Les Pages Jèrriaises

A M. le Rédacteur de la Chronique de Jersey.

Cher Mousieu l'Editeu. - Samedi l'arlevaie Bella n'avait pon seulement l'tems de mé pasler, car oulle 'tet invitée d'allé ès Tea Rooms. Diantre qu'ou paraissait bin, la garce dans eunne longue fawn casaque et eun chappé trimmé démme foîet d'pieumes. J'ethai bin aimé y avé 'tet ettou, car j'avai mis man neu suit à carriaux, et l'ruoge comforter qué la tante avait accatté au "Bazaar" avec eunne magnifique tasselle de chaque but, et eunne neuve pathe de mittaines, car j'quemmenche déjà à avé des r'fraideuses.

Mais enfin j'pensis que j'la verrais au "Literary" et de même j'm'y en fus de bounne heuthe Lundi, et j'm'étabyi sur eunne belle tchaise en ruoge velous, et j'mis man fait sur eunne à côté pour si j'viais tchitchun que j'connaissais entrer. D'vant longtems tout 'tet choc, et eunne vielle hardelle ov eun chappé d'jeune fille et fache jaune comme du coucou vint s'asseithe là et fianchi tout man fait bas. Si j'avé tet mé à la porte je n'l'ethai pon laissi entrer. Tout m'onde 'tet à rithe ès drôles histhouethe qué l'buonhomme nos yut, et ettou à tue tête.

V'la 'tchi faisait mari chutte vielle, et après eunne bordée qué j'tet quasi lassé d'rithe, ou me fianchi "young man, you seem to like chestnuts." J'fus si surprins que j'cré quasi que j'vins tout ruoge. T'chequi y avai dit qué j'avai eunne p'tite pouchie d'châtaines dans ma pouchette pour Bella. Y fallait qu'ou fusse chorchièthe. J'pensis sérieusement pour eunne minute et pis je debahis ma pouchie et j'dis "help yourself please." "Fool" qu'ou m'dit en me tournant son dos, et mé qu'avai oui qué tuous les villais 'taient si polis, mé chétet eunne drole de herpie chutte vielle lâ.

Et chu chier Doyen nous n'peut l'y erfuser rien et quand y nos demandit tuous ov un smile de dounné des papis sur "Dickens" je décidis de dehaler chès vielles bueus copies de dans not' écrittore et si cheuna l'y fait piasi qué j'honne eunne lectuthe, m'y vla pour Lundi 'tchi vint.

Tout à vous,
P'tit Gras.

Casavitra,
Mardi.

1906

 

Viyiz étout:

 

Les Pages Jèrriaises