Les Pages Jèrriaises

Les d'vis d'une Pie

 

Ki-ri-ki-ki
Ka-ra-ka-ka

Salut, Messieurs et Mesdames, lecteurs d'la Chronique. Man nom est Marie la Pie.

Je d'meuthe un mio partout avec m'n homme Jean l'Piété. Me v'là installée sus l'pèrsonnel permanent d'la Chronique. Ch'est comme chennechîn qué l'affaire s'est faite.

Né v'là tchique temps qué l'Caouain n'est pas bein raide - i' c'menche à châtchi au manche. I' s'vieillit. Mais i' n'est pas 'couo en mouothant, bein au yain ! Avec ch'là, l'âge est là, et 'ous vos s'sez appèrchus qué ses articlyes n'appathaissent pas si redguliéthement comme aut'fais.

Quand a Marie Hibou, eh bein, ou fait d'san mus (oulle êcrit eune articlye par biue leune car oulle est pus souvent bein otchupée dans sa tchuisinne ou offuche à corriger touos ses moustchins d'ouaisieaux. Et pis, entre nous, ou n'etes pas des pus êdutchies ! Poursuivant not' sujet pus yain, les p'tits Caouains né donnent dgéthe autchun sinne tch'i' suivront la vocation d'lus péthe. I' sont comme toute la jeunèche d'acheteu, trop pour lé jeu - ch'est-à dithe, les amusements. D'ailleurs i' lus faudrait acouo deux ou trais ans sus l'co - i' n' sont pas finis d'lus êcolage.

Et d'même, tout bein considéthé, lé Chef dé la Chronique (tch'est bein connu par tous vous) sachant qué la popularité d'san papi diminuêthait si ch'est qu'i' n'y avait pas des nouvelles dessus, annoncit bravement pour les applyications. I' n'eut pon d'rêponse !

I' dit que ch'est manque dé respet et qu' lé monde ne savent pus vivre, mais mé j'sai bein mus. Ch'est lé manque d'êducation. Pour dé mé j' n'en ai pon pus qu'i' n'faut, mais j'peux bailli d'ma « goule » (respet votre honneu) comme touos l's ouaisieaux d'ma classe. Lé Chef m'a dit qu' ch'est tout ch' tchi li faut.

Et don, a forche d'chèrfouoilli dans les pâraisses i' m'trouvit, sus eune branque dé iun des tchênes dans les Vinchelez, à St. Ou. Là-d'ssus j'pâlimes d'eune chose et d'autre et finalement, tréjous, auve toutes sortes dé promêsses et d'bieaux-bieaux d'sa part j' m'engagit à joindre lé pèrsonnel dé san papi. Ch'est un malin gas qu'li et quand il a d'tchi dans la cahueule i' n'la pon ailleurs. Enfin, j'ai promîns et i' faudra qué j'faiche dé man mus. Comme j'ai dit, j'peux caqueter au pliaisi d'la vie et ch'est tréjous eune grand' chose. Et pis ch'est des Nouvelles tchi lus faut. Eh bein, j'lus en bâdrons ! Entre nous, ch'est tout bein d'être avenants, comme i' sont à l'Office, d'être pliaisants au monde, bein affablyes et dé tout (comme lé Sieur Simon tch'est poli comme un dgichon couôsu), mais i' faut d'autres choses - i' faut des Nouvelles, bouonnes ou mauvaises !

J'vos l'ai dêjà dit, jé f'tai (sic) d'man mus.

Av-vous jamais oui les deux ou trais mots tchi suivent ? :-

Marie la Pie, tchi fait san nid dans les côtis,
Pierre l'attrape et lî cope la patte et la donne à sa vielle catte.

(Ou n'tait pon bein malinne dé s'laissi haper d'la maniéthe, chette-là).

Et bein les préchains jours j'vos en dithai bein d'autres, du cliai et d'l'êpais. Ch' n'est 'sa p'têtre pon tréjous la puthe, plieine et entchiéthe véthité, car j'en ouait d'toutes les sortes. Eune fais j'sis dans les bouais du Mangni d'la Trinneté, eune autre fais dans les siens du Vièr Marchi, et ailleurs. Tréjous au vol, dans l's airs.

Comme ne v'lo Noë tch' appraiche j' tach'chai d'êcrithe tchiques patholes quand ch' n'es'sait qué d'vos souhaiter les complyiments d'la saison, tchique temps d'vant Noë.

En m'introduisant comme j'ai fait aniet jé pense qu'ous m'extchus'sez si ch'est qu''(sic) n'vos ai pon dit grand' chose d'întérêssant. P'têtre bein qu' les préchains jours j'éthai man portrait au haut d'la colonne tch't' m'rêsèrvéthont sus la Chronique.

J' m'en vais aller en ville au pus vite mé faithe dessinner, et si ma photographie touonne bein j' n'éthai pon honte dé vos la montrer.

Pour acheteu, à la prechaine.

 

MARIE LA PIE

Les Chroniques de Jersey 9/12/1933

 

Viyiz étout:

 

Les Pages Jèrriaises