Jérémie
Chapitre 5, vèrset 27
Coumme lé poulaillyi est remplyi d'ouaîsieaux, ch'est qu'lus maîsons sont remplyies d'menneties; né v'là coumme tchi qu'i' sont dév'nus grands et lus sont enrichis.
Chapitre 17, vèrsets 7-8
Beinheutheux l'houmme, tchi s'fie au Seigneu et d'tchi l'Seigneu est s'n espé. Ch'est en tchi i' s'sa coumme un bouais plianté auprès des ieaux tch'êtend ses réchinnes du bord du russé; i' n'étha pon d'peux quand i' f'tha caud car ses fielles es'sont vèrtes; dans eune année d'sicrèche i' n's'sa pon gêné car i' n'arrêt'ta pon d'produithe du frit.
Chapitre 29, vèrset 5
Bâtissez des maîsons et d'meuthez d'dans, et pliantez des gardîns et mangiz-en les frits.
Chapitre 31, vèrset 15
Lé Seigneu dit chennechîn: À Rama nou ouïyait des brais, d'la plieuth'thie et d'la vèrséthie d'fraides lèrmes; Râché lamentait ses mousses; nou n'pouôrra pon souôlagi sa pèrte car i' sont hors.
Chapitre 35, vèrset 5
Et j'sèrvis ès fis des Récabites des dgoudgies d'vîn et des mogues et j'lus dis, "B'vez du vîn!"
Chapitre 36, vèrsets 21-26
Épis l'rouai env'yit Jéhudi qu'si l'rouôlot d'parchémîn et i' l'prînt dans l'appartènement d'Élichama lé s'grétaithe, et Jéhudi l'liut au rouai et à touos l's officièrs tchi 'taient mâtés aupi du rouai. Assa l'rouai 'tait assis dans s'n appartènement d'Hivé (ch'tait l'neuvième mais) l'avant à un radgîn d'feu. Et i' s'adonnait qué châque fais qu'Jéhudi avait ag'vé sa liéthie d'trais ou quat' buts d'texte, lé roua en copit chu but du rouôlot atout sa brioche et l'fliantchait sus l'feu entré-chîn qué tout l'rouôlot fûsse entchiéthement brûlé dans l'radgîn d'feu. Et pouor tout chenna ni l'rouai ni l's officièrs tch'êcoutaient tout chein tchi 'tait liu n'taient gênés, et i' n'êtrilyîdrent pon lus habits nitout. Ch'est en tchi Élnathan et Délaia et Guémaria pliaidgit auprès du rouai qu'i' n'brûlîsse pon l'rouôlot, mais i' n'lus êcoutait pon. Et l'rouai c'mandit à Jérâméel fis du rouai et à Sélémia fis Abdéel d'blioutchi Baruc lé s'grétaithe et Jérémie l'prophète. Mais l'Seigneu les muchit.
Chapitre 50, vèrset 32
Et l'haut-botté a choppé; i' s'est drotchi et i' n'y'étha pon d'souôtchein; et j'ai satchi un feu dans ses villes tch'a brûlé tout à l'entou d'li.
Chapitre 52, vèrsets 12-13
Assa au chîntchième mais, l'dgiêxième jour du mais, d'la dgiêx-neuvième année du règne du rouai Nabu-kudurri-usur, rouai d'Babylonne, Nabuzaradan, lé cap'taine d'la garde, un sèrveux du rouai d'Babylonne, entrit dans Jéthusalem et i' fit brûler la maîson du Seigneu et l'palais du rouai et toutes les maîsons d'Jéthusalem, véthe, châque grande maîson.
Viyiz étout: