Bon Jour a tuous d'vous tch'écoutte la lettre jerriaise aniet l'8 d'Aout 2009. Couomme normale, ch'ést un pliaisi pour mé Clifford Laisney d'vos la présenté.
L'année passée, dans iune de ses presentations d'la lettre jerriaises, la Danme Ursula Taylor nos raconti l'histoûaithe de sa machinne a couôtre, une possession d's'cendue de sa grand-mèthe. Ch'tait interessant d'entendre couomme tchi qu'l'usage de tel oti avait donné 'tant utilitét et d'plaisi a tant d'gens.
Ayant reflètchi sus c'histouaithe me fit penser que dans ma possession etout j'avais un p'tit oti tchi, s'in pouver selon pasler authait gentiment d'seines et d'contes a raconté.
Ch't'ôti est un p'tit pid d'fé. Ch'n'est qu'un ôti envithons douze pousses carré auve trais diffethentes tailles de pid, iun pour les souliers d'p'tchiots, le mitoyen pour le juvènile et l'traisieme pour l'adûlte. Ch't'ôti agi envers 150 ans s'trouve dans ma possession ayant 'tait d's'cendu d'fanmillye de mon grand-pêthe Papa Langlois, pêthe de ma mêthe tchi 'tait iune de seize éfants. (Pas d'television ales distracté dans ches temps la). Sans doubte j'authait 'tait la couteunme d'erpather les souliés au lieu d'aller siez l'cordonnyi. J'sis seux que Papa Langlois authait passé ses sethées dans son hangar auve la leunmiethe d'une lanterne a couôtre et cliouer les s'melles et talons des souliées d'ses mousses en prépathation d'l'école le lendemain.
Mon pêthe etout faisait grand usage du pid d'fé, sustout duthant l'otchûpation. Ch'tait impossiblye d'obtenin du tchui pour erpather les bottes, et d'même differents substituts v'nais au s'cours d'erpathé les chavettes.
Et d'même le p'tit pid d'fé a tch'aits dans ma possession, mais n'pensez pas ch't'ôti est en ertraite. Quand j'taits jeunne homme sus la ferme auve mon pêthe, y'avait une periode quand la couteunme 'tait d'couvri les s'melles et talons d'nos bottes de ferme auve du gros cliou et les pointes et talons 'taits renforchies d'féthall'thie. Les bottes p'sée un tonné et faisaits un cliatin sus les routes. J'me d'mande si ch'tait p'tre cause d'aver veu les soudards d'otchûpation en marche que j'voulaimes etout etre soudards. Ch'tait la acquo une utilité du pid d'fé. Le travers des années j'me sis servi du pid d'fé en erpathant mes souliées et même les siens d'Veronica, mais hélas ma source de fournituthe est eteinte cause d'la freunm'thie d'la boutique a Woolworths éyou q'j'accataits la marchandise pour mon projet. Le p'tit pid d'fé a servi son temps et setha beintôt en ertraite probablyement sus l'ais d'foyi d'iun d'més p'tits fils. Oh! si pourrait selon raconter sa vie.
Quouaiqu' je s'sait télevision, radio ou les gazettes, ch'est impossiblye d'eviter l'importance des precautions qu'els autorités r'commandes que'je prennons envers la grippe connue comme le 'swine flu'. J'avons lu et entendu pâsler de la grande épidemie d'flu t'chu lieu dûthant la premier dgerre. Les consequences des fatalités fûtes enorme. I nos est dit que les dimensions de l'épidemie tchi s'presente au moment tête'tha au c'mmenchement du S't'embre. Faut éspethérqu'els autorités responsablye pour la santé du peuplye sethonts prépathées en cas d'besoin.
Quouaiqu' chez hardi important en tuous temps d'prendre toutes précautions en orde d'évité toutes sortes d'infestation et d'maladie, j'me d'mande si la jeunesse d'aniet est aussi immune et exempte d'maladie comme not génerathion et sienne de nos anchêtres. Les siens d'vous tchi gagnaits lus vie en ferme, en construction et telles otchupations sethonts bein au couôthant des presque nul facilitées d'hygiêne en existence dans l'temps passé. Auve mains terreuses, cotées d'engrais, pliâtre, huile etc quand i v'nait l'temps d'la bouôuchie, nou frottait les mains auve une chique et assis sus l'fossé le mangi compathait a la tabliée d'un prince. Tout ch'la aid'gait a combattre une resistance es germes que malheutheusement j'avons l'air d'aver perdu cause des nouvelles aides de sanitation et d'excessivement l'usage d'hygiène.
Mercie pour vôt attention, j'espethe qu'ou s'allez rejoui d'une bouone semaine, et qu'ou vos garderez en bouonne santé.
A la prechaine.
Clifford Laisney
Viyiz étout: