|
Oh! qu'j'aim'thais r'vaie siez nous, En Jèrri, l'èrnouvé .... Les g'zettes et l'bliu coucou En avri, au solé ; Et quand, pus tard, étout Nou-s-est au bieau mais d'mai . . . . Là-bas sus la falaise Tout près l'Creux Gabouothé ! Comme j'voudrais r'prendre mes pas D'aut'fais, ès Landes, là-bas ! Qué j'aim'thais, don, èrvaie Les Mielles et Les Tchennevais ! Si janmais j'èrfais viage .... J'racate nouot' vièr mênage ! J'y restéthai pouor bouon .... J'sais bein à même-là, don! Car ouaithe qué j'faiche bein 'chîn Dans l'vouêt du Canada, Dé pus en pus l'ennion Mé happe au tchoeu, ah çà; J'travâle et jé m'dêhale - J'ai fait mouoyennement d'sou - J'paqu'sais mes quat' quéminses, J'm'en r'îthais pouor St. Ou! Man vièr Jèrri - j'y tcheins M'èrvélo, ch'est finni! .... Quarante ans hors au large .... J'm'en r'veins pouor y mouothi ; Jé s'sai l'tou d'La Corbièthe Dans tchiques sémaines d'à ch't heu !... Jèrri - où'est qué j'sis né - Mon doue, mais tchi bonheu!
|
Viyiz étout: