Fort Lauderdale, Florida,
U.S.A.
Lé 9 de févri, 1974.
Moussieu l'Rédacteu,
M'èrvélà au bieau solé d'la Floride où'est qué lé thèrmomètre mèrque entre 80 et 90, tchiquefais pus, quâsi touos les jours, chein tchi fait les gens tch'y d'meuthent penser tch'i' fait fraid quand i' d'vale à 60 dégrés - et v'la tchi s'arrive dé temps en temps, sustout dans l'hivé. Ouaithe qué j'sis l'pus liain d'Jèrri quand j'sis 'chîn, j'mé considéthe un pas pus près d'man r'tou dans l'Île pour l'êté car, d'ichîn, l'préchain pas es'sa l'Michigan et l'Cannada - et pis Jèrri. Eune fais l'mais d'févri pâssé, l'hivé s'en îtha p'tit à p'tit et lé r'tou en Jèrri appréch'cha vite. J'sis absolûment chanceux d'pouver lé r'vaie touos l's ans dans ma vieillèche, nouot' pétit pays natal!
J'veins d'èrchéver quat' gâzettes dé Jèrri dans l'couothant d'eune sémaine, les cheinnes du 29 novembre et des 6, 13 et 20 d'dézembre, 1973. Ch'est tréjous eune grand' fête pour mé quand il' arrivent, ches gâzettes-là. En les liêsant, i' m'sembl'ye èrvivre un mio les jours pâssés dans l'vièr Mènage quand j'sis là, et nou trouve des pliaîsantes nouvelles aussîn bein comme des tristes tch'annoncent lé pâssage d'anmîns au r'pos êtèrnel.
Parmi les bouannes est l'chouaix d'Moussieu Wilfred Tomes pour êt' Connêtabl'ye d'St. Jean, un charmant moussieu tch'est seux d'faithe honneu à sa chèrge. Mes félicitâtions! Et quandi qué j'sommes à St. Jean, i' faut féliciter Moussieu l'Révérend Peter Manton et sa danme à l'occâsion d'l'annivèrsaithe dé lus neuches d'argent. V'la tchi m'a fait pliaîsi d'vaie lus portrait à côté d'la supèrbe hôlouoge dé grand-péthe qué la congrégâtion d'l'églyise pâraouîssiale lus a fait présent. Auve Moussieu Tomes et l'Révérend Manton à la tête des affaithes municipales et ecclésiastiques dé la pâraisse, et ch't' hôlouoge-là dans l'probytaithe à mèrtchi l'pâssage du temps, St. Jean dév'thait aver un av'nîn réglié, paîsibl'ye et prospéthe.
J'vai tch'i' y'a ieu eune êlection à Grouïlle étout, et j'tais content d'vaie qu' les Grouïllais ont donné eune grand' mâjorité d'vouaix au Chent'nyi Gaudin pour lî pèrmett' d'aspither à faithe 50 ans d'sèrvice. Eune ambition admithabl'ye et un modèle pour les jannes à siéthe. En mème temps j'ai r'gret d'vaie l'Chent'nyi S. R. Le Brun êt' battu auprès aver donné tchînze ans d'sèrvice à sa pâraisse. L'rêsultat d'l'êlection est un drôle d'èrmèrcîment pour ches années-là, mais i' faut tch'i' y'aie dans l's êlections, et iun d'nouos vièrs ditons nouos dit qué l'chein tchi sèrt lé publyi sèrt un îngrat. Enfin, i' faut souhaiter bouanne chance au nouvieau Chent'nyi Bannier.
Ch'n'est pon souvent qu' nou r'garde la gâzette sans vaie la triste nouvelle des décès d'anmîns ou d'pèrsonnages qué nou connait. Chutte fais, ch'est l'Juge Richard D. Lloyd, un moussieu affabl'ye, sans ordgi et d'grand' capacité, et l'Sieur George Jenne Mouothant d'St. Sauveux. Acouo deux bouans vièrs Jèrriais au grand r'pos. L'Sieur Mouothant, comme touos les Mouothants qu' j'ai connus, 'tait un charmant corps. Janmais j'n'oubliethai la preunmié fais qué j'rencontris l'Juge Lloyd et tch'i' c'menchit à m'pâler en Jèrriais. Étant bein pus vyi qu' li, jé n'l'avais pon connu dans man janne temps et j'fus surprîns d'ouï un homme du nom d'Lloyd pâler l'Jèrriais. Il 'tait consèrvateur dans ses idées, et j'tions d'accord au sujet dé n'pon piplotter les malfaiteurs comme en est la tendance ches jours.
À la fîn des fîns j'vai des nouvelles au sujet d'l'Eisteddfod. La gâzette du 29 novembre nouos donne lé compte-rendu du concèrt, mais j'n'ai vei rein de tch'est tchi gangnit la Coupe des Enfûntchis. Si ma mémouaithe né m'trompe pon, i' m'sembl'ye qué la coupe est l'prix pour les gangnants d'la piéche dé thiatre en Jèrriais. Et l'temps pâssé les gangnants jouaient lus piéche à l'occâsion du concèrt. Chutte fais j'n'en vai autcheun mention dans la gâzette. Pourtant, i' m'sembl'ye qué les St. Ouënais 'taient en train d'pratitchi lus piéche quand j'tchittis Jèrri pour m'en r'vénîn en Améthique, et i' d'vait y'aver d'aut' pâraisses à faithe la mème chose.
En pâlant d'St. Ouën, tchi honte dé vaie l'amas d'vièr fé, d'vièrs motos et d'tchèrfouonn'nie tch'a fait un fourbi d'partie d'la campangne tchi longe Lé C'min du Moulîn et La Verte Rue à l'Êta. Y'en a un portrait dans ieune des gâzettes. Ch'est honteux tch'i' y'a des gens tch'ont assez p'tit d'avis pour avraûni la campangne dé mème, et i' méthitent d'êt' présentés d'vant Justice. Mais j'pense bein qu'la police est forchie dé l's attraper au d'lit d'vant pouver l's arrêter.
La gâzette du 6 d'dézembre nouos montre un mangnifique portrait du Docteu Fraînque Le Maistre à r'chéver san Doctorat à Caën. J'lé félicitis dans ma lettre du 29 dézembre, 1973, mais jé n'peux pon m'empêchi dé l'faithe acouo eune fais. Et j'sis content d'vaie l'portrait d'mes bouans anmîns l'Abbé Le Légard et l'Député Ph'lippe de Veulle à ses côtés. Né v'la trais întellectuels dé souche Nouormande tchi rêunissent l'esprit culturel dé la Nouormandie Continentale et Însulaithe!
George d'La Forge
Viyiz étout: