|
Un jeu qué, de grand marée, j'étions touos ô vraicq, Qué l'temps était bé, et la mé douoche comme du lait; Qué p'tits et grands, pères et mères, jeunes et viers Etions serpe en main, juquis sur les roquiers Varvottant dans les marres, mouillis jusqu'au mitan. V'la que l'âne de Jean Cliu avait perdu san lian Lève les guérets, culbute ses bachots, se met à trotilli Se rouole dans la vase et qu'menche à s'en bailli, Tuonant de gauche à dextre rouolant comme un Pourpé Ch'tai gi de l'vée, les quatre pis en l'air, jé rions com' des Folles D'le vaie ainchi s'vaoutré faisant ses fariboles, Quand tout d'un coup...... Oh! jamais d'ma vie! J'neus tant de peue, ni n'oui d'si horribles cris Au feu! au feu! nous crie, v'là un navire à feu! R'gardez, r'gardez, quoiquine sé que méjeu I brûle, i brûle, i brûle; viyious chute longue traînée Qui s'étend tout du long, ben seure c'hest de la fumée Qu'est qui d'vendront les pouores gens qui sont d'dans. I s' ront touos rôtis comme autant de p'tits tchans, Si nou ne va à lu secou...... Hallo! garçons: Pierre, Elie. Edouard, Tam, Josué, vos v'la touos ébahis. Au lieu de vos t'nin ilô, com' autant de buzards Pière qu'l's oies du bouonhomme Giffard, Couorez donc à l'Etacq et happez quique batté, Et vite hâtous de l'mettre à l'iaoue - prenez-mé la mé. Nous eu biau lus pâler, i z'tais touos enfantômés Pas iun ne bouogeait. Quand iun des garçons S'fit, s'fit-I - A qui bouan prendre nos avirons Chu navire va le diable, et d'vant d'être à la Quérière I s'ra, si va tréjous, bétôt à la Corbière. Attendais, attendais, s'fit Maîte Jean Durville Vaux mus, m'est avis, ben vite queure en ville, Averti les villais qui n'en savent ocuore ren Qu'un navire est à feu dans la baie de St. Ouen. A ch't'idée toute humaine 'liu grand appliaudissement. Et v'la Maîte Jean qui enfrouque sa jument Et qui bétôt vers la ville galloppe et s'émousse, Comme si l'grand Daniel avait té à ses trousses, Au fin feu de galop, le v'la comme Jean Guilpin. Qui perd san chapé au détou du grand ch'min. Arrivé à St. Pierre, touos les tchans du village Qu'nou zérait dit éprins de la finne rage, Queurent après not homme par drière et pardevant, Ouassent, sautent et crient, jamais ditai irchant; Touos les aviers par chu vacarme attirés Déhalent de l'Ecole oué nous l'zavait enviés, Et font des houras qui effritent la jument, Qui prend le mors ès dents, et queurt comme le vent. Fallait la vée en passant le chimetière Comme ou l'vait la quoue et jouait d'la crinière . Maîte Jean tout essoufflié et tout hors d'haleine Passe Biaumont, la Vallée, la Folie Balleine, Arrive à Millbrook et franchit l'Esplianade Et sus sa route eut pus, d'unne escapade. Car touos les Quirquiers atou lus hernais, Riaient cliaquiaient lus fouet et d'sus li tapais; Mais sus l'co de sa bête a mainqui couochi Il arrive enfin près du vier Marchi, Criant: Au feu! au feu! i ya un navire à feu . J'lé veu d'mes propres yers pas pus tard qu'a méjeu. Ren qu'a vée ch't'homme tout dépurant de sueur Neu s'doutit bétôt de quique grand malheur; Avait-i perdu la tête, ou était-i dev'nu fo. Tout l'monde le r'gardait, et ne comprenait mot; Nou l'descendit de sa bête au mitan des villais Qui méchants qui sont, de li, touos se moquaient; Mais ch'fut ben pière oquore quand i put dire pourqui Il t'ait v'nu de la baie jusque près du Marchi! Ch'fut un brouhaha, unne moquerie, des houras, Qui recommenchaient et n'en finissaient pas. Maîte Jean avé biaoue pâlé du navire Touos ches maoudits villais ne faisaient qu'd'en rire; "Mais quand j'vouos dit que j'l'avons touos veu. A St. Ou, chu navire qui était tout à feu, Qu'la fumée en sortait à gros bouoillons......" Personne n'écoutait aucunne de ses raisons. Pouore Maîte Jean ahuri, se torchait la fache, Et faut en convenin faisait laide grimache; Mais quand nous l'iu dit qui s'té donnai ben du ma Pour v'nin en ville éreinter san pouore ch'va, Et qu'le baté qui l'avait creu à feu N'était aut' chose que le premi Stiemeu Qui sans velles, sans avirons, sans vent, sans marée, Va, vint, recule, avanche et prend une bordée, Qui v'nait d'Angliéterre pour la première faie. Maîte Jean manquit sus le pavé de quaîet. Enfin prenant couorage, i juri ses p'tits et ses grands. Qu'les villais étaient pières que de sac .. Normands;.. Et quand le ser i r'vint, déjà tard, siez li, Pour toute récompense de li nou se moquit; Il en eut si honte que dès le lendemain, I disparut d'la paresse de St. Ouen. D'pis chu temps ilô les bouans St. Ouennais Ergardent dé travers les villains villais, I paraissent tréjous être touos peineux Quand nou lu pâle d'chu premi Stiémeux.
|
Viyiz étout: