J'aim'thais penser tch'i' n'y a qué tchiques années qué j'tais janne mais i' faut qué j'admette qué ch'tait en 1937 qué j'ouvris mes cricots pouor la preunmié fais. Ch'tait un mardi qué j'fus né et j' m'en rappelle cliaithement car ma grand'méthe 'tait à féther dans la tchuîsinne, lé jour après lé lavage du lundi. Véthe dgia, j'ai bouonne mémouaithe et comme ou viyiz j'tais gentiment rêvilyi pouor un p'tchiot dé tchiques heuthes!
Séthieusement à ch't heu, j'veurs vos asseûther qué j'mé souveins dé bein p'tit d'vant l'c'menchement d'la dgèrre et l'arrivée des Allemands tchi lus stâtionnîtent tout à l'entou d'la Ville dé l'Églyise à Saint Ouën. I' prîntent possession d'la maîson à côté dé siez nous pouor louogi les officièrs d'la Compangnie dé l'Ouêst dé l'Île. Après tchiques sémaines lé Commandant du Régiment décidit tch'i' voulait pus d'run et qué Les Frênes, où'est qu' mes pathents 'taient à fèrmer, 'tait idéal pouor lus bésoins.
Un bouôn matîn les v'là tous à la porte ordonnant à man péthe dé clièrgi êtabl'yes et granges et dé dêmênagi au pus vite. Mais ioù aller? Heutheusement j'tais là et j'vîns au s'cours! J'tais au liet souffrant des ouothipieaux et l'docteu annoncit qu'i' n'fallait pas qué j'bouogîsse sus autchun compte. Après un coupl'ye d'heuthes dé négociâtions lé Commandant s'accordit qué deux ou trais appartéments suffithaient. Quand j'm'èrfis d'ma grande maladie les Allemands 'taient bein satisfaits dé chein tch'il'avaient et j'n'eûmes pon bésoin dé r'muer.
Pouor eune fais malheu apportit bonheu!
Brian Vibert
Viyiz étout: