|
Que de peine et d'embarras Nou prend pour siere la mode; I' s'rait pourtant bein pus c'mode De ne s'en occuper pas. La mode gouverne tout, Jusqu'à la cope d'la barbe; Le quinquina, la rhubarbe D'pis longtemps ont ieu lus tou. A la fin nouz a mins bas L'ugly et la crinoline; A che-t-heu gaz et parafine Ecllairent partout nos pas. Aut'fais nou saquait du feu Ove un fisé et du tondre; Le soufre que nou faisait fondre Erlisait comme un verpeu. Le temps passè nou couvrait Atou du glli et des lattes; Et nou dêfeut les patates Dans l'meis que nou les pllantait. Avous rmerqui les garçons? Ch'est tréjous ptunner ou bere: Peut-i' y-aver rein de piere; A qu'est qu'i' peuvent être bons? Les hauts talons, le pangnir Qui fait bosse par driere; A qu'est que v'la qui peut pllaire, A qu'est qu'chonna peut servir? Aussi bein les gros chignons; I' semblle que les hardelles Ne peuvent se crere belles Sans s'dêguisir d'tout's faichons. Autfais ch'était un d'shonneu De r'nonchir, faire banqroute; De nos jours personne ne doute Que nou ne s'en faiche un jeu. PL 17/9/1874 |
Viyiz étout: