Acquo une fais chés Clifford Laisney tch'a l'pliaisi d'vos presenter la lettre Jerriaise aniet Dinmanche le 13 Juillet 1997 .
La dernier occasion que j'avaits prepather une lettre était le 23 d'mars (le Dinmanche des Rameaux), mais malheuthesement ou'n fût pas présentée la raison etant que Radio Jerri avaits anichi la tape. Enfin, aniet tout est bein.
Ichîn, a Oaklands, St. Sauveur ouaique je d'meuthe j'avons ieu dernierement une invasion d'taupes. Dans les dgiez-neuf années que j'avaits d'meûther a St. Ouen janmais j'en avaits veu ieune dans l'gardin.
Chaque matinée ma premier visite est d'aller compter les nouvelle taupiniethes qu'ont appathu dans les parterres et herbages. J'vos assûthe bein tchi peuvent en faithe du d'gats. Malgre que j'ai pliaichi des trappes, j'ai reussi d'en attraper ieune seulement et j'ai grand peux que j'm'en vais etre forchi d'engagi un trappeux en ordre de les detruithe.
J'n'aime pas l'idée de les empouâisoner et nou ma suggethé mettre une epine dans la ranniethe, d'autres du lait caillyi, et l'autre jour mon bieau-frethe me donnit une éspece de pliantes tch'im garanti chasseraits les taupes de mon gardin pour trejous, probablyement tch'il prendraits residence dans l'gardin d'mon vaisin. La taupe, une p'tite créatuthe envers siez pouces en longeur est une grand travailleresse. Ou passe la grand partie d'sa vie souos terre en tenêbres a défoui ses ranniethes en ordre de bâti sa d'meuthe et d'obtenin le mangi necessaithe pour s'n'existence. Ch'est une drôle de p'tit anima, a peine capablye de vaie ou d'entendre mais auve un fin nez, et bein adaptée pour la part que la natûthe la designée.
Ch'est trejous possiblye de suivre son c'min par les tafaîts d'terre cratchis tchi traverse le terrain, traversant clios et gardin.
Si par chance ch'est possiblye d'en attraper ieune vivante, ou verrais qu'ou s'forme en p'tite balle dans la main, une p'tite balle de pé v'l'oussée auve une p'tite coue rose. Ou n'a pas d'co, ses outheilles sonts que des p'tites ouvertuthes muchis dans sa pé et ses iers sonts des p'tites pointes couvertes de pieau.
Ou'lle a des p'tites mains auve chinq p'tits dés tchi travaille comme des palettes, et minse a l'abanon sus la terre, dans mins d'une minute ou'lle autha écapper. Dans une seule niet, une taupe peut terrer une tonnelle septante-cinque verges de longeur, et peut travaillyi en avanche ou a r'tchuler. Son pé ne d'vint janmais crotte.
Une taupe fait sa traversée toute les quatre heuthes, et malgré qu'ou cause hardi d'dommage, ou'lle a étout ses avantages, car ou detruit hardi d'mauvaises insectes. Son principal mangi est l'ver de terre, et i'en faut un certain montant pour s'n'existence. Si par chance la taupe trouve pus d'vers tch'in li faut, ou les tûetha et les mettra d'coté pour le jour quand la pêque ne setha si bouonne.
Achteu j'espèthe que j'vos ait donner une p'tite leçon envers les activitées de la taupe, et la prèchaine fais qu'ou vos causera d'l'embarras ou donnerais respé a chutte belle p'tite créatuthe de nathûthe qu'a 'tait minse sus la terre pour rendre sa partie pour souolagi et aidgi d'une manniethe ou l'autre. Nou m'dit que la taupe se trouve seulement en Jerri et Aurigny et n'habite pas en d'guernsesy. J'en connaits pas la raison pour ch'nna. P't'etre que tchitchuns pouorrons m'r'enseigner. Ches p't'etre possiblye que j'pouraimes encouothagi tchitchuns d'commenchi un p'tit commerce d'export?
En finnisant, j'en peut selon feliciter Madanme Margaret Perrée et son Conmité Sociale pour la merveilleuse sethée tch'ils organisites Vendredi le 27 de Juin dans la Salle Paroissialle de St. Louaithains pour les membres de l'Assembliée.
Apart d'un concert aimablye et amusant, j'fumes traitées comme rouoyaté par les garçons et filles de services tchi nos servites un souper superbe. Le nombre de gens tchi accordites lus presence et support est une bouonne indication et encouothagement pour l'av'nin et continnuation de not ancienne langue.
A la Prechaine.
Clifford Laisney
Viyiz étout: