Je n'sis pon un ouaisé d'môture,
Au vent d'nordés je touanne le dos:
J'trouve qui n'fait nu à la frédure
Ou à être mouolli jusqu'es os.
Je m'pllais bein mus au coin de m'n âtre
Quand i gele et qui quet d'la nèi;
Qu'à avé l'ongli ou bein m'battre:
Je n'me soucie pon d'itai.
Je ne me mets pon fort en peine
De chein que j'mange et chein que j'bé:
Mais que che sait d'qui bouan je l'aime;
Viande, fruit, pain, vin ou café.
Quand je sis lassè je me r'pose;
Je m'promène quand j'sis engniè:
Je m'occupe tréjous de quiq'chose;
Quiq'feis j'écris, quiq'fais j'lliè.
Je n'me gêne pon d'vant qui sait temps;
Je n'sis pon fort prins sus mes nerfs:
Je m'pllais à rencontrer d'bouannes gens,
J'm'amuse quiq'fais à faire des vers.
Quand j'ai tout ch'qui m'faut, qu'jé m'trouve bein,
Et q'i n'y-a rein qui m'cause de gêne;
Pourqui me badrer du lendemain?
A chaque jour suffit sa peine.
UN ST.-LOUORENCHAIS.
|
