Les couleurs d'la natuthe

Quand j'sis à m'prom'ner par les c'mîns, j'aime à r'garder la natuthe.

Au r'nouvé, lé ciel est bliu et cliai et i' y'a tchiquefais des nues tchi sont blianches ou grises. L'hêrbe est vèrte, et les fielles étout.

Lé long des fôssés, nou vait un amas d'belles jaunes g'zettes tchi nos font des révéthences dans l'vent. Dans les bouais'sies, les bliuets sont blius parmi la vèrduthe. Les clios d'patates sont couvèrts en plastique et i' sembl'yent eune êtrange mé d'argent. Tout est à r'naître et j'viyons tout en couleu d'rose.

En êté, les muthâles en bouan granit d'Jèrri sont roses, et les lîlas sont biaux. Quand lé solé lit, la leunmiéthe sembl'ye d'or et sus la mé, les rayons font d's èrfliets en argent. Les louêmes sont bliues ou turtchaises ou couleu des cieux, et quand i' s'câssent par sus les bruns rotchièrs, i' y'a des moutons tchi sont touos bliancs.

Sus la grève, lé sablion est jaune ou beige ou couleu d'or ou même argent ou blianchâtre. Les touristes sont à lus solilyi auve des bikinis ou des courtes braies en rouoge ou bliu ou vèrt.

Dans les clios, les chours sont vèrts, les tonmates sont belles et rouoges et lé brécolîn est pourpre et vèrt. Les breunes vaques sont à mangi la vèrte hèrbe. Lé monde, est-i' pliein d'vie et d'couleurs!

Au s'tembre, l'air est pûtôt fraid mais les couleurs des fielles sus l's bouais sont caudes. Nou vait des jaunes fielles, des rouoges, d's êcarlates, d's oranges et des breunes. Les pommes sont rouoges et vèrtes, et i' sont prêtes à faithe lé nièr beurre auve. Au mais d'Novembre, j'avons des feux d'jouaie et nos faches èrlisent rouoges dans la caude leunmiéthe des fliambes, et ' y'a étout des fireworks - rouoges, argents, vèrts, jaunes et oranges dans la nièrcheu.

En hivé, lé ciel est gris et s'i' tchait d'la né, lé monde entchi est blianc et paisibl'ye.

 

 

R'tou à la page d'siez-mé | Back to home page