|
Sans doute i' n'y a pas de défense, Mais quand je sis prêt à hauter, A qu'est qu'chu petit ouaisé pense dé sé mettre ainchin à chanter? Par chance est-i le jouet d'un songe? Je n'en serais pas êtonnè; Mainte fais un itè mensonge A interrompu men sommèi. Trembllant de peux, perdant l'haleine, Trouvant impossible d'bouogir, Je me sis donnè bein d'la peine Afin d'êviter un dangir: Parfais du haut d'une falaise Je me sis senti quêir dans l'fond; Jugiz si j'étais mal à m'n aise, Jé m'rêvillais faisant un bond: Parfais j'ai creu vêir ma brunette Aupres de me entre mes bras: En me rêvillant la drinette Aupres de me ne s'trouvait pas: Si de men rêve ous voulez rire, Je n'y f'rai pas grande attention; Mais auprès vos pllaira-t-i' m'dire, Sis-je vraimment une exception? Des rêves sait-nou bein la cause? Pour me ch'est fort embarrassant; Je vos l'asseure, ch'est une chose A embarrasser pus savant: Sus chu chapitre là sans doute, Nou peut en conter large et long: Mais pour de me je n'y vai goutte, Je n'sairais en dêchiffrer l'fond. PL 16/5/1872 |
Viyiz étout: