Y a deux pies tchi hantent nouotre gardin qu'est souos la fénêtre dé la tchuîsinne; i lus mathyîtent lé 14 dé févri, pace qué ch'est là le jour des neuches ès petits ouaîsieaux, et depis ch'la il ont 'té à bâti lus nid dans le haut d'un vèrt tchêne, tchi craît sus le fossé tout près de la maison.
Jé les regardais souvent ramasser des branques dé toutes les sortes, des buts d'orme ou d'épène, même des ronches; quand il avaient chouaîsi une badgette, i la prenaient par lé mitan pour garder lus balanche au vol, et pis i revenaient tout dé suite en ramasser une autre... Quand la forme du nid fut faite, i lus mîntent à ramasser des buts de corde, du papi, de l'herbe sèque et du pité pour coller lé dedans.
A bein près à la fin de mar, lé nid 'tait fini, et sans doute la poule c'menchit à ponre les oeus.
Un bouon jour, men bouonhomme et mei j' taimes à les regarder par la fenêtre ; il 'taient touos les deux jutchis à côté de lus nid, sans doute à l'admither, quand men bouonhomme me demandit tchi qui 'tait le co, et tchi qui 'tait la poule! Jé li dis: "Ch'est bein aîsi de les reconnaître, car lé co est nièr et blianc, et pis la poule est blianche et néthe!" Lé bouonhomme mé félicitit pour être si savante, et i me remercyit pour explyitchi chenna.
Le lendemain, i me criyit : "Vins-ten vite veî, v'là une mauve tchi veint d'attatchi les pies, et ou s'est coulée dans le nid, sans doute pour voler l's oeus!"
Je restîmes à guetter lé nid pour deux-treis minutes, et pis jé li dis : "Jé pensais que tu m'avais dit que les mauves n'allaient janmais dans les bouais..."
I me dit : "Ch'est vrai, ch'la, et je ne comprends pas comment qué chutte mauve-là est venue à faithe d'ité..."
Et je dis : "Je m'en vais arrêter à la vaie en ressorti tandi que t'es à fini ten déjeuner."
Je restis là pour dgix minutes, mais la mauve en sortit pas. Là-dessus, men bouonhomme me dit d'aver pâcienche, pace qué les mauves qui vont dans les nids de pie le matin du preunmié d'avri n'en sortent pas devant douze heuthes.
Ah, sapresti, après ch'la je vous asseuthe qu'un gas qui ne fut pas longtemps à dêcamper, ch'tait li! I débroussit comme un cat tralé, et i ne montrit pas sen nez pour un couplye d'heuthes...
Par chu temps-là, j'avais oublié tout entouor ; mais quand i revint, devant rentrer dans la maison, il envyit sa castchette sus l'aithe. Jé li demandis : "Tch'est l'idée de pitchi ta castchette sus l'aithe?" et i dit : "J'ai fait ch'la pour saver si ch' est seûthetablye pour mei de rentrer: si la castchette peut rester, ch'la veurt dire qué jé peux rentrer!...."
Après ch'la, tout fut bein, et j'eûmes bein du fanne par-dessus!
Mary Bisson
Viyiz étout: