Les Pages Jèrriaises

Le Meis de Mai


Le meis de Mai, le meis de Mai,
Y-a-t-i' un mais preferablle?
Cllos et gardîn, côti et prè,
Y-a-t-i' rein d'pus agriablle?
Vive, vive le meis de Mai,
Vive l'amour et la biautè.

Le meis de Mai, le meis de Mai,
Rêjouit toute la nature;
Tout est charmant, tout est parfait,
Tout à l'envi s'transfigure,
Vive, vive le meis de Mai
Meis remplli d'amour et d'attrait.

Le meis de Mai, le meis de Mai,
Comme est que tout se rêville;
Tout est jouaie et gracieusetè,
Tout dans sen pus be s'habille:
Vive, vive le meis de Mai,
Vive l'amour et la gaitè.

Le meis de Mai, le meis de Mai,
Est tout remplli d'esperance;
Opres la fraid le biau solei,
Opres le deu la rejouissance,
Vive, vive le meis de Mai,
De le rveir qui n'a le souhait?

P.L.
10/5/1874


 

Vèrsion modèrnîsée:

Lé Mais dé Mai

Lé mais dé Mai, lé mais dé Mai,
Y'a-t-i' un mais préféthabl'ye?
Clios et gardîn, côti et pré,
Y'a-t-i' rein d'pus agriabl'ye?
Vive, vive lé mais dé Mai,
Vive l'amour et la bieauté!

Lé mais dé Mai, lé mais dé Mai,
rêjouit toute la natuthe;
Tout est charmant, tout est parfait,
tout à l'envie s'transfidguthe,
Vive, vive lé mais dé Mai,
mais remplyi d'amour et d'attrait.

Lé mais dé Mai, lé mais dé Mai,
comme est qué tout s'rêvil'ye;
Tout est jouaie et grâcieuseté,
tout dans san pus bé s'habil'ye:
Vive, vive lé mais dé Mai,
vive l'amour et la dgaîté.

Lé mais dé Mai, lé mais dé Mai,
est tout remplyi d'espéthance;
Auprès la fraid lé bieau solé,
auprès lé deu la rêjouissance,
Vive, vive lé mais dé Mai,
dé l'èrvaie tchi n'a lé souhait?

 

Viyiz étout:

 

Les Pages Jèrriaises