À touos les cheins tchi font chein tch'est bouôn, donne d'la charité d'tes beins, et n'fait pon mauvaise minne en baillant l'don. Né dêtouônne-té d'autcheune pauvre pèrsonne, et la fache du Seigneu n'es'sa pon dêtouônnée d'té. S'tu'as un tas d'beins, fai don un tas d'dons; s'tu'as raîque pétit d'beins, n'ai pon honte dé faithe des dons du p'tit qu'tu'as. D'même tu s'sas à ramâsser un bouôn trésor pouor té-même contre lé jour d'êcarceté. Ch'est en tchi la charité libéthe d'la mort et t'garde d'aller dans la nièrcheu. Véthe, la charité est pouor touos les cheins tchi la pratiquent, eune mangnifique chose pouor offri dans la présence du Pus Haut. Mêfie-té, man fis, dé toute foutot'tie. Preunmiéthement, mathyie-té auve eune femme tch'est d'cendue d'nos anchêtres; né mathyie-té pon auve eune femmes des horsains tchi n'sont pon du tribu d'tan péthe. Ch'est en tchi j'sommes les d'cendants des prophètes. Garde-en la mémouaithe, man fis, qué Noué, Âbréhan, isaac, et Jâcob, nos anchêtres des touos vièrs temps, lus mathyîdrent dé parmi lus gens. I' fûdrent bénîns dans lus avièrs, et lus d'cendants héthit'tont la tèrre.
Avise-té auprès d'châque avisé et né sgorne pon autchun bouon avis. En touos temps, béni l'Seigneu Dgieu et d'mande-lî qué toutes tes sentes saient r'dréchies et qu'touos tes c'mîns et plians saient accomplyis. Car n'y'a pon d'parmi les nâtions tch'en comprannent, mais l'Seigneu lî-même lus avis'sa; mais s'i' décide autrément i' piqu'tha bas jusqu'au fond d'l'enfé. Achteu don, m'n êfant, garde ches c'mandements dans ta mémouaithe et n'les laîsse pon lus êffachi d'tan tchoeu.
Viyiz étout: