La Rêunion
Par F. A. de la Mare.
Charactéthes.
DOUARD ERNOU (Un férmyi) J.N. RICHARD
SOPHIE ERNOU sa femme F.A. DE LA MARE
ESTELLE ) R.M. AMY
MARGOT ) lus filles A. LE FEUVRE
PHILO LE BRO le jeune homme à Estelle R. LE TEXIER
MISSIS LESBITHE la méthe à Sophie E. FRIGOT
PH'LIPPE LARBALESTCHI (pârrain à Philo) P. DE CAUX
Scène
Dans lé p'tit parleux siez Douard Ernou à la fin dé l'arlévée.
Margot Manman, j'ai tchique chose à té d'mander, j'veur saver tch'est qu'ch'est qu'eune ...
Manman La preunmié chose que j'veurs saver, as tu fait mes commissions?
Margot Oui Manman, ne v'chîn tes pépèr'ménts, la laine pour les cauches à pépée et eune rouolette dé nièr fi à boutons.
Manman Ah, Dgieu mercie qu'tu n'as pas oublier mes pépèr'ménts car j'n'ai par idée d'être prînse d'eune piquethie dans la gorge dans l'églyise démain.
Manman met ses pépèr'ménts dans sa pouchette.
Margot J'm'en vais aller met le restant des commissions dans la tchuisine, lé thée, le suchre et la flieu, mais d'vant y'aller peu tu m'dithe tch'est qu'ch'est qu'eune leune dé myi Manman.
Manman est surprinse.
Manman Tu'est bein trop jeune pour t'otchupper dité.
Margot V'la qu'a ti autchunne chose à faithe auvec des bourdons.
Manman Oh mais nennin, eune leune dé myi n'a rein à faithe auve des bourdons, tch'est qui t'fait d'mander dité Margot.
Margot Et bein, l'aute jour quand j'fumes siez papa et qui nos montri ses rueûque a myi y'avait un bourdon à voltigi l'tou d'la tête à Estelle et ou n'eut que dé s'touônné les sens, tu pâsle que jé riais.
Sophie entre auvec un présent
Sophie Ergardez ichîn bouanne gens, ne v'chîn acouo eune autre présent pour Estelle et Philo, j'en sait pas, combein qui s'en von ten aver d'dounnée, mais y'en à pas dêjà mal d'arrivée jus'qu' à ch'teu jé'n seu tch'est qu'ch'est.
Sophie lé dêpaqu'
Manman J'en sis pas eune mie ravie faut qu'tu pense qu'Estelle et Philo sont bein aimée dans l'vaisiné.
Sophie Tchi bieau présent, ch'est du Ministre et sa femme, et ch'est bein seux qu'y'en en étha iun d'l'êcole du dimanche, car y sont mâitre et maitrêsse.
Margot Ch'est qu'j'l sais bein qu'Estelle est maitrêsse dans ma classe, si j'ai l'malheur de pâsler a Nancy le Feuvre mon vieux, ou n'est pas longtemps d'vant m'haler sus ieune dé mes ouothelles.
Sophie Et n'ou ma dit que tu d'estouônne à l'y deshaller ta langue, ch'est bein malpoli Margot, si ton péthe saithait chounna y' t'en dounnait li un sermon tu n'peu pas rester trantchille pour chînq minutes.
Margot Faut bein qué j'rêpons Nancy si ou' me d'mande tchique chose eschpon.
Manman Sophie, tu n'as pas qu'faithe dé pâler sus tes filles tu t'es tout aussi pièthe quand tu t'es mousse tu t'es tréjous à faithe meché ou à joué tchique farce.
Margot va à sa gran'méthe et l'embrache.
Margot Mercie Manman, tu'es la seule qui prend ma part dans chutte maicon ichîn, mais autant coumme j't'aime ma chiéthe Manman, tu n'as pas acouo dit tch'est qu'ch'est qu'eune leune dé myi.
Sophie s'ertouônne brusquément et Margot s'touônne à sa méthe.
Sophie Tch'est qu'j'essa la préchaine chose que tu voudras saver, eune leune dé myi est eune vacance que n'ou prend quand n'ous mathié et qu'n'ou c'menche sa vie ensemblye coumme homme et femme, et Estelle et Philo s'en vont en Dgèrnésy pour eune semaine pour lus leune dé myi.
Margot ritonne et va à sa Manman.
Margot J'savais bein tch'est qu'ch'tait tu sai Manman et j'savais bein qu'tu n'voulez pas m'dithe tu n'est pas marrie à mé tu sai bein qu'ch'est tout pour du fonne.
Manman s'leve pour s'en aller et prend la main à Margot.
Manman Mais certainement ma chiéthe jé n'pouôrrais pas être marrie auvec té Margot, je crait qu'j'm'en vais aller m'erposer un p'tit brin Sophie, au mains qu'tu'as tchiquechose pour mé à faithe.
Sophie Si y'a autchune chose à faithe Manman les filles sont la, et peuve lé faithe, va t'èrpôser un p'tit brin, car tu'as un fort jour dévant té d'main.
Manman Véthe ch'est vrai, et un jour qui s'en va être remplyi d'mémouaithes pour mé car j'sis si contente qu'Estelle s'en va mathier un si bouan garçon coumme Philo.
Manman s'en va et Sophie met lé présent sus l'buffet Douard entre auvec un patchet et l'met sus la tablye et ergarde lé titchet qu'est d'sus.
Douard Ch'est un présent du Député Billot et sa danme, combein d'autre qui s'en va y'en v'nîn, y'en à bétôt assez pour remplyi l'hernais auvec les hauches, et pis ch'est d'tchi preunmié qualité.
Margot et Sophie s'appreche d'la tablye et Sophie dêpaque lé patcher en pâlant Douard cherche et trouve sa gazette et ses lunettes et s'assied dans sa grand tchaise.
Sophie Jé crai qu'ch'est eune pathe dé lincheurs, véthe ch'en est, èrgarde ichîn Douard tchi bouanne qualité ch'est d'la belle blianche telle, ch'est si charmant du député et sa danme d'envyer un présent si utile et si bon Margot èrgarde ichîn tchi bieau lincheurs.
Margot c'mench à s'enn'yer.
Margot Ah bah, v'la qui n'm'întérêsse pas du tout j'ai l'fliâtchet et j'veurs tchique chose à mangi j'peu ti aller faithe eune beurre si t'pliais mémée.
Douard met sa gazette bas et èrgarde Margot et Sophie.
Sophie Mais j'allons bétôt béthe du thée, Margot ch'est pas ...
Douard Bah, bah, laisse la aller en faithe ieune ou eune demi douzaine s'ou veurs tandit qu'oulle étha la bec plieinne dé pain ou n'pouôrra pas caqueter tréjous, la cliavette ne y'arrette pas, ou vos câsse la tête.
Margot va à san péthe qui s'met à liéthe sa gazette.
Margot Tu s'sais bein gêné, si ma langue essait cliutée à mon palée.
Douard J'en crai pas qui y'a grand damage qu'chounna s'arrive, oulle est trop bein pendue pour se dêslotchi sa aîsiement.
Sophie va envers Margot.
Sophie Va t'en dans la tchuisine Margot, faithe ta beurée et en la mangeant tu peu c'menchi à mette la tablye j'attend Estelle et Philo autchunne minute et j'crai bein qui voudra rester à béthe du thée.
Margot s'en va et Douard met sa gazette bas et èrgarde Sophie.
Douard Jé gâtons chutte mousse la à la maintchi trop tu sai Sophie, ou fait coumme ou veur et ta méthe n'en vait pas eune autre coumme yi. Estelle n'a janmais tait si eschevelée.
Sophie n'aime pas chounna.
Sophie Ah ne pâle pas d'même Douard, Estelle à tout l'temps 'tait pus serieuse que Margot, ch'est deux bouanne filles, mais Margot est bein pus trichette et est tout l'temps prête à joué tchique farce j'en sai pas dé tch'est q'ou chein.
Douard ritonne en haut.
Douard Tu n'sai pas dé tch'est qu'ou chein et bein j'sai bein mé, et j'm'en vais té l'dithe ou chein d'sa méthe pas chance.
Sophie à l'air surprinse.
Sophie Ch'est vrai Douard n'ou bliaûme les mousses et n'ous à 'tait tout' aussi piéthe.
Douard Mais bein seux, té rappelle tu quand l'Chent'nyi Dorey 'tait à cherchi pour les siens qu'avais bouchi la chînm'née au bouonhomme Charles Bisson auvec un fagot d'faûgiéthe, ta méthe ne pensé d'gèthe que ch'tait ses deux avers.
Sophie s'met à rithe.
Sophie J'en rit à'ch'teu, mais si Manman avait seu que ch'tait nous ou nos éthait assommée touos les deux mon fréthe et me, j'n'avaimes pas realisé tch'est q'éthai peu s'arriver au pouôrre bouon'homme Charles.
Douard Ou s'étès peu l'êtouffet.
Sophie J'l'sait bein, dgieu mercie que n'ou prend l'avis à vieilli.
Douard Et y'a eune autre chose qué j'mé rappelle bein, ch'tait quand ou's êprouvites à trainner la carosse à Moussieu l'Gros avau son pré et qu'tu tchi dans l'canné tu t'mîns à faithe des brées et ton fréthe se sauvi à la course et t'laissi assises la, le driéthe dans ieau, et ch'tait la preunmié fais qu j'te vi, j'en té pas ma fé un trop bieau portrait.
Sophie est amusée et rit.
Sophie Et ch'est qu'y'en eut à faithe des explyicâtions quand Manman vit que tu t'es trempée, j'me rappelle pas trop bein tchi mensonge que j'lis dis.
Douard va à Sophie et lî met les mains sus l's êpaûles.
Douard Et bein, ma chiéthe Sophie y'a rouôler des milles bouctées d'ieau avau chu canné la d'pis chutte séthée la.
Sophie Véthe Douard, et j'avons y'eut nos p'tites minséthes mais j'avons tait bein heutheux auvec nout p'tite fanmille et nos v'la arrivée aniet ...
Nou s entend des vouaix.
Estelle et Philo entre Estelle à un grand patchet, ch'est sa robe de neuches qu'oulle à 'tait chèrchi siez la couôtutiéthe ils sont excitées et ou les genée.
Estelle met l'patchet sus la tablye.
Sophie s'apprèche dé la tablye.
Sophie Y faut dêpatchi ta robe et la pendre Estelle pour qu'ou n'se pas achiffonnée.
Estelle pousse lé patchet d'côté.
Estelle I'n y'a pas d'soin d'la robe pour à ch'teu mémée, j'avons des nouvelles à vos dithe et ch'en n'est pas trop bouannes.
Douard s'appreche et est gené.
Douard Mais tch'est qui y'a, tchiques'uns ont ti ieu eune accident dites nous j'vos en prie.
Estelle Dis lus Philo, ch'est tes gens.
Sophie J'éspéthe que ton péthe est mangnifique, ch'est mon boustre d'pârrain qu'est tout l'troubl'ye y ...
Douard Es-ti mort?
Estelle Nennin, nennin y n'est pas mort, ch'est bein piéthe que ch'na dit lu Philo, tch'est qui c'est arrivé, y nos mantchet pus qu'chounna pour tchulbuter touos nos pliains.
Estelle s'en va s'assiéthe dans la grand tchaise et Sophie la r'garde et met eune tchaise pour Douard.
Sophie Tu fais bein dé t'assiéthe Estelle, Douard assied té ichîn, Philo prend chutte tchaise la et assied té et dit nous tch'est qui c'est arrivé pour vos tchulbuter d'la sorte
Philo s'assié au pid d'la tabl'ye et Sophie s'assié entre les deux hommes.
Philo Et bein j'm'en vais vos raconter du c'mench'ment, mon pârrain s'en fut au Canada y'a quarante chînq ans et la seule fais qui les èrvénu en Jerri ch'tait y'a vingt deux ans j'n'avais pas pus d'trais mais, y s'en v'nîn en Jerri pour eune vacance et étant qu'il 'tait l'seule fréthe à mémée, ou li êcrivit à d'mander si voudrait être mon pârrain, l'oncle fut bein content d'accepter l'învitâtion et il arrivit en Jerri en temps pour lé bâptême.
Douard Et il éthait bein voulu v'nîn pour les neuches sans doute, et bein ch'est grand dommage qu'il est si liain car il éthait tait l'bein v'nu.
Sophie Mais véthe, ch'est ti fichans qu'il est au Canada.
Estelle sé leve et va à la tabl'ye.
Estelle Mais ch'est la l'malheur y n'est pas au Canada dutout il arrivit ichîn en Jerri hièr mais y'n faut pas qui veinge à l'églyise dé main, ou bein si y veint y faut qu' Manman reste ichîn et acouo d'mus y faudra qu'ous muche de tchique bord, car y'n faut pas qui s'entre recontre.
Douard Tchi sorte dé sornettes qui y'a en allant je n'vai pas pourtchi qui n'peuve pas v'nîn à l'églyise touos les deux.
Margot rentre en mangeant eune beurée mais personne ne prend'avis et ou va s'assiéthe d'l'autre but dé l'appartèment.
Sophie Mais tch'est qu'est la raison qui n'faut pas qui s'entre recontre.
Estelle Tu f'thas aussi bein lus dithe la raison Philo ta méthe à dit que ch'tait la la miyeu chose à faithe.
Philo Véthe, tu'as raison Estelle, ch'est bein mus qu'tous sache la raison pourtchi qui n'devthais pas s'entre vaie et acouo mus qui n'devthais pas s'entre recontré, ch'est à cause dé tchique chose qui s'arrivi y'a quaran-chînq ans entre mon pârrain et ta grand'méthe Estelle. Ils 'tais engagis, et quand vins pâlement d'lus mathier, m'oncle Philippe voulait a toute forche s'en aller d'meuther au Canada, et ou'n voullait pas y'aller sus autchun conte et d'même y s'entre tchittites.
Estelle Manman n'os en aver janmais pâlé un mot dit mémée.
Sophie Et bein, je'n m'en vai pas menti, j'savais bein qu'y' avait ieu un autre jeune homme dévant pépée et quand y vint tchestion d's'en aller d'meuthé hort payi que l'affaithe avait brochis, mais aussi v'rait coumme j'sis ichîn je n'savais pas que ch'tait l'oncle à ta méthe Philo.
Philo Si fait ch'tait li et ch'est pas la tout, y pâle dé rester à fini ses jours en Jerri à ch't'heu qu'il est veuvi, mais fiche dé chounna pour à'ch't'heu la chose en est tch'est qu'j'allons faithe dé ieux d'main.
Estelle Et bein y'a eune chose qu'j'sait bein si j'empêtchons Manman dé v'nîn à nos neuches démain oulle étha l'tchoeu rompu.
Sophie Oh mais Estelle, tu sait bein qu'j'en pouvons pas faithe dité, ch'est pas mé qui s'en va li dithe qu'ou n'peu pas y'aller par chance j'en séthais pas coumment m'y prendre, tch'est qu'tu crai qui faut faithe pour le mus Douard.
Douard se leve pour s'en aller.
Douard Laisse l'affaithe coumme oulle est, y'm'semblye qu'ous êtes a faithe eune fouée pour rein du tout. Y sont, viers assez pour saver mus qué dé c'menchi à s'entre chicangni en dré tout l'monde démain par chance.
Margot s'leve dé dans la tchaise et vint aupi d'Estelle.
Margot Tchi bordée d'fonne Estelle si c'menchais à s'entre quetiyi touos les deux dans l'chimchéthe.
Douard ès surprins d'la vaie la.
Douard Tchi dgiâtre que tu'es à faithe ichîn dans té Margot, j'pensais qu'ta méthe t'aver dit d'mette la tabl'ye.
Margot Y'a longtemps qu'ou l'est mînse, j'allons ti bétôt béthe du thée, jé l'fliâtchet mé.
Douard Tu'as tréjous faim, jé crai tu'as des vers j'm'en vais aller m'approprier un mio en arrêtant.
Douard s'en va.
Sophie Ecoutées mes esfants, j'allon oublier tout pour lé moment, Estelle va porter ta robe à haut, dêpaque la, et pend la, té Margot prend ta bike et va dithe à Missis le Bro qu'j'allons garder Philo à béthe du thée et dit li qu'j'a gângne dans la séthée pour décidé tch'est qu'en est pour démain, pour Manman et san ...
Philo Merci Missis Ernou jé f'thai mus d'aller dans la tchuisine en arrêtant pour nous à v'nîn béthe du thée.
Estelle Véthe Philo, va dans la tchuisine, pépée est la et j'allons tâchi d'être pas trop longtemps et té Margot des m'lasse té et reste pas à baillyi d'ta bec à Nancy Le Feuvre si tu'as malheur d'la vaie en passant.
Margot s'apprèche d'Estelle.
Margot J'm'en vais aller quédaine, car y'a un certain Moussieu qu'j'voudrais vaie.
Sophie N'ait pas l'malheur dé pâlé à personne que tu'n'connais pas.
Margot s'en va et Estelle prend son patcher et s'en va suivie par Philo, Sophie s'assié dans la grand'tchaise Manman entre quand Sophie est presque finis d'pâlé.
Sophie Aah que j'voudrais vaie d'main des milles au liain.
Manman s'apprèche dé Sophie.
Manman M'as tu d'mandé tchique chose Sophie.
Sophie Nennin, m'mée j'te pas dit rein, veton t'assiéthe ichîn à t'erposer car j'essa un jour bein lâssant pour té d'main.
Manman Oh mais, j'sis mangnifique, ch'est té qui n'a pas l'air trop bein, j'crai qu'tu'as pus bésoin d'la grand'tchaise que mé.
Sophie, s'leve, tappe lé couossîn et fait Manman s'assiéthe.
Sophie La, met té à t'n'aise, as tu but ton thée.
Manman Mais certainement j'ai bu mon thée, et pis mon vieux ch'est qu'je ieu un bouan fricot, j'ai mangi eune pinte dé vlicots.
Sophie Des vlicots, tch'est qu'en à apporté.
Manman Ch'est l'Fraînque Noué, il s'a pêchis à la Rocque, j'dev'thaimes y'aller tchique bordée en pêchi un fricot Sophie.
Sophie est surprînse.
Sophie Té m'mée aller pêchi des vlicots dans les rotchiers à la Rocque, tu n'est pas bein don, à l'age que tu'as.
Manman s'but mais ou n'est pas mârrie.
Manman Et pourtchi pas, j'en sis eune invalide, ma pouorre fille, j'ai acouo deux bouans géthees pour grinmper parmi les rotchiers.
Douard à entendu lé mot invalide en entrant.
Douard Si y'a eune invalide dans chutte maison ichîn, ch'est certainement pas ta méthe Sophie, j'vos entendez bagouler dé dans la tchuisine, tch'est qu'ous êtes en train à ardgumenter dé vos r'mathier j'crai bein.
Douard s'assie à la tabl'ye et ouvre sa gazette Sophie est chotchie.
Sophie Douard, ne sait pas si affronté envers mémée.
Manman Ch'est bein Sophie, Douard n'a pas 'tait affronté dutout, et pis, j'm'en vais vos dithe, j'sait bein qui n'y'a pas eune homme qui voudrai prendre un tel fardé coumme mé, mais si j'voulais m'er mathié, n'y'a pas personne au monde qui m'empêtchais dame.
Sophie est acouo pus surprinse.
Sophie Dé tchi janmais qu'tu'es prînse mémée, j'sis extâssiée dé t'oui pâler d'la sorte.
Manman rit Douard èrgarde Manman et pis èrgarde Sophie.
Douard Bah, bah, à rithe et à badiner n'ou se câsse pas les dents Sophie, mais j'ithons s'ou voulez ma belle méthe, chèrchi un fricot d'vlicots et d'bainis à la Rocque, j'ithons auvec la vanne et la jument, quand j'essons pas si embarrasées, lé s'tembre est la miyeuthe saison pour la pêque. Sophie, va béthe ton thée j'en prie, ta méthe t'a laissi à bein près eune tchullées d'vlicots, tu f'thas mus d'aller les mangi.
Sophie J'ai pus envie d'eune tasse dé Thée que d'autre chose, fiche des vlicots.
Sophie s'en va et frume la porte et Douard èrgarde sa gazette.
Manman Y dise que ch'est à la Rocque qui sont les miyeurs, y sont gros et nier coumme d'la sie, le temps ...
La porte ouvre et Estelle entre dans sa robe dé neuches.
Estelle Ou'est qu'est mémée, j'pensais qu'oulle 'tait ichîn dans.
Manman s'leve et va à Estelle, Estelle va pour s'en aller.
Manman Arrêtte eune minute Estelle, qu'j'vais ta robe, oh mais tchi belle robe, et ou t'fait si bein èrgarde Douard, tu dev'thais être bein ordgilleux d'avait eune fille coumme Estelle.
Douard continue à liéthe.
Manman Entends tu Douard, ou bein as tu la tête viade.
Douard leve la tête.
Douard Nennin j'n'ai pas la tête viade, mais après qu'lé jour dé d'main sa passé, j'sait bein tch'est qui s'sa prèsque viade, j'essa ma pouchette enfin, dgieu mercie, ch'est pas touos les jours.
Douard èrgarde Estelle.
Douard Et bein sémnâge, ch'est vrai qu'tu pathais bein et j'èrtranche tout chaque j'vint d'dithe, ch'est chutte vielle pie la, ta grand méthe qu'étè à m'éstibotchi.
Manman rit, Estelle va à san péthe et li met la main sus l'êpaule.
Estelle Tu n'as rein à dithe pépée, ou s'êtes touos les deux dans l'même pangni, ou s'êtes tréjous à vos entre estibotchi, et pis êcoute ichîn, mon vi, si ta pouchette est quâsi viade, tch'est qu'a aidgi à la remplyi, et pus d'eune fais valet.
Douard Et j'soummes si contents ta méthe et mé que tu t'as vas mathier un bouan gas coumme Philo, et j'sis bein seux qu'ta grand méthe est d'la même idée coumme nous.
Manman èrgarde en bas.
Manman Mais véthe, j'sis bein contente car j'ai des mémouaithes que j'ai tréjous gardé à memême, et janmais dit à personne.
Estelle va à sa gran'méthe.
Estelle Ah. manman, dit nous tch'est qu'ch'est si-t pliais.
Douard Ton ségret ne sa p'têtes pas ségret longtemps il est janmais trop tard pour un r'miéde.
Manman les r'garde bein séthieusement.
Manman I'n y'a pas dé r'miéde pour s't'ichîn, il est bein trop tard à ch't heu, et pis d'ailleurs ch'té d'ma faute, et d'même ch'est mus d'en pâler pas.
Estelle Et bein manman ch'est coumme tu voudras j'm'en vais à haut. Ôte ma robe et j'l'apporterai à bas pour met un crochet d'pus au co.
Estelle s'en va d'dans l'appartement et Douard pâque sa gazette en pâlant.
Douard I'n faut pas craithe tou cha qu'nou liet dans les gazettes ne v'la eune ôti qui dit qu'y'a du monde à d'meuthé sus la leune, il est fo au mains.
Manman I'n faut pas s'ravi d'rein au jour d'anniet tu sai Douard.
Douard se leve pour s'en aller i's touônne à sa belle méthe.
Douard Non ch'est bein vrai, ne v'la justement cha qu'j'ai apprins anniet, savez tu bein que ...
Manman chérche pour san mouoché.
Manman As-tu veu mon mouoché Douard, y faut que j'le laissi dans la tchuisine quand j'ai tait béthe du thée, j'm'en vai aller l'chérchi.
Manman s'en va, Douard march en funmant sa pipe.
Douard J'en sai pas coumment qu'l'affaithe s'en va fini et je n'm'en vai pas m'en touoilli, qui lis paûque.
Nous entend des vouaix et Margot et Philo entre un mio excitées.
Margot Pépèe, il est arrivait j'lé veu et j'ieu pâlé.
Douard Tu'as veu tchi et tu'as pâlé à tchi?
Philo Ch'est à mon pârrain, Mess Ernou. Il arrivit hièr, et I' s'sai si content d'rencontrer vout fanmilye, Margot la veu quand't oulle est v'nue dounner un message à ma m'mèe, estchpon Margot.
Margot Véthe, mais quand j'l'ai veu, il 'tait si charmant que j'ai tout d'un coup changi l'message.
Douard Et tch'est qu'tu y'as dit, allons dit mé.
Margot Et bein, j'ieu dit qu'a la pliaiche dé té et mémèe à aller vaie, qu'ou s'êtes bein contents qui veindrai nos vaie et surtout Manman.
Douard est mârri.
Douard Et surtout Manman, en v'la eune belle affaithe, j'allons aller siez té Philo, coumme j'avons arrangi.
Philo J'ai grand èrgret Mess Ernou, mais je ieu rein à y' faithe, mais je n'crai ...
Douard èrgarde Margot.
Douard Tu sai bein que je n'pouvons pas aver l'pârrain à Philo ichîn sans dgèrni ta gran'méthe, et tch'est qu'tu crai qui s'en va l'faithe ch'est tout à fait difféthant si s'ent rencontre à l'eglyise.
Margot J'm'en allai li dithe.
Douard I'n y'a pas autchunne d'doute dé ch'na.
Douard va jusqu'a la porte et s'ertouônne.
Douard Sapresti d'mousse, y vos f'thais pendre.
I's'en va et la porte un mio rudement.
Margot J'n'ai pas fait grand progrès jusq'u à ch't heu dé chu but ichîn Philo.
Philo veint a Margot.
Philo N't gêne pas Margot tu'as fait d'ton mus.
Estelle entre d'un ambront oulle à sa robe sus son bras.
Estelle Tch'est qu'y'a en allant, tch'est qu'p'pèe à qui file coumme eune esparto dé feu il à mantchi dé m'tchulbuter dans l'allée.
Margot Il est marri a me, car j'ai invité l'pârrain à Philo à v'nîn nos vaie et j'en sis pas gênée, j'n'ai pas fait rein d'ma.
Estelle Tu n'avais pas qu'faithe dé t'en mêler dutout, mémèe ta envyée siez Philo pour lus dithe qui s'en allez àgangni à ces sé pourtchi ...
Estelle met sa robe sus la tchaise Manman entre et pâle en allant s'assiéthe.
Manman J'en sai pas dé tchi qu'vout péthe est prins, j'veins dé l'vaie couorre à mont l'bel coumme eune âne qu'a l'mor es dents.
Estelle et Philo s'ent èrgarde.
Philo Je crai qui s'en va jusque siez nous Missis Lesbithé vaie mon pârrain, qu'arrivi du Canada hièr.
Estelle Vein-t'en Philo, ch'est mus d'aller vaie tch'est qu' en est, I's'en vont p'têtes s'en v'nîn tous ichîn.
Estelle et Philo s'en vont.
Margot examine la robe à Estelle.
Manman Les tchièrs qu'Estelle à dit qui s'en veinne p'têtres ichîn Margot.
Margot met la robe d'vant yi même.
Margot Ergarde Manman, ou mé f'thai bein à mé s'ou 'tait pus p'tite et té Manman leve te, que j'la met contre té.
Manman hesite.
Margot Allons Manman, ch'est qu'pour eune bordée d'fonne, vein-t'en leve té qu'j'viyons.
Manman s'leve et Margot met la robe le long d'yi.
Manman Et bein ma pouorre Margot, y dise que n'ou r'dote à tout âge, mais n'en v'chîn la preuve.
Margot Et bein Manman si ton vier galant t'verrai, i's'ai en amour auvec té dans mains d'chînq minutes.
Manman rit et s'assie.
Manman Mon vier galant, y'a longtemps qui m'a oubliyies et d'ailleurs, il est des milles au liain, le pouorre Ph'lippe Larbalestchi, j'ai souvent pensé en lî.
Margot Si 'tait en Jerri Manman et qui voudrai v'nin ichîn t'vaie tu lî pâlais, dit Manman.
Manman s'èrdréche.
Manman Mais certainement j'lî pâlais, mais n'y'a pas grand dangi qu'ch'la s'arrive.
Margot c'menche à s'excite.
Margot Si fait ch'la peu s'arriver, car il est ichîn en Jerri même, et acouo d'pus i s'en vein t'vaie.
Manman est surprinse.
Manman Et bein je'n'peu pas l'craithe, i faut qu'j'alle m'approprier un mio.
Margot couorre à la porte ou l'ouvre et la r'freunme et s'touonne à Manman.
Margot Il est trop tard, Manman lé v'chîn qui vein auvec pépèe et mémèe.
Margot va vite se mette driéthe la tchaise à Manman, la porte ouvre et la m'mée a Margot entre suivie par Mait Ph'lippe et Douard. Sophie et Douard ont un mio peux.
Mait Ph'lippe va à Manman auvec les bras ouverts et l'embrache qu'ous leve dé d'dans sa tchaise.
Ph'lippe Et bein, ma chiéthe Rachel, coumment tu'es j'sis ti content dé t'vaie, jé pensé en té des chent mais.
Manman des halle san mouochet car oulle à les larmes es yieux.
Manman Et me etout Ph'lippe, et j'n'ai janmais pâlé a personne, et dit mé quand tchi qu't'arrivit.
Ph'lippe J'arrivit hièr au mâtin, quand ma soeur êcrivit à m'dithe que Philo s'en aller s'mathier et tch'est qui s'n aller mathier, l'envie d'èrvenîn m'prins, et mé v'chîn, assié té Rachel car j'sai bein qu'ch'est un choque pour té.
Manman s'assié et Douard s'appréche dé Ph'lippe.
Douard Et d'penser qu'les femmes 'tais à lus câssé la tête entouorre vos deux.
Sophie Je n'savaimes pas tchi faithe pour le mus estchpon Estelle.
Estelle Et la m'mée à Philo donc ch'tait yi qu'étè gênée quand ou vos vit arriver dans l'bel.
Philo Mes pathents n'voulez pas vaie d'brit entre deux fanmilye qu'accordes si bein.
Manman Mais pourtchi m'en pâlé pas, ergardez la gêne et l'embarras que jé causé.
Ph'lippe Y'a pas d'doute que si l'avez seu not histouaithe Rachel v'la qu'ethai sauvé un tas d'embarras.
Margot vint au pi Ph'lippe.
Margot Et mé qu'aime bein un mio d'rêvillon j'pensée p'têtes que j'ethais veu eune batâle.
Sophie Margot veurs tu bein t'taithe.
Rachel Laisse la Sophie, tu sai bein ch'est tout en fonne qu'ou dit chounna.
Douard s'avanche à Sophie.
Douard Ch'est pas l'tou je'n sai pas tch'est qu'ous en pensée mais j'propose que j'bévons à vout santé Ph'lippe, Sophie et Estelle deshalle la boutelle et les verres.
Mait Ph'lippe èrgarde Douard tandis qu'Sophie deshalle cha qui faut.
Ph'lippe Eune bouanne idee valet, mais j'aimthais bein changi ch'la un p'ti mio s'ou voulée m'permet bouannes gens.
Philo La Santé à Missis Lesbithé est inclus etout j'espéthe.
Estelle J'allons pas oublyier Manman par chance.
Margot J'espéthe que j'peu en aver deux d'gouts etout mé.
Douard Tu peu aver d'la limonade té Margot.
Mait Ph'lippe s'avanche.
Ph'lippe Ecoutées bouannes gens, j'propose qu'j'bévons tous à la Santé du couplye qui s'en vont lus mathier d'main et à la santé (y s'touonne à Rachel) auvec ta permission Rachel, car ch'est pour chounna que j'sis èrvenu.
Rachel Mais certainement Ph'lippe j'sis d'accord.
Ph'lippe Et à un pus vier couplye qui veulle s'ent soigni sus lus viers jours ch'la veurs dithe eune aute bordée d'neuches.
Sophie et Estelle passe les verres à tout l'monde.
Douard La, es deux couplyes, vout bouannes santé.
I leve tous lus verres.
Margot Manman n'oublyie pas vout leune dé myi.
Sophie Margot.
I' lus mett'tous à rithe.
RIDGEAUX.
Viyiz étout: