San Antonio,
Texas, USA.
Lé 17 dé mar, 1979.
Moussieu l'Rédacteu,
J'veins d'èrchéver la gâzette dè Jérri du onze dé janvyi. La cheinne du quatre dé chu mais-lá n'est pon couo v'nue. J'espéthe qu' ou n'a pon 'té pèrdue dans la né qué j'vai dans les portraits qu' la gâzette nouos montre. Jérri, bé dans autchun temps, est acouo pus bé - si ch'là est possibl'ye - quand il est couvèrt dé né d'même. J'm'èrsouveins qué j'eûnmes quâsi autant - dans l'hivé dé 1946-47 quand j'tais là. J'm'étais r'tithé d'affaithes ichîn en Améthique et j'avais crouaîsi l'Atlantique en avion pour la preunmié fais dans l'mais d'août pour aller en Jèrri.
J'fais l'trajet dans eune affaithe dé sept heuthes dé Detroit (en Michigan) à Londres à ch't heu, mais en 1946 j'feûnmes quatre heuthes en vol dé Montréal à Gander Bay en Tèrre Neuve, huit heuthes exactément par dessus la mé dé là à Prestwick en Ecosse, et deux heuthes dé Prestwick à Londres - quatorze en tout. Ch'est vrai tch'i' faut considéther qu' à ch't heu nou fait l'viage dans les gros avions à réaction “Jumbo 747 jets” des compangnies British Airways et Pan American tchi portent quat' chents pâssagièrs.
En 1946 la deuxième grand' dgèrre v'nait d'finni et les lîngnes aéronautiques avaient fait partie d's armées des airs à la dgérre et n'avaient pon 'couo ieu l'temps d'organiser lus commèrce dé pâssagièrs en temps d'paix et lus trajets ès pays du monde par dessus la mé.
Y'avait quand même tant dé d'mande pour viagi par les gens tch'avaient des pathents en Europe et tchi n'avaient pon ieu la chance d'aller les vaie pour chînq ans ou pus à cause dé la dgèrre qué lé Trans-World Airlines dé chu temps-lá avait acaté un avion “Lancaster” du “Royal Air Force” et avait transformé lé “bomb bay” d'l'avion en quartchi pâssagi. Y'avait du run pour huit pâssagièrs, et j'eus la chance d'en êt iun pour lé viage à Londres. J'eûnmes un mangnifique pâssage de huit heuthes dans eune belle niet d'plieine leune que j'n'oubliethai janmais.
Ch'tait man preunmie pâssage par dessus la mé en avion. J'en ai fait tant d'pis qué j'n'y prends pon pus d'avis qué si j'm'en allais dé Gros Nez à Gouôrray.
Ch'est dans l'caractéthe humain d's'accouôteunmer à tout. Quand j'pâle dé la bieauté d'Jèrri souos eune couoche dé né, j'pense à mes preunmiéthes années pâssées au Cannada, et les vîngt-trais préchaines pâssées dans l'Etat d'Michigan ichîn en Améthique quand nou 'tait dans la né touos l's hivièrs et qu' nou n's'en faisait pon d'bile. Auprès la preunmié surprînse à la dêcouverte que nou n'pouvait pon faithe des balles dé né atout, viyant qu'étant g'lée et poudreuse ou vouos pâssait l'travèrs des dés, nou c'menchait à oublier qué ch'tait un grand pliaîsi d'en faithe quand nou 'tait mousses. Et quand nou-s-a à vivre avec si longtemps, nou-s-oublie sa bieauté. Ou d'veint du pité souos les pids et dans les rues à cause du boulant tchi pâsse dessus, même auprès qu' les tchéthues à né aient pâssé pour les clièrgi, et nou-s-attend fête dé r'vaie la chaleu et l'bieau solé du r'nouvé et d'l'êté.
En liêsant la gâzette, j'vai qué l'Conmité “PAC” d's Etats a un nouvieau président - Messire Robert Mathet. J'sis bein content dé l'vaie à la tête dé chu conmité-là, et j'sis seux tch'i' s'en va faithe un mangnifique président. Jé n'sai pon si les membres d'à ch't heu 'taient dans l'vièr conmité, mais i' m'sembl'ye qu' avec les Mêssieux Cyril et John Le Mèrquand, et Binnington, Jeune et Dupré à balanchi l's idées des nouvieaux membres (nou peut tréjous s'attendre qué les jannes nouvieaux aient d's idées progressives), lé conmité dév'thait aver du pards dans ses manches et dans L's Etats à ch't heu. S'i' peut mênagi à arrêter l'înmigrâtion en temps pour empêchi l'Ile d'êt' entchiéthement couvèrte d'chînment et d'maîsons il étha gângni l'èrconnaîssance du p'tit nombre d'vièrs Jèrriais tchi restent.
Eune chose tchi m'fait pliaîsi est d'liéthe qué l'Bureau des Postes ne s'en va pon renchiethi l'tîmbrage des lettres en Jèrri et pour l'Angliétèrre. Né v'la un exempl'ye qué j'n'avons pon rêussi à siéthe en Améthique, où'est qu'la renchiéthe est l'ordre du jour. Jé s'sais quâsi d'idée d'înviter l'Sénateu Shenton à v'nîn à Washington lus montrer comment lus y prendre à faithe la même chose!
George d'La Forge
Viyiz étout: