|
Y n' s'agit pas d'un estrangi, D'un Zola, Dreyfus ou Marchand; Mais bain d'un homme qui peut rangi Parmi nos pus fameux savants. Jé sis un vrai Jerriais, bouannes gens. N'y a jamais yeu homme pus capable. Personne ne connaît mes talents; Jé sis lé “Rouai des Connaîtables.” Mes exploits sont le talk de l'Ile, Les gens m'ergardent comme un héros; Y'en a qui m'disent un imbécile, Mais ch'est qui n'savent pas mus, you know. Ou savez bain qué y'a tchique temps, Y vint une lettre d'la War Office; Eh bain, jé m'armi jusqu'ès dents, Et j'menrôli dans la Milice!! J'accate un habit magnifique, Dé tchi qué j'sis bain orgyeux; Nou m'dit qu'si j'allais en Afrique, Y m'prendraient pour Lord Kitcheneux. Mais, en Jèrri, quand y'a tchique fête, J'y vais, certainement, souos m'n'habit; Les officiers mé traitent de bête, Et aithaient l'air dé s'en motchi. Y n'ya pas d'pauvres par siez nous; Tout l'monde est riche, ou à peu près. Quand tchiques bouannes gens lus laissent des sous, J'les piaiche mé maimme à l'intéthêt. Et malgré ch'la, y'a deux tout-s'mêles Qui r'clâment une somme considéthable; Et craithious bain, qu'les daeux rébêles Ont poursuivi lus Connaîtable? J'mé sis d'fendu du mus qu'jai peut; J'ai dit ès Juges et au Bailli, “Qu'mes devoirs multitudineux Avaient causai un p'tit oubli.” L'avocat B. m'a astitchi. Les autres ont gagni lus procès; Mais chein qui m'fait le pus bistchi, J'ai yeu à payi touos lus frais. Mais, wait a bit, ch'est pas fini; J'sis en office pour deus trais ans, Et j'mé laiss'ait jamais surveilli Par auchun maudit surveillant.
Frédéric Riche Garçon dit Le Noir |
Viyiz étout: