Dé Paul, un prisonnyi d'l'Onguenné Jésû, et Tînmothée not' fréthe,
à Philémon not' chièr anmîn et parchonnyi, et étout à Apphie not' soeu et Archippe not' compangnon d'combat, et à l'églyise tchi s'rêunnit siez té: qu'la grâce et la paix saient à vous dé Dgieu not' Péthe et du Seigneu Jésû Chri.
J'èrmèrcie tréjous man Dgieu quand j't'èrmèrque dans mes priéthes, par cause qué j'ouais pâler dé t'n amour pouor touos ses saint et ta fouai dans l'Seigneu Jésû. J'prie qu'ta parchonn'nie auve nous dans la fouai sait êfficace pouor approfondi ta connaîssance dé toutes les bouonnes choses qué j'chârons pouor l'amour dé l'Onguenné. T'n amour m'a bailli hardi d'jouaie et d'encouothagement, viyant qu'té, man fréthe, as rafraîchi les tchoeurs du peupl'ye du Seigneu.
Ch'est en tchi, ouaithe qu'en l'Onguenné j'piêsse êt' hardi et té c'mander d'faithe chein qu'tu dévthais faithe, au run j'aime mus t'faithe appel par l'amour. Ch'est en man nom à mé, Paul, un vyi et achteu étout prisonnyi d'l'Onguenné Jésû, qué j'té fais appel pouor man fis "Utile", lé chein tchi d'vînt man fis quandi qu'j'a 'té enchaîné. Aut'fais i' t'tait innutile, mais achteu il est utile à té et étout à mé. Jé t'lé renvyie, l'chein tch'est eune partie d'mé. J'éthais aimé l'garder auprès d'mé, à seule fîn qu'i' m'aîgue à ta pliaiche quandi qué j'sis en chaînes pouor la Bouonne Nouvelle. Mais jé n'voulais rein faithe sans tan consentement, dé sorte qu'autchun faveu n'semblyîsse pon forchi mais fûsse volantaithe. Ofûche qu'il avait 'té s'pathé d'té pouor un brîn pouor qu'tu l'r'aie pouor tréjous - pon d'aut' coumme un escliave, mais mus qu'un escliave, coumme un chièr fréthe. I' m'est bein chi mais même pus chi pouor té, coumme un compangnon et un fréthe dans l'Seigneu.
S'tu m'considéthe don un anmîn, atchil'ye-lé coumme tu m'atchil'lais. S'i' t'a offensé ou t'dai tchiquechose, mets-lé sus man compte. Mé, Paul, j'êcris chennechîn d'ma propre main. J'l'èrpaiethai - sans mentionner qu'tu m'dai té-même en tout. Véthe, man fréthe, jé souhaite aver tchique avantage dé té dans l'Seigneu; rafraîchis man tchoeu dans l'Onguenné. En comptant sus t'n obéïssance, j't'êcris, en sachant qu'tu f'thas même pus qu'j'ai d'mandé.
Et acouo eune chose: graie-mé eune chambre, viyant qué j'espéthe pouver vos r'jouaindre, grâce à vos priéthes.
Épaphras, tch'est prisonnyi acanté mé en l'Onguenné Jésû, t'salue. Et étout Mar, Aristarque, Démas, et Luc, mes compangnons dans l'travas.
Qu'la grâce du Seigneu Jésû Chri sait auve vot' esprit!
Viyiz étout: