Les Pages Jèrriaises

Un Farceux Raintchivâle èt Apèrt.


Corp-d'âm' né dout' qué les farceurs
Ont 'tè d'tout temps - coum' les menteurs ;
Mais prêserv' des mile èt mil' fais
Qué nos yèrs en fix'nt trop êpais
Dé la vilain' sorte au laitdur'
D'tchi j'm'en vais vos fair' la pictur'.

Dit's-mai, j'vos prie, mes bouann's gens,
Av'-ous connu dans vos jeann's ans
Man grand-onkl' Michè, d'la Tenn'rie,
Qui fît l'atchiès d'eun' Seigneurie ?
Mais l'temps d'tchi j'pâle est si yian d'nous,
Qué, dé-vrai, l'pue grand fieutchè d'vous
N'étchiêtes qué babouins en cotell's
L'jeu qué l'vi-houm' patchit ses vell's !

Mais i faut qu'j'vos cont' lé mêchè
Qu'nou-z-alit faire à Maît' Michè,
Du temps qu'i-l-'tait à Saint-Martin
Et rèque à deux-trais pas d'Mouôzin : -
Lé bouanhoume avait un côti
Remply d'geon, qui - sans en menti -
Né pouvait jeanmais êt' pue bé,
Et justément bouan à copé.
Mais i n'criyait dguèr, lé pouôr' vi,
Qu'chut' belle ercolt' n'tait pas pour li :
Un farceux, pour en fair' san jeu,
Alit eun' gnièt y mètr' lé feu . . . .

Dé vès san biaux geon consumè
Et tout jusqu'à la tigu' brûlè,
I n'en fut à deux ou à trais
Pour empouangni un long but d'bouais,
Sus l'tchè, sans truncé, i cliouhit
Un morcé d'plianche ove un êcrit,
Qu'i fitchit sus l'haut du fôsè,
Qu'encliôsait l'tèrrain désolé.
Par ch't- anonc' Maît' Michè ofrait

Douz' louis à tchi dêcouvrirait
L'auteu du tort, - mais ch'fut en vain,
Dé sa dêmarche i-l-en d'vint rain ;
Ou pustôt, pour satisfaction,
Lé bouan sujèt fît 'rparâtion :
D'gnièt, à l'êtemperche, i filit,
Et drièr' la plianch' grifouolit -
"J't'en prie, Michè, gard's tes gros louis,
"Car j'tais tout fin-seu quand jé l'fis ! . . . . "

 

J.D.R.
St.-Sauveux, chu 8 Août 1863.

 

Viyiz étout:

 

Les Pages Jèrriaises