|
Je vins de faire un' bein grand' pèrte, La soeu qui m'restait veint d'muorir; La derner' peine qu'est soufferte, Semblle les anciennes rouvrir. Me v'la tout seu de ma famille; J'airai bétôt chinquante neuf ans; Men tou veindra pour la faucille De chein que nou nomme le Temps. Ch'est là le cours de notre vie; Il est conforme à la raison: Que nouz en ait ou pon l'envie, Nou ne dure qu'une saison. Quand arrive la soixantaine, Les pus biaux d'nos jours sont passés; Qu'est qui voudrait aver la peine D'en dscendre derchè les degres? Quand le grain est meûx nou le scie, Quand le fruit est meûx i' quet bas Il en est ainchin de la vie, Nou s'en va et nou ne r'veint pas 18/7/1876 Oulle a eté la bonté même, Pour me oulle avait passé l'feu, La peine qu'je r'ssens est extrême, Ch'est comme à m'en rongire lé cueu. Oulle etait libre ou menagiere Selon le cas et la raison, A lli ou pensais la derniere, Oull' 'tait la Marthe d'la maison. Ou ne me f'ra pus la bein v'nue, Ou n'me dira pus "à bétôt"; Oulle est morte je l'ai perdue, Pour lli oulle est bein mûx la haut. 27/7/1876 P.L. |
Viyiz étout: