|
J'gage qu'il' est dèsjà par les qu'mins Lé chein dé tchi jé veurs pâsler. Qu'i fait sa ronde touôs les matins. Et d'bouann' heure dévant dèsjeûner. I n's'en va pon par la Collette. Pour sé pitchi lé corps dans l'iaûe. Car i n'porte ni “costume” ni serviette. Ché n'est pon s'n'idèe - bein s'en faût! Nan, il' aroute vite hors dé la ville, Hors dé la ville avec san brit. Et va trouver unn' pliaiche trantchille, Dans tchiq' endrait bein à l'abri. Un côti ou unn' vallèe. La ouèqu'y yià gentiment d'bouais. Unn' manière dé p'tite forêt. Ch'est là d'dans qué moussieu s'pliaît! Ch'n'est pon pour y cherchi des nids, Tchillyi prum'nolles, g'zettes, mergots, Ni pour y faire d'la poësie Bein guernie dé biaux doux mots, Qu'au qu'mench'ment du mais d'Avri' Not' houmme va si souvent s'proumm'ner Dans tchiq' vallèe, ou tchiq' côti', Mais ch'est seul'ment... pour èscouter! Escouter tchi? Mais, unn' vouaie d'ouaisai; D'yieun qui nos veint qu'unn' fais par an, Et si par chance not' ammin l'ouaît Dévant tchiq' autre, s'ra t'y content!... San point gâgni, il èscrira A la “Nouvelle” et tout d'un coup, Pour dire ès gens la jouai qu'il a D'être lé prumi a ouï l'Couocou!
|
Viyiz étout: