Les Pages Jèrriaises

Un Pais Pour Une Fève


Ch'tait d'vièrs la fîn d'Novembre,
I faisait mauvais temps,
Dé d'pis bétôt treis s'maines
Ch'tait d'la pl'yie à torrents.

Les rues 'taient fondrièthes,
Ch'tait comme dé la buoillie,
Nou z'avait du pité
Jusqu'à la gu'ville des pis.

Les trottoèrs 'taient muchis
Souos uns êpaisseul d'bô!
Pour sorti d'chu temps-là
Fallait quâsi être fos.

Mais yen avait quand-même
Qui n'pouvaient pas sinon,
Faut qué l'z'affaithes se faichent,
Que l'solèt lize ou non!

Eh bein, don! chu jour là,
'Tait oquo l'piéthe de tous;
Ch'tait pité, crotte et mathes,
Y'en avait d'touos les goûts.

L'long d'la sale Esplanade,
Un gros vièr navigant,
En hautes bottes et huilé,
V'nait pativathonnant.

I's'fichait bain du temps
Et des routes en bourbi,
I' n'n'avaient veu bain d'autres,
San Saoù-Ouesteur et li!

Mais ch'est qu'ché n'tait pon d'même
Ov une p'tite démouêselle
Tchi voulait traverser
Avec ses soupl'yes s'melles.

Ou'l 'tait l'long d'la station,
Ses cotillons r'lévès;
A r'garder toute chute vase
D'vant faithe la traversèe.

Not' vièrs mat'lot s'apprèche,
Il est vite prins d'pitchi ;
- Comme touos les navigants
Il a l'tcheu bain plièchi...

Il est à ses côtés
Dans deux-treis engambèes.
Et dans ses deux forts bras
Ou'l est vite catinèe.

I' traverse l'pité
La t'nant à sa brachie,
Et d'lautr' côté d'la route
I' la r'met sus ses pis.

Mais tout lé r'mercîment
Qu'il a pour sa bonté
Ch'est une affreuse cliamuse
Ov le mot: "Affronté!”

Un bouant vièr navigant
N'sé tcheint pas pour battu
Dès qu'i r'ché des talmouses
Même quand i' tchaient si du.

Et pour l'y'apprendre à être
Un p'tit mio pus polie
I' vos r'attrape derché
La garce à sa brachie.

I' traverse une autre fais
La rue, pleine de pité...
Et pis vos la r'cliutte bas,
Ov: “Chutte fais dêpliaque té!”

Elie

 

Viyiz étout:

 

Les Pages Jèrriaises