Les Pages Jèrriaises

Peste! yeux et lus bataille!!



Saint-Où,
Chu 12 Oû, 1907.

Man chièr Moussieu, - Coumme je vos écrit chonnechin, ma main trembl'ye d'êmotion et mes lèrmes tchaient comme la grille dans man pot à encre. Si l'encre né 'tait pon bain nèthe, men êcrituthe essait aussi pâle coumme ma fache.

Car, au train qu'les choses vont, je s'sai ruiné dans bain p'tit temps. J mé vé dêjà pauvre coumme un rat d'égl'yise. - J'espèthe que vos jeunes gens qui font la sîne de n's'aver pas l'français comprendront que je n'pâsle pas d'un church rate.

J'vé dêjà, oh la triste vision! - J'vé dêjà ma propriété grevée d'hypothèques et ma rente - que mes pathents prîndrent chinquante ans à ramasser et qu'j'ai passé toute ma vie à préserver - s'en aller, sièxtonn'yi par sièxtonn'yi, cabot par cabot, quartchi par quartchi.

Et quand j'pense que tout chounna est l'rêsultat d'lus fichue bataille de flieurs, qui n'sert à rein ni à personne, j'pouorrait en plieuther d'dêpiè.

Jamais d'm'a vie n'y'avais tè d'vant ch'tannée, et si n'y'avait yeu qu'à mé, j'n'yéthais jamais mîns les pis. Mais fallit-i pas, l'mais d'Avri passé, que l'Filo, man fils, s'minsse dans la tête de promettre à yun des membres du Comité d'envier une voétuthe à la bataille de flieurs. Il avait bain à faithe, dites-mé. Ah! si j'avais seu tch'est qui s'en allait s'passè...

Mais ne v'la. - L'mousse a dêjà 29 ans et pas un mie d'dêha. Bain à peine s'i peut jamais ergarder une fille en fache sans rouogi coumme un homard bouilli. J'y'en avais même fait tchic erproches le jour qu'il eut 28 ans. Ah ça, qué j'li fis, i faut qu'tu t'y'accouotume, ès filles, i faut; oué-tu? Coumment qu'tu t'mathiêthas si jamais tu n'oses ergarder une fille? Dos à dos, ou à tâtons??

Car enfin, j'tais marri à li, chu buzard, qu'avait laîssi aller toutes les filles de principaux que j'y'avais mîns sous l'nez: Lize Rêté - parce qu'i la trouvait trop grande - biau qu'ou fusse la pus moyennèe d'la paraisse et qu'san pèthe fusse dêjà quasi au nom d'mort; Jane Touzé, parce qu'oul avait la voix un mio rude; - coumme si v'la qu'avait à y faithe quand ou devtha héthiter d'chent-deux vrégies d'terre qui touchent en partie ès nôtres; la grosse Miss Petit, car oul aheucte un mio, biau qu'oul ait des shares siez d'Gruchy et Le Riche, et dans l'Gaz et siez Grégry, et dans l'Grand Hotel. Coumme j'lis dis, Tant mus s'oul aheucte, ou n'pouorra pon t'chanté ma!

D'même, tchic personne y'avait mîns dans la tête que s'il avait une voétuthe à la bataille de flieurs et qu'oul 'tait bain décorée et que ch'tait li qui cachait, il éthait p't'être la chance de faithe bouanne acquointance.

J'li dis qu'i n'était qu'un âne, mais il eut sa tête. J'pathaîtrais bain, m'disait-i en s'd'audlinant, et si une fille me pitchait un tournesolei dans l'yi, ch'la pouorrait m'décider à prendre quothage. Tch'est qu'i sait?

Et ch'est coumme ch'la que l'nom d'Fram, Filo, junior, fut entré pour une vétuthe décorée à la bataille de flieurs. Toute la drainne partie d'Avri, l'Filo n'fit qu'plianter des yillets, et s'mé des pés brantcheurs de toutes les sortes et couleurs, transplianter des dîlieus et des reines marguerites. Il en avait sus les deux fossés tout du long d'la cache et si j'l'avais écouté il éthait même érachi deux groêzilliers pour donner du solei à une monièthe de palme!

Mêcredi matin, don, le v'là qui dêhalle le querre - le neu, si-vous-plaît - et s'met à l'laver. Et tout l'jour i fut à coper du yierrus et à examiner ses flieurs et à dêtwister du wire et à dêmêler des buts d'corde. J'pensais jamais qu'il en finithait. Et les raves qui sont en perdition d'sercl'ye!! Tard dans l'arlevée né vlà une cab qui nos arrive et il en d'valle yunne, deux, trais, quatre, chinq, siez filles! J'en resti tout drôle.

Et né v'la Filo qui s'en va les rencontrer et qui lus halle san chapé!

Hello, qué j'pense, tch'est qui nos veint?

Je l'z'attendais drièthe la fenêtre, mais jé n'fut pas mal surprins d'les vaie toutes haller lus chapiaux - tchi chapiaux - et lus jacket et s'acqu'yuttchi toutes alentou du querre, comme autant d'poules qui font la poudrette!

Bétot les v'la qui prennent des bus d'corde et d'wire et qui qu'menchent à d'ghethotter alentour du querre, tandis que l'Filo, ov ses sécateurs et un serpé, 'tait à abattre des flieurs par le fagot.

Mon doux, qué j'me'dis, comment qui s'y'est prins pour aver tant de d'moézelles à v'enin l'yaidji à arranji sa voétuthe? - Car j'pensais par lus robes et lus dentelles que ch'tait toutes la crême de la crême.

Helas-élas, je n'mé doutais d'ghèthe que man buzard de fils avait écri à une grand' floriste pour qu'ou lis décorisse san querre et que ch'tait nous qu'étions à peyi toutes ches filles là; vethe et la cab étou à un ch'lin par mille de qu'min!

Enfin, ils y furent tous, à chu querre, jusqu'à la nièt toute nethe et même alors ils allumidrent trais ou quatre lanternes et s'entre équiéthidrent. D'vier onze heures - y'avait longtemps qué j'tais au lièt - j'ouï la cab qui s'en rallait ov le cabbee. J'n'en savais rein alors mais i pathaît qu'ils avaient tous yeu un bouan r'pas dans la tcherquéthie - à mes frais! d'vant s'en aller.

Le Jeudi matin les r'véla-t-i pas toutes siez nous dès sept heures! Et oquoth une fais les v'la toutes acqu'yutchies auto du tchéthiot, et du Filo, qu'avait même l'air de s'y plièthe. L'affaithe fut d'même jusqu'à onze heuthes quand les v'là toutes qui rentrent et s'assièvent autou' d'la tabl'ye. J'avais biau ergarder Filo d'en d'sous et li montrer l'armoéthe à pain, rein n'y fit; fallit qu'i fusse à la chiffonièthe ramasser gâches et galettes - i n'yen restit pas! - et du vin, du bouan vin à 20 sous la bouteille que j'avais yeu pour un prix au bazar des Good Tumblers!

Ch'fut une caqtéthie et une brinottetie et une suppethie à n'en pas fini!

D'vier douze heuthes, les v'la qui l'yient la jument dans l'querre qu'était, pour dithe le vrai, fameusement flieuthi. Quand tout fut prêt, l'Filo s'en vint mé qu'si.

J'n'ithait pas, qué j'fis!

Si fait, s'fit-i, j'tai yeu un titchet...

Achocre, que j'li rêponnit, mais pis qu'tu l'as yeu, l'ma est fait, autant vaut y'aller. -Je pensais, naturellement, que les titchets 'taient d'douze sous, ou d'un ch'lin tout au pus. Ch'tait seulement oprès qué j'su qu'il avait quôté chinq ch'lins. Chinq ch'lins! Minzèthe, la valeur de deux fouannées d'pain!

Et nos v'la en ville, sus la neuve route. Mes êfants, y'en avait-i du monde! l'Filo m'condîsi sus l'monièthe de 'chafaud à étages à côté du sien yoù qu'étaient touos les gros bonnets. J'en 'tais assez fi d'abord, mais - chinq ch'lins!!!

Enfin à l'apprèche de trais heuthes, ne v'la la procession. D'abord des p'tites carosses ov des mousses dédans. Je m'disais qu'lus pathents d'vaient être bain moyennés ou bain bêtes pour dêpenser tant d'sous sus d'z'avers à tchi ch'la n'pouvait pon profiter.

Et pis ch'fut des machines. Nou m'dit que v'la tchi peut valer jusqu'à douze ou treize louis la pliéche. Ch'est chi pour un coupl'ye d'rouelles et un mio d'féthaille.

Et pis les querres... Ma fé! y'en avait de biaux. Y'en avait qué l'monde les applaudissaient longtemps d'vant qui vinssent à nous, aussitôt qui viyaient tch'est qu'était d'dans. J'vi un tas d'monde qu'avaient les yeux sus les hardelles et pas sus les flieurs. A vrai dithe l'querre à Filo 'tait un des biaux, pas l'pus bé p'têtre, mais j'plumpi pour li quand même quand ch'fut man tout à voter. Et coumme y'avait deux papiers de vote dans man livre, j'les donni touos les deux. Y'avait un p'tit moussieu à côté d'mé qui m'avait l'air de vouler bain aver y'un d'ches billets-là.

Oprès les querres, ch'fut les carosses. J'vi une fille qui faisait la mine d'ouvrer une cauche, mais sa cauche avait déjà l'pi tout fait et pas l'haut! N'en v'la une hardelle, je m'dis, qui sait probabliément la musique, mais pour ouvrer, n'm'en pâlez pas!

Yen avait une autre, une petite dainty qui r'troussait l'nez en l'air coumme si tout lis puait. Oul tait dans une voétuthe ouèst qu'y'avait des selles et des cannes à lait mais ou'l tait habillyie en mousseline ov un chapé qu'autchune vaque qui s'respecte n'éthait voulu vé appréchi d'yi. et pis il y r'avait des gypsies qui n'm'avaient pon l'air de femmes qu'ont l'habitude de bouoilli touos lus fricos dans la même marmite!

Et pis j'vi la bataille. La pus niaise des batailles. J'gardais m'n'yi sus l'Filo. Il pitchait assez et r'chevait pas mal de p'tits touffès. J'en vit pus d'yune sus l'chafaud lis faithe les doux-yeux. et ma fingre, i n'rouogit pon. J'qu'menchi à r'prendre espéthence.

Oprès chonna j'm'en r'fut, dans le van à nout' vaizin.

* * *

Filo ervint sus l'matin.

Ch'est un d'jabbe faite, malheutheusement. J'di malheutheusement, car n'a-t-i pas té s'engagi à yunne des filles qu'avait grée san querre; une fille de rein, la p'tite d'une grand famille dé tchi l'pèthe 'tait le p'tit d'douze êfants. Une hardelle à jaunes cheveux, ov une petite pale fache et des mains qu'éthaient des poulettes s'ou t'nait bon un manche de bringe à cayas, pour deux minutes.

Vaithe, nos v'la bain l'vés d'aver d'itet alentou d'nous! I lus font mathié en partitchullyi dans huit jours!

Et quand je r'prochi à ch't'âmice là de prendre une fille sans l'sou, il m'rêponnit: Mais ch'est là les siennes qui faut aidji, et j'en ai assez pour nos deux!

Aidji! Assez pour deux!! N'en v'là des bêtises.

Vot' mînzéthabl'ye amin,
Filo Fram, sénior.

Nouvelles Chroniques de Jersey 14/8/1907

 

Viyiz étout:

 

 

Les Pages Jèrriaises