Les Pages Jèrriaises

Larmor chès preumi S'tembre, 1911

D'jiantre; mé tchi tchitais ma forge pensant avé du r'pos en ville sus mes viers jours... et mé v'chin ichin.

"E'stes-ous la! Mâit' Piteur? s'fit Mercredi passé l'Bos, en entrant siès nous tandi qué j'taimes a dèsjeunné. Bonjour, Mait' Piteur! Ch'est qu'n'év'chin un télégram dé France au sujet d'eunne quémande de chinq chents tounnes de papi d'imprim'thie pour not' gazette, et y nos faut dé suite envié un houmme dé confiance la bas porté les sous et signé l'contrat. Justément, y s'adounne qué je n'peux y'allé, car j'sis pour allé au lanchon d'main-ô-sé ov l'chantnyi d'Saint Sauveux. J'vos envie a ma pliéche; vot' mèstchi d'forgeux et l'accat d'papi - ch'est a peu près la même chose. Né v'chin les sous pour lé papi, et quarante louis pour vos frais dé viage. Né v'la l'nom d'la ville - n'en dites rin pour que l's'autres gazettes né sachent pon nos affaithes. Jé n'sait pon la rue ni l'numétho; mais ch'est la septième rue après avé touônné la carre d'eunne Eglyise à Mormons, et la boutique s'trouve tout près d'eunne femme qui vend des poummes. L'baté d'Cartret sort a sept heuthes ch't arlevée, et j'ai apporté ma 'carpet bag' pour met' unne couplye dé qu'minzes et des cauches. A bétot; r'vénéz l'pus tot possibye."

Pan! Et mé qu'avais vendu ma forge pour avé du r'pos - coumme j'vos l'avais dèja dit! Don: après deux jours dé viage et m'être èsdjéthé très fais sus lus fichus railouais; m'y v'chin! J'ai trouvé la femme a poummes, mais la maison avé changi d'pliéche. Mais coumme j'avais l'nom du marchand, j'dounni un louis a un mousse, et dan un rin d'temps, j'eu accaté man papi, payi comptant (très du chent d'rabat pour mé) et j'm'en fut tcheûté vaie pour eunne fais d'ouiski.

Y fait eunne calheu', ichin! y'a d'belles preunnes a très sous la douzaine; et a man dérni dîné, j'bus pus d'vin que n'en fait, chose seuthe, m'n'houmme d'affaithe jerriais dans un an. Lus beurre ne vaut pas l'sien d'la dairy!

L'Bos oublyi dé m'dithe dé r'véné tout d'un co après l'marchi fait, ch'est-tan-tchi j'reste ichin tant qu'ses cappeurs dueûthont. Allez vée Laïzé et ma fille tchiq'un, et s'y sont a court, prêtez lu un sch'ling ou deux jusqu'a man r'tou.

Piteur Pain
Morning News 8/9/1911


 

Viyiz étout:

 

Les Pages Jèrriaises