| Sonia est assise dans sa chambre à s'poudrer et ou pathait bein à s'n aise. Barbara crie et entre a but d'vent. | |
| Barbara: | Est-tu prête pouor chès fichues neuches-chin, Sonia? Damne j'n'y connais rein d'chennechin! |
| Sonia: | Oh, j'sis à m'graie. Assieds-té eune minnute. Tu pathais toute êchèrvelée! |
| Barbara: | Ch'est d'ta faute! Tu m'as envyié un texte sus man téléphone dé m'mettre prête pouor aller à des neuches et dé t'rencontrer ichin à eune heuthe et d'mie! |
| Sonia: | Né t'en fais pas, j'avons tout pliein d'temps. Mais pouor té calmer, j'm'en vais aller m'changi. |
| Ou sort dé la strade. | |
| Barbara: | Mais tu m'as pas dit tchi qui s'en va s'mathier! Oh, oulle est horte et j'n'y connais rein. |
| Ou ramasse la gazette qu'est sus la p'tite tabl'ye et s'met à liéthe: | |
| Et bein mince, j'vais que les jannes Viberts ont ieu des jumiaux – deux garçons - danme les vièrs s'en vont être contents car i' y a des sous dans chutte fanmille-là! Oh! et la bouonnefemme Betsy du Marais est morte à l'hôpita. Chent ans! Tchi belle âge! Quand tchi qu'est l'enterrement? Ah Mêcredi à deux heuthes. I' faut qué j'y âge! Et not' vier Connêtabl'ye à passé l'pas étout. I' n'en a pas ieu longtemps après sa Missis! I' s'en va m'faller eune neuve robe pouor s'n enterrement, jé n'peux pas aller à deux enterrements avec la même robe. Acouo des dépends! | |
| Sonia entre. | |
| Sonia: | Barbara, tché qu't'en crais? |
| Barbara: | Chest-i' té? Mais tchi qu' tu t'en vas mathier? Tan fichu Tom a tout l'temps dit que sa méthe né voulait pas qu'i't'mathîsse! |
| Sonia: | Eh bein, la bouonnefemme mouothit hier arlevée! L'homme d'affaithes vint et i' liu lé testament et tout est à Tom. I' s'en vint couorrant ichin et i' me d'mandit dé l'mathier aniet par license spéciale et j'dis oui!! |
| Barbara: | Mais Sonia, ch'est-i' dommage que tu n'est pas d'âge d'aver d's êfants viyant que lé Tom a tant d'sous achteu! |
| Sonia: | Ma fille, tu t'rappelle bein que j'fus au Cannada pouor neuf mais quand ma soeu eu un p'tit garçon - chest lé mousse à Tom et mé. Ma soeu et s'n homme l'ont êl'vé mais i' sait bein que j'sommes ses vraies pathents. La bouonnefemme n'en a janmais seu rein, d'ga! |
| Barbara: | Oh man Doue d'la vie, tch'est qué l'monde s'en vont dithe? |
| Sonia: | I' s'en vont être contents dé vaie lé Tom et sa femme et san garçon à l'enterrement d'la vielle pie - je crais! |
| Barbara: | Sonia, j'pense qué j'm'en vais m'évanhi! Tes ségrets sont trop pouor ma constitution! |
| Sonia met d'ieau d'vie dans deux verres. | |
| Sonia | Prends deux p'tits d'gouts! |
| Barbara: | Mais nannin. Janmais d'la litcheu n'a passé mes lèvres! |
| Sonia: | Ch'est d'la méd'cinne! Avale-la! |
| Barbara l'avale d'eune gorgie! | |
| Barbara: | Sais-tu bein Sonia, je m'sens bein mus! |
| Sonia l'y en donne eune autre et Barbara l'avale. | |
| Sonia: | Achteu, j'sommes-t-i' prêtes? |
| Barbara s'lève et s'trouve un mio êtourdie! Ou suit s'n amie. | |
| Barbara: | J'shie prête pouor tes neuches Shonia, J'shie prête!! |
Viyiz étout: