Les Angliais nouos ont envahis! Y'a Longtemps qu'jé L'savons bein, sans doute, mais chein tchi m'amûthe hardi et d'aut's vrais Jèrriais comme mé, Moussieu - enfîn, Les deux'trais d'nous tchi restent mais tch'ont 'té ichîn L'tou pouor ilo pus d'huit chents ans - véthe, chein tchi nouos amûthe, ou viyiz, ch'est qué n'en v'là toute eune braichie, dé ches dgéthets tch'ont 'té parmi nous p'tit mio pus d'chîng minnutes, à compather, tchi r'cliâment qué Les Mielles ch'est "Our bay". Sémnâge, n'en v'là don d'tchi faithe èrléver nouos vielles gens!
Tant qu'à nous j'n'avons pon décidé entouor nouos Mielles, tch'est qu'nou dait en craithe. Ch'est en tchi, n'y'a pon d'temps pèrdu. Mais, m'est avis qué ch'est pus à co à nous à dithe tch'est qu'en est et tch'est qu'en s'sa. J'allons p't-êt' nouos êmoûtchi iun d'ches jours, valet! Mais, bein seux, ch'est qu'parmi touos ches "horsains" (en Anglais "outsiders") y'en a tch'ont un mio d'êducâtion et l'filet bein copé. Et nous, dgiâtre, jé n'savons pon grand'chôthe, sinon qu'j'ayons nouos vielles traditions et nouot' manniéthe dé vivre - et j'y t'nons hardi. Et ch'est acouothe à nous, chu Jèrri, pouortant, et ches Mielles de St. Ouën, qué j'avons parcouothu pouor des généthâtions. Ah véthe, boustre d'mêtchi, ch'est à nouos à dithe, ma fîngre, acouothe au but du compte. I' faut dithe, dgia, qué parmi touos ches êtrangièrs d'Angliais, i' y'en a d'raides bouons. Mais, quand nou-s-a 'té si p'tit d'temps dans un pays, i' faut aver êgard à chein qu'nou dit et n'pon s'êcatchi d'la manniéthe. Eh don, nou n'peut qu's'en motchi gentiment, dé touos ches gens-là.
Eh bein, m'est avis qué chette-chîn est p't-êt' la preunmié lettre qu'ous éthez ieu, Moussieu l'Rédacteu, d'la part d'un vrai Jèrriais atout un vièr nom Jèrriais. Y'en étha-t-i' d'autre? Nou vèrra. Et pis, ah ça - des "St. Ouen's Bay"! Ch'est en mé, ch'la. V'là tchi n'a rein à faithe auve - Les Mielles. Véthe, mouon Doue d'la vie, j'en sommes bein amûthés. enfîn, jé sis tout à fait d'accord dé prêsèrver toute chutte grande êtendue à tout janmais.
Dr. Frank Le Maistre,
La Brecquette,
L'Etacq,
St. Ouen
JEP 31/5/1977
Viyiz étout: