Les Pages Jèrriaises

La lettre d'St. Paul ès Romains - tchiques vèrsets

 

Preunmié chapitre, vèrset 4

Tchi 'tait mèrtchi coumme lé Fis dé Dgieu en pouvé s'lon l'Esprit d'sainteté par sa résurrection d'siez les morts, Jésû-Christ, not' Saûveux.

 

Traîsième chapitre, vèrset 10

S'lon l'êcrituthe, i' n'y'a pon d'juste, pas même un tout seu.

 

Traîsième chapitre, vèrset 23

Car touos ont péché et sont liains d'la glouaithe dé Dgieu.

 

Chîntchième chapitre, vèrset 6

Car, quand j'mantchions acouo d'forche, à la bouonne heuthe Christ mouothit pouor nous

 

Chîntchième chapitre, vèrset 8

Mais l'Bouan Dgieu nos mouontre Sén amour par chennechîn: j'tions acouo des pécheurs, mais Christ mouothit pouor nous

 

Chîntchième chapitre, vèrsets 1-11

Né v'là pouortchi, viyant qué j'sommes justifiés par la fouai, qué j'sommes à la paix auve lé Bouôn Dgieu par not' Seigneu Jésû Chri, par tchi, d'même, j'avons peu arriver, par la fouai, à chutte grâce-chîn où'est qué j'nos trouvons achteu; et qué j'sommes dé même rêjouis dans l'espé d'la glouaithe du Bouôn Dgieu. Mais pus acouo, j'sommes rêjouis dans nos annicroches, sachant qu'les annicroches nos pèrmettent d'êt' enduthants; et l'enduthanche donne l'expéthience, et l'expéthience, l'espé: et l'espé né d'sappouainte pon, ch'est qu'nos tchoeurs sont remplyis d'l'amour du Bouôn Dgieu par l'saint Esprit tchi nos a 'té envyé. Ch'est en tchi quand j'têmes acouo faillis, l'Christ en l'heu baillit sa vie pouor les malfaîteurs. Assa ch'est d'tchi dû qué d'bailli sa vie même pouor un homme tch'est juste, ouaithe qu'i' s'piêsse qu'nou bâr'rait sa vie pouor un bouôn houmme. Mais l'Bouôn Dgieu nos a procliâmé s'n amour, véthe: même quand j'têmes acouo des pécheurs, l'Christ baillit sa vie pouor nous. Épis acouo, si j'avons achteu la justificâtion par san sang, ch'est qu'lé salut contre la mârrisson du Bouôn Dgieu nos veindra par li. Viy'-ous qu'si quand j'têmes opposés au Bouôn Dgieu, la mort d'san Fis nos a mîns en accord auve li, achteu qué j'èrsommes alliés auve li, j'éthons l'salut par sa vie. Et bein mus qu'chenna, j'sommes rêjouis dans l'Bouôn Dgieu par not' Seigneu Jésû Chri, par tchi qué j'sommes achteu à la paix auve lé Bouôn Dgieu.

 

Chîntchième chapitre, vèrset 12

Né v'chîn pouortchi, viyant qu'lé péché entrit dans l'monde par un seul houmme, et par l'péché la mort, et d'chutte manniéthe à touos l's hoummes la mort s'pâssit, car touos ont péché

 

Siêxième chapitre, vèrset 9

Sachant qué Christ êl'vé des morts n's'en va pus mouothi. La Mort n'a pus d'pouvé sus Lî.

 

Chapitre 6, vèrset 21

Tchi frits qu'ou portêtes à chu temps-là? Des frits dé tchi ou rouogissez aniet. Car la fîn d'ches choses-chîn, ch'est la mort.
 

Siêxième chapitre, vèrset 23

Car l'salaithe du péché, ch'est la mort, mais l'don dé Dgieu, ch'est la vie êtèrnelle en Jésû-Christ, not' Saûveux.

 

Chapitre 7, vèrset 18

Lé d'si est là, mais jé n'trouve pon l'Mouoyen d'faithe bein.

 

Chapitre 7, vèrsets 21-25

J'voudrais faithe chein tch'est bein et pour lé mus, mais i' semblye qué j'n'arrive qu'à faithe ma.
Au fonds d'mé jé sis tout à fait d'accord auve la louai du Bouon Dgieu, mais j'connais eune aut' louai en mé tchi s'èrbele et m'garde enchaîné à la louai du Péché. Malheutheux baloque qué j'sis! Tch'est qui peut m'aidgi à êcapper d'chutte mauvaîtchi qui m'entraîne à la mort ?
Jé r'mèrcie l'Bouon Dgieu qu'i' y'ait mouoyen d'etre sauvés par Jésus-Christ notre Seigneur.

 

Dgiêxième chapitre, vèrset 4

Car Christ est la fîn d'la louai, pouor la justice à touos les cheins tchi craient

 

Dgiêxième chapitre, vèrset 9

Si tu confêsses dé ta bouoche lé Seigneu Jésû, et si tu crais dans tan tchoeu qu'lé Bouan Dgieu l'êl'vit d'siez les morts, tu s'sas saûvé

 

Dgiêxième chapitre, vèrset 13

Car autchun tchi f'tha un appel au nom du Seigneu s'sa saûvé

 

Chapitre 12, vèrset 3

Jé vouos dgèrnie châtchun d'vous dé n'aver pon eune trop haute opinnion d'vous-mêmes, mais d'aver des sentiments modestes et raisonnabl'yes.

 

Chapitre 13, vèrset 8

Né séyiz à la dette dé pèrsonne, mais entr'aim'ous tous. Lé chein tch'aime les autres a accomplyi la louai.

 

Chapitre 14, vèrset 17

Ch'est en tchi l'rouoyaume du Bouôn Dgieu n'est pon la mang'gie et la béthie, mais la justice et la paix et la jouaie dans l'Saint Esprit.

 

Viyiz étout:

 

Les Pages Jèrriaises