J'ai dans l'idée que j'avons enfin trouvé ch'que je cherchions d'pis longtemps: La vraie r'ligion! ch'funt cuomme chen'chin. Piteur me dit, Sam'di au sé, coumme j'tais a bringi mes ch'veux (respé d'la compagnie) d'vant que d'mé couochi: i' me dit "Té qu'est pus-a-co portée d'chu bord la, ou pouoraites faithe piethe que d'allé d'main l'arlevée, ta fille et té, au Oddfellows' y'a un predicateur Angliais qu'est pour être là et i' comprends que ch'qui prèche fait tremblié d'peux. Vas y avec Lonore!"
Nos v'la don y'allé, m'n'èsfant et mé. J'nos assimes bin en d'vant pour ne pon perdre un seul mot du sermon; et j'dis a Lonore "Tâche d'èscouté bin pour poué en r'pâslé a tan pépée. Et n'chuche pon tan pauchi que j'lis dis: tu r'semblye a eunne p'tite fille en court."
Chutte nouvelle r'ligion la, de tchi nos pâsli l'prédicateu, ch'est la toute dernié invention des siens qui s'otchupent de nos montré coumment s'y prendre pour ne pon être happée par le Lion qui cherche continuellement a nos faithe tchée dans la Gehénne de feu qui s'èsteint pon. Mais ch'n'est pon l'preumié v'nu qui peut dévnin Theosophiste (rin qu'le nom vos l'montre) numéti yun. Pour dévnin membre de chutte benite Secte la, i' faut c'menchi par èstudié toutes les autres r'ligions partout l'monde, et pis crainchi bin tout cheunna - ch'qu'il en reste, ch'est d'la Theosophie et vos v'la en dret c'min, chutte bouonne fais la. En y travaillant du pour tchinze ou vingt ans, nous est quazi seux d'savé d'en par ou-ès qu'nous en est.
L'missiounnaithe nos dit que ch'qui lis faisait d'la peine, ch'tait d'vaie tout l'monde tréjous otchupés a travaillyi pour gagnyi des sous a la pliéche de liéthe des livres pour apprendre a s'prépathé pour le temps ou-ès qui n'y'a pus besoin d'sous. I' nos dit étout - il a sans doute déscouert ch'la a forche d'èstudié - qui n'y'a pon d'Gehenne de feu pour les siens qui font mèschet sus chutte terre: qu'ch'est la eunne invention des Eglyises du temps passé, pour dounné l'trembliot ès gens et les faithe souscrithe a la colecte. V'la tchi m'fit bin d'la peine d'oué ditet! Nous a 'té accouotumés, d'pis l'Escole du Dinmanche, (Veur tu bin n'pas rèsmué tes pids souos l'banc! que j'dit ichin a Lonore, en lis dounnant eunne pépérmenne) a s'créthe milleurs qu'ses vaisins qui sievent le c'min qui menne tout drét a la pérdition, et ne v'la qu'nou nos dit que n'y'a pas d'Enfé! J'en sis, pour de mé, toute contrariée! Y'a pourtant un tas d'gens que je n'tiendrais pon a rencontré, d'èsgale a èsgale quand j'ethai ma robe blianche et eunne harpe.
Quant a Lonore oul ést tout a fait du bord des Théosophistes. Oul a déjà dèspensé trente ching sh'lins a accaté des livres que l'prédicateu r'quémandi; et n'y'a pon moyen d'lis faithe faithe rin du tout du bérnage de maison. Ch'est a peine s'ou cesse de liethe pour ses r'pas! "N'm'éslourde pon, mother, qu'ou m'redit quand j'lis demande s'oul a plé les poummes-de-terre ou mins l'lard a dèsallé - "tu m'pâsle de lard, qu'ou dit, quand j'sis sis ottchupée a dèschiffré la difféthence qui y'a entre la r'ligion des Chinouais et la sienne des Calvinistes! Tu penses a la nouorituthe du corps tandi qu'mé j'sis a m'nourri l'esprit!"
I' s'en fallé qu'Piteur nos paie eunne servante. Si Lonore continue a voulé s'èsdutchi pour dévnin membre d'la nouvelle secte, ch'n'est pas mé qui pouorrait suffithe a tout faithe siez nous - sans compté qu'Lonore pâsle d'èscrithe à Londres pour eunne bouétée d'livres.
J'sis hardi contrariée.
Laizé Pain
Viyiz étout: