J'tais un p'tit mousse quand i' 'tait vyi,
et qu' i' m'mettait jutchi sus li,
et là m'disait, dé temps en temps,
chein tchi s'passait y'a pus d'chent ans -
Ah, man grand-péthe!

I' n'savait pas un mot d'Angliais
et n'tait pas trop bouôn en Français,
car ch'n'est qu'en Jèrriais qu'i' pâlait...
Man bouôn grand-péthe!

N'y'avait pas d' "bikes" quand i' 'tait p'tit,
ni d' "train'', ni d' "beusse"; s'il avait ouï
qué dans l'air l'homme pouôrrait voler -
chenna i' n'pouôrrait avaler,
Man brave grand-péthe!

Quand il allait ès entèrrements,
fallait porter eune pathe dé gants,
et sus sa tête un bieau tappeur
si par hasard i' 'tait porteur -
Man bieau grand-péthe!

Dans la Milice i' s'distîndgit
et à tither tchulièrs gângnit,
mais à drilyi i' 'tait failli
et sîmpl'ye soudard i' restit -
Man pouôrre grand-péthe!

I' s'rigalait dé bouôn pain frais,
d'galettes à vrai, dé soupe dé pais,
dé gâche à fouée, d'baînis, d'cap'lain
et dé nièr beurre fait en bachîn -
Man chièr grand-péthe!

N'y'avait pas d'patates dans ses clios,
mais ses navets étaient bein bieaux;
et dé ses pommièrs i' s'vantait
et d'raide bouon cidre tréjous avait -
Man vièr grand-péthe!

Dans la Gâzette nou pouvait vaie
chein tchi s'pâssait dé liain et d'près;
et tch'est qu'disaient les Députés
et cèrtainement liéthe les "Décès" -
Ah, man grand-péthe!

Siez li tréjous y'avait eune trie
tch'était à vendre à bouôn prix,
à iun tchi voulait êt' Chent'nyi
et était prêt à bein payi
à man grand-péthe!

Des bottes et chabots il avait
pouor dans les clios ou dans l'pité,
et au Dînmanche, bein bliatchinnés,
ch'est d's êlastiques tch'étaient portés,
par man grand-péthe!

La dèrnié fais qu'j'm'assis sus li,
i' m'frotte la tête et pis i' m'dit:
"Coumme tu t'êbâle, man p'tit fis ...Dors!"
Mais quand j'dormais - ah, i' 'tait mort!
Adgi, man chièr grand-péthe!

P.W. Luce