Les Pages Jèrriaises

A Mousieu l'Editeu de la Nouvelle Chronique.


Mousieu, - Si ou zêplliètes vot nom comme not Vice-Doyain fait le sien, jé n'vos escrirais pon, car jé n'vouos considézais pon man couosin. Si ou zêtes un Feuvre, jé l'sis étout. Chain qui fait que j'ai prins la hardiesse dé vouos escrize, chest par rapport au jugement qui fut rendu l'aute jeu dans l'affaize du couosin Jn. Mazait. J'aimezais bain, mousieu, qué ou m'diziètes qui différence qui peut s'trouvé entre chutte affaize là et la chaine du couosin D. Chevalyi. I n'ya pas seulement l'ombre d'un doute qué y l'yiavait de l'iau dan le lait des deux. Mais, mousieu, d'où vain-t-i qué le couosin D. Chevalyi ès mins à l'amende et pis d'autes en escape. Le couosin Daine n'avé pon mins d'iau dans san lait, ch'tait sa femme. Jé crai qu'oul en ès bain capablle, car chest une maline pie qué lyi. Est-che pon par la femme qué le péché ès v'nu sus la terre. J'ai ouï dize qué le Bouan Gui fit l'homme et le ---- fit une femme pour le malheu du genre-humain.

Mais l'objet qué j'avais en veue en vouos escrivant, ch'était dé vouos d'mandé si n'sézait pon utille d'avé un Juge angliais à jugir dans l'affaize du lait, piès qu'j'avons un analiste angliais, i m'semblle qué nou pouorait avé "fair play." Nou dit qu'il ès permins de maoudize san Juge pendant 24 heuzes. Eh bain! quant à mé jé n'veux pon maudize le Juge Gibô, car chès man couosin, mais jé nan maoudis pas mains san jugement:- pas seulement mé, mès tout le monde avec mé!

Né v'là chain qué j'gangnions par avé de Jerriais pour Juges, qui sont souosins de nos couosins!

Jé sis, mousieu, vouotre serviteu,
Un Feuvre.
Becquet-ès-Cas, chu 19 Nov. 1884.

 

Viyiz étout:

 

Les Pages Jèrriaises