|
Dé mes tantes j'm'en vais pâler Car j'en ai un vrai fliotchet; Il' ont toutes un caractéthe Sans doute extraordinaithe. Ma tante Loulou est haute et maigre, Parfais sa vouaix est âpre et aigre; Oulle est souvent d'mauvaise heunmeur Et gronne et èrprimande ses soeurs. Ma tante Souky n'est pon comme lyi - Par contre, oulle est douche comme lé myi; À touos les gens ou fait du bein, Car oulle est bouonne comme lé bouôn pain. Ma tante Hélène est à la bouonne fouai, Et passe sans temps à gardinner; Ou n'est: p't-être pon întelligente Mais auve les bêtes oulle est pâciente. Ma tante Mélie est plieine d'ordgi Et dêpense touos ses sou sus lyi; Ou met des bagues sus touos ses dés Et est corlée, peinte et fardée. Ma tante Manon fait tout l'travas Et comme un homme oulle a des bras; Ou n'est pon des pus raffinnée Et des gros mots laîsse souvent tchaie. Ma tante Cécile, hélas, n'est pus - Ch'tait lyi vraîment qué j'aimais l'mus; Touos les sanm'dis jé vais porter Sus sa tombe un bieau touffet. Je n'voudrais pon mes tantes changi, Car auve ieux j'trouve grand pliaîsi. Jé crai, vraîment, qu' j'ai bein d'la chance D'aver des tantes si întérêssantes. |
Viyiz étout: