Les Pages Jèrriaises

Job

Chapitre 1, vèrset 3

Et du bestchias il avait sept mille brébis et biches, et trais mille chanmeaux, et mille boeux, et chîn chents ânes, et eune calimène dé sèrvants. Et ch't houmme 'tait pus grand qué touos les fis d'l'Êst.
 

 

Chapitre 1, vèrsets 13-19

Et i' s'adonnit qu'un jour, quand ses fis et ses fil'yes 'taient à mangi et baithe du vîn siez lus fréthe aîné, un m'sagi vînt à Job et dit, "Les boeux 'taient à la tchéthue et l's ânes à mangi acanté ieux et les Sabéens l's assaillîdrent et l's enl'vîdrent, véthe, il' ont sâbré les valets à mort, et y'a raîque mé tch'en êcappis pouor t'apporter la nouvelle."

Coumme i' 'tait acouo à pâler, né v'là acouo un aut' tchi vînt et tchi dit, "Lé feu dé Dgieu a tchée du ciel et fliambé les brébis et les valets et l's a brûlé, et y'a raîque mé tch'en êcappis pouor t'apporter la nouvelle."

Coumme i' 'tait acouo à pâler, né v'là acouo un aut' tchi vînt et tchi dit, "Trais dgaîngues dé Chaldéens assaillîdrent les chanmeaux et l's enl'vîdrent, véthe, il' ont sâbré les valets à mort, et y'a raîque mé tch'en êcappis pouor t'apporter la nouvelle."

Coumme i' 'tait acouo à pâler, né v'là acouo un aut' tchi vînt et tchi dit, "Tes fis et tes fil'yes 'taient à mangi et baithe du vîn siez lus fréthe aîné, et êv'chîn v'là tchi vˆnt un grand vent du d'sèrt tchi capuchit les quat' carres d'la maîson et ou s'êcrouôlit sus les jannes gens et i' sont morts, et y'a raîque mé tch'en êcappis pouor t'apporter la nouvelle."

 

 

Chapitre 5, vèrset 7

Mais la gêne est la destinnée d'l'houmme d'pis sa naîssance, tout coumme les fliambes tchi montent du feu.
 

 

Chapitre 12, vèrsets 7-8

Mais d'mande dé tchi ès bêtes et apprends dé tchi à ieux; ou bein au ouaîth'lîn du ciel, et i' t'l'explyiqu'thont; ou bein ès cheins tchi crapaûdent dans l'aithe, et i' t'bâdront d'la sagesse; et les paîssons d'la mé t'en bâdront les nouvelles.
 

 

Chapitre 21, vèrset 28

Ou dites, "Où'est qu'est la maîson du gouvèrneux et où'est qu'est la tente du malfaiteux?"

 

 

Chapitre 24, vèrset 19

La sicrèche et la caleu heunment les ieaux d'la né: ainchîn les pécheurs lus enfannent dans la fôsse.
 

 

Chapitre 27, vèrset 18

I' bâtit sa maîson coumme eune cahuche et coumme eune tente grée par un portchi.

 

 

Chapitre 28, vèrset 1

Véthe, y'a eune minne d'argent, et eune pliaiche où'est qu'nou raffinne d'l'or.
 

 

Chapitre 38, vèrset 28

La plyie a-t-alle un péthe? Ou tchi qu'a porté les d'gouts d'rôsée?

 

Viyiz étout:

 

Les Pages Jèrriaises