Les Pages Jèrriaises

Le Trooper


"Rein n'est sacrè pour un sapeur,"
Je ledis sans malice,
Rein n'est sacrè pour un trooper
Ou c'vallir de Milice.

Quand il est juqui sus un ch'va
Atou sen uniforme,
I' s'en va amont et d'ava
Ov un orgui enorme.

Il est comme un poux sus du v'lous,
Nouz eu creve de rire;
I' ne sont pas si bêtes tous,
J'ai du pllaisir à l'dire.

Les garçons lus crient "pig-driver"
Et lus font des grimaches;
Mais i' n'y-a rein comme un trooper
Pour faire des morgaches.

Nou dit qu'un gueux dans l's eriers
Est un gueux chent fais piere,
Je l'ai veu de mes propres yiers,
Ous n'avez qu'à le crere.

I' faut l'veir s'teurtre et se dêmner
Comme s'il 'tait d'consequence
Pour donner au monde à penser
Qu'il a de l'importance.

Pour en parer l'maudit trooper
Ne rend aucun service.
Il est, vere-guia, parole d'honneur,
La honte d'la Milice.

P.L.
22/7/1874

 

Viyiz étout:

 

Les Pages Jèrriaises