Chu monde est eune êcole;
chutte vie - un êcolage.
La Natuthe? Pathabole
du Vrai tchi nouos dêgage.

Si l'drouait j'prannons pouor dgide,
j'n'en éthons janmais honte.
Bâtissons sus l'solide!
Ch'est l'caractéthe tchi compte!

Châque action a san frit,
ichîn-bas comme au-d'là.
J'èrcolte chein qu'j'ai s'menchi,
jé sis bein seux dé ch'la.

Not' êcolage finni,
i' faut patchi nouos tailes.
La vie s'en va c'menchi!
Lé Maître nouos appelle.

J'pouôrrons crouaîsi l'passage
dé la Vallèe d'la Mort,
auve confiance et couothage,
si l'Pilote est à bord.