La Preunmiéthe Êpitre ès Thessalonniens
Chapitre 1
Dé Paul, Silvain, et Tînmothée
à l'églyise des Thessalonniens tch'est en Dgieu l'Péthe et en l'Seigneu Jésû Chri:
qu'la grâce et la paix saient auve vous!
J'sommes tréjous à r'mèrcier l'Bouôn Dgieu pouor touos vous et vos mentionner tout l'temps dans nos priéthes. J'rapp'lons l'avant à not' Dgieu et Péthe vot' travas produit par la fouai, les r'êffets dé vot' amour et vot' enduthance înspithée par l'espé dans not' Saûveux Jésû l'Onguenné.
Ch'est en tchi j'savons, nos fréthes et soeurs bein aimés du Bouôn Dgieu, qu'i' vos a chouaîsi, car not' bouonne nouvelle né vos vînt pon sîmpliément en patholes mais étout auve du pouver, auve lé Saint Esprit et eune asseûthance totale. Ou savez coumme tchi qué j'vivêmes parmi vous pouor vot' amour. Ou nos avez înmité, véthe et înmité l'Seigneu, viyant coumme tchi qu'ous atchilyîdres lé m'sage au mitan d'hardi d'gênes auve la jouaie du saint Esprit. Et ou d'vîndres ainchîn un patron pouor touos les cheins tchi craient en Macédouaine et Achaïe. Lé m'sage du Seigneu fut procliâmé par vous pon raîque en Macédouaine et Achaïe - vot' fouai en en Dgieu est v'nue connue partout. J'n'avons pon don à dithe autcheune chose entouor, ch'est en tchi l'monde rapportent coumme tchi qu'ou nos atchilyîdres. i' dithent coumme tchi qu'ou vos touônnîdres à Dgieu d's idôles pouor sèrvi l'vrai Dgieu vivant, et pouor espéther san Fis du ciel, qu'i' souôl'vit des morts - Jésû, tchi nos d'livre dé la mârrisson à v'nîn.
Chapitre 2, vèrsets 19-20
Tch'est qu'est don not' espé, not' jouaie ou not' couronne d'ordgi d'vant l'av'nue d'not' Seigneu Jésû? Ch'est vous! Véthe, ous êtes not' glouaithe et not' jouaie!
Chapitre 4
Pouor lé restant, nos fréthes et soeurs, viyant qué j'vos ensîngnînmes coumme tchi vivre à seule fîn d'plaithe au Bouôn Dgieu, et ch'est coumme chenna qu'ou vivez, j'vos prions et talbâtons au nom du Seigneu Jésû d'faithe chennechîn d'abouôn pus. Ch'est en tchi ou connaîssiz tchil' înstructions qué j'vos avons bailli par l'autorité du Seigneu Jésû.
Chein tch'est la volanté du Bouôn Dgieu est qu'ou séyiz sanctifiés: qu'ou vos cârriez d'la dêvèrgond'die; qu'châtchun d'vous apprenge à contrôler san propre corps d'eune manniéthe tch'est sainte et honothabl'ye, pon dans l'înmoralité pâssionnelle coumme les païens tchi n'connaîssent pon l'Bouôn Dgieu; et à chu sujet qu'fis d'âme n'abuse ni embliûte un fréthe ou eune soeu. Lé Seigneu peunnitha touos les cheins tchi commettent d'ités péchés, coumme j'vos avons dit et dgèrni d'vant. Ch'est en tchi l'Bouôn Dgieu n'nos app'lit pon à l'împuth'té mais à la sainte vie. Autchun don tchi r'jette chutte înstruction n'èrjette pon un êt' humain mais l'Bouôn Dgieu, chu même Dgieu tchi vos bâle san Saint Esprit.
Achteu pouor dé l'amour l's uns pouor les aut' j'n'avons pon à vos êcrithe entouor, ch'est en tchi ous avez 'té ensîngnis vos-mêmes par lé Bouôn Dgieu à vos entr'-aimer. Et dé vrai ous aimez toute la fanmil'ye dé Dgieu partoute la Macédouaine. Mais j'vos talbâtons, nos fréthes et soeurs, d'faithe ainchîn d'abouôn pus, et d'vouler bein vivre trantchillement: ch'est d'vos mêler d'vos propres affaithes et d'travailli atout vos propres mains, coumme jé vos l'avons r'quémandé, pouor qué vot' vie d'touos les jours piêsse gângni lé respé d'la c'meunauté et qu'ou n'séyiz pon oblyigis à fis d'âme.
Jé n'voulons pon, nos fréthes et soeurs, qu'ou restiez en înnouothance entouor les cheins tchi dorment auprès la mort, pouor qu'ou n'plieuthiez pon en du coumme lé restant du monde tchi n'ont pon d'espé. Ch'est en tchi j'criyons qu'Jésû mouothit et r'fut souôl'vé, et ainchîn j'criyons qu'lé Bouôn Dgieu ramèn'na acanté Jésû les cheins tch'ont tchée endormis en li. Né v'chîn chein qué j'vos dêcliathons s'lon la pathole du Seigneu: Nous tchi sommes acouo vivants, laîssi jusqu'à la v'nue du Seigneu, n'îthons pon d'vant les cheins tch'ont tchée endormis. Lé Seigneu lî-même d'val'la du Ciel, auve un haut c'mandement, auve la vouaix d'un archange et auve l'appel d'la trompette du Bouôn Dgieu, et les morts en l'Onguenné s'sont souôl'vés les preunmièrs. Auprès chenna, nous tchi s'sons acouo en vie et laîssis s'sont happés acanté ieux dans les nouages pouor rencontrer l'Seigneu dans l'air. Et d'même jé s'sons acanté l'Seigneu à tout janmais. Entr'-encouothagiz l's l's aut' atout ches patholes.
Chapitre 4, vèrsets 1-3
Fréthes, j'vos prions don, et vos conjuthons par l'Seigneu Jésû qué, coumme ous avez apprîns d'nous coumme tchi vos comporter et pliaithe au Bouôn Dgieu, ous avanchiz tréjous en tout chenna. Ch'est en tchi ou savez tchi léçons qué j'vos avons bailli du Seigneu Jésû: né v'chîn chein qu'lé Bouôn Dgieu veurt, à saver, vot' sanctificâtion et qu'ou n'vos êmancip'thêtes pon à la foutot'tie.
Chapitre 4, vèrsets 9-12
Achteu pouor chein tch'est d'l'amour des fréthes et des soeurs, ou pouvez bein aller sans aver tchitchun à vos êcrithe à chu propos; ch'est en tchi l'Bouôn Dgieu lî-même vos a ensîngni d'vos entr'-aimer, et véthe, ous entr'-aimez, vous fréthes et soeurs, partoute la Macédouaine. Mais j'vos encouothageons, nos chièrs, dé faithe dé même dé pus en pus, d'vouler vivre en trantchilité, d'vos en d'menter d'vos propres affaithes, et d'travailli atout vos mains, coumme j'vos avêmes quémandé, à seule fîn qu'ou piêssêtes aver affaithe auve les aut's d'la c'meunauté et d'n'êt' pon oblyigis à fis d'âme.
Chapitre 4, vèrset 14
Ch'est en tchi j'criyons qu'Jésû mouothit et r'fut souôl'vé, et don j'criyons qu'lé Bouôn Dgieu amèn'na acanté Jésû les cheins tchi lus sont endormis en li.
Chapitre 5
Assa, mes fréthes et soeurs, pouor des heuthes et des dates j'n'avons pon à vos êcrithe, ch'est en tchi ou savez hardi bein qu'lé jour du seigneu veindra coumme un voleux dans la niet. Quandi qu'des gens dithent, "D'la paix et d'la seûth'té," la ruinne tchèrra sus ieux d'un co, coumme les peines ravissent eune femme tch'est pouor porter un êfant, et i' n'en êcapp'thont pon.
Mais vous, mes fréthes et soeurs, ou n'êtes pon dans la nièrcheu et chu jour-là don n'dévthait pon vos ravi coumme un voleux. Ous êtes touos vous d's êfants d'la leunmiéthe et d's êfants du jour. Jé n'sommes ni d'la niet ni d'la nièrcheu. Né dormons pon coumme les aut' tchi sont endormis mais restons êvilyis et sobres. Ch'est en tchi les cheins tchi dorment, dorment la niet, et les cheins tchi bouaissonnent, bouaissonnent la niet. Mais d'pis qu'nous j'sommes du jour, séyons sobres, mettons la fouai et l'amour en garde-estonma, et l'espé du salut en helme. Ch'est en tchi l'Bouôn Dgieu n'nos a pon nommé pouor suffâtchi la mârrisson mais pouor èrchéver l'salut par not' Seigneu Jésû Chri. I' mouothit pouor nous à seule fîn qué j'piêssons, si j'sommes rêvilyis ou endormis, vivre ensembl'ye acanté li. Entr'-encouothag'-ous don et renforch'-ous l's uns et l's aut', coumme dé raison ou l'faites.
Achteu j'vos d'mandons, fréthes et soeurs, d'èrconnaît' les cheins tchi travâlent dû parmi vous, tchi vos souongnent dans l'Seigneu et tchi vos encouothagent. Ayiz pouor ieux hardi d'considéthâtion dans l'amour par cause dé lus travas. Vivez en paix l's uns auve les aut'. Et j'vos prions. mes fréthes et soeurs, dgèrnissiz les cheins tchi sont pièrcheurs et hèrgouongneurs, encouothagiz l's êtchoeuthés, aîdgiz ès faibl'yes, séyiz pâcients auve tout l'monde. Asseûth'-ous qu'fis d'âme né renge lé ma pouor lé ma, mais tâchiz tréjous d'faithe chein tch'est bouôn pouor vos-mêmes et pouor l's aut'.
Rêjouiss'ous tréjous, priez sans cêssi, èrmèrcyiz en toutes choses; car chennechîn est la volanté du Bouôn Dgieu pouor vous en l'Onguenné Jésû. Né dêteigniz pon l'Esprit. Né mêprisez pon les prophéties mais testez-les tous; èrténez tout chein tch'est bouôn, èrnonchiz toute sorte dé ma.
Qué l'Bouôn Dgieu lî-même, lé Dgieu d'la paix, vos sanctifyie tout l'travèrs. Qu'vot' esprit, vot' âme et vot' corps en entchi saient gardées sans bliaûme à la v'nue d'not' Seigneu Jésû Chri. Lé chein tchi vos appelle est fidèle, et i' lé f'tha.
Mes fréthes et soeurs, priez pouor nous. Saluez tout l'peupl'ye du Bouôn Dgieu auve un saint baîsi. Jé vos c'mande l'avant au Seigneu d'faithe liéthe chutte lettre-chîn à touos les fréthes et soeurs.
Qu'la grâce dé not' Seigneu Jésû Chri sait auve vous!
Chapitre 5, vèrset 5
Épis don n'séyons pon coumme les aut' tchi sont endormis mais séyons rêvilyis et sobres.
Chapitre 5, vèrsets 21-22
Mais êprouvez-les tous; t'nez bouôn à chein tch'est bouôn, r'niez toute sorte dé ma.
Viyiz étout: