Né v'chîn eune vèrsion Jèrriaise d'eune partie du sèrvice dé mathiage dé d'dans la Litourgie:
Mes bouonnes gens, j'sommes ichîn acanté l'Bouôn Dgieu et ch't' assembliée à seule fîn d'amather ensembl'ye ch't houmme et chutte femme dans l'saint mathiage; v'là tch'est un êtat d'honneu tchi fut êtablyi par l'Bouôn Dgieu quand les gens 'taient acouo înnouothants, et v'là tchi nos r'présente l'unnion mystique dé Jésû-Christ auve sén églyise. Ch'est l'saint êtat qu'Jésû-Christ approuvit par sa présence à Cana en Galilée quand i' fit san preunmié mithacl'ye. Épis Saint Paul l'èrquémande coumme un honneu pouor touos les gens, et né v'là pouortchi qu'nou n'dait pon décider d'entrer d'dans sans y penser, sans y craithe ni sans s'y fier, ni pouor satisfaithe lé d'si d'la chai nitout, coumme des bêtes tchi n'comprannent d'aut'. Nou-fait, entrez d'dans auve d'la révéthence, auve d'l'heunmilité, auve du souain et auve du respé envèrs l'Bouôn Dgieu, en considéthant tréjous pouortchi qu'lé Mathiage a 'té c'mandé:
Preunmiéthement, l'mathiage a 'té êtablyi pouor aver d's êfants, qu'nou peut êl'ver auve du respé pouor lé Bouôn Dgieu s'lon ses c'mandements, à la glouaithe du Seigneu.
Deuxièmement, l'mathiage a 'té êtablyi coumme un r'miède contré l'péché, et pouor êviter la dêbauche. Viyant qu'i' y'en a tchi n'peuvent pon vivre tréjous à san tout seu, qu'i' lus mathient à seule fîn d'lus garder des purs membres du corps d'Jésû-Christ.
Dèrniéthement, l'mathiage a 'té êtablyi pouor la parchonn'nie, pouor l'aîgue, et pouor lé r'confort mutuel qu'un houmme et eune femme daivent trouver ensembl'ye dans les bouôns temps et dans les piéthes étout.
Viyiz étout: