom comme sauveur d'l'île.
   
Ségrétaithe : Mais j'avais mantchi vot' nom, Moussieu ?
   
Mess Dara : J'sis Mess Dara - mais ou pouvez m'appeler Dan; Dan Dara.
   
  (Les veues dêtouônnent)
   
Audienche 5: M'luque - acouo eune aut' cop'thie d'électricité - eyou qu'i' sont, les chandelles ?

 

(Présenté la preunmié fais à l'Eisteddfod dé Novembre 2003)  

Les Pages Jèrriaises