En Nouormandie
L'Abbaye de La Lucerne, Normandie.
Lé 24 d'août, 1974.
Moussieu l'Rédactéu,
Dans tchiques jours d'ichîn j'èrséthai en Jèrri, dans l'tîntamarre dé la vie d'touos les jours dé nouot' pétite Île envahie par les touristes. J'dis l' "tîntamarre" car ichîn, à l'Abbaye d'La Lucerne, règne "La paix du Bouân Dgieu tchi dêpâsse tout entendement", comme nouos l'dit l'Minnistre en prononçant la Bénédiction à la fin du sèrvice dé La Sainte Cène quand j'sommes à l'Églyise dé St. George à St. Ouën en Jèrri.
Ichîn, nou peut aisiêment oublier l's êvenéments tchi troubl'yent tant d'parties du monde dé nouos jours, la dgèrre en Chypre et tchi continnue, maugré la paix dêcliathée, au Viet-Nam, l's escarmouches meurtriéthes entre Palestiniens terroristes et l's Israëlites dans l'Mouoyen Orient, les meurtres en Irlande au nom d'la religion, et les meurtres tchi sont dév'nus quâsi eune affaithe dé touos les jours dans les grandes villes dé l'Améthique du Nord et les saisissements d'innocentes pèrsonnes comme ôtages par des terroristes et malfaiteurs pour gangni lus objets politiques ou d'mauvaîtchi dans l'Améthique du Sud. Et les bombes pliaichies dans cèrtaines villes et aéroports d'Angliétèrre par les fanatiques tchi souôtchiennent l'Armée Républyicaine d'Irlande.
À m'n idée, toute chutte tragédie est deue au fait qu' les gens ont oublié l'Bouân Dgieu, et la vie ichîn à l'Abbaye est si paîsibl'ye qué, dans l'calme dé la belle campangne, la bieauté des bouais et des clios et des bestchieaux à paître trantchilement dans lus pâtuthes, nou n'peut qu' vaie et penser à la glouaithe du Grand Architecte dé l'Univèrs et admither Ses travaux. Et quand la vouaix solonelle des cloches dé l'églyise dé l'Abbaye appellent lé monde à la priéthe et au chant d'Ses louanges, ch'est comme si nou ouiyait la vouaix des Anges vouos d'mandant d'entrer dans l'sanctuaithe pour dithe mèrcie au Criateur et Péthe Céleste pour toute chutte bieauté, et pour la jouaie d'êt' en vie pour joui d'touos Ses beinfaits. Et les louanges dé Ses Minnistres et d'Ses êfants, chantant ensembl'ye lé "Sanctus" dé la Messe le matîn et l' "Magnificat" des Vêpres à la fîn du jour sont comme eune feunmée d'enchens tchi monte au Ciel pour Lé r'mèrcier et Lî rendre grâces.
A Bricquebec Dînmanche pâssé, l'dgiex-huit du mais, j'eus l'honneu d'èrchéver l'"Prix Littéraire du Cotentin" des mains du Député Pierre Godefroy du Département de La Manche, et en présence d'un tas des pèrsonnalités distîndgies d'la Nouormandie, pour man livre "Jèrri Jadis". J'veurs prandre ch't' occâsion pour èrmèrcier l'Docteu Frank Le Maistre et Madanme Le Maistre, l'Député P. M. de Veulle et Madanme de Veulle, Moussieu Louothains Huëlin, Ségrétaithe du Don Balleine, Madanme W. Macready, Ségrétaithe dé La Société Jersiaise, et Madanme Mavis de la Haye et Mad'mouaîselle Henriette de Veulle, èrprésentant L'Assembliée d'Jèrriais, pour aver prîns la peine d'êt' vénus spécialement d'Jèrri à Bricquebec pour l'occâsion. Et j'èrmèrcie, étout, lé Professeu Vilquin, d'Nouormandie mais tch'était à Londres, d'êt' vénu pour êt' auve nous. J'lus sis bein èrconnaîssant.
La preunmié fais qu'j'avais 'té à Bricquebec 'tait en 1912 quand l'Avocat Edmund Toulmin Nicolle m'emm'nit auve li faithe eune touânnée en Nouormandie auve nouos machinnes à pédales. J'vînmes à Carteret par un p'tit baté pâssagi. J'm'èrsouveins qu' nouot' preunmié arrêt fut ès Pieux, et qu' j'eûnmes eune mangnifique omelette à mangi pour diner l'sé, et qué ch'tait la preunmié fais qu' j'en avais mangi ieune.
J'm'èrsouveindrai tréjous d'chu bieau viage-là tch'était ma preunmié vîsite dans la belle Nouormandie. L'Avocat Nicolle 'tait hardi întérêssi dans l'archéologie, et ch'tait eune êducâtion dé l'ouï pâler ès Tchuthés des vielles églyises qué nou vîsitait en c'min. Et j'en vîsitînmes tout pliein, d'vielles églyises, car dans nouot' touânnée j'allînmes ès Pieux, à Flamanville, lé Nez d'Jobourg, lé Cap dé La Hague, Chèrbourg (où'est qué j'vis l'estatue d'Napoléon tchi pointe auve san dé en direction d'l'Angliétèrre!), St. Vaast-la-Hougue, Quettehou, Valognes, Bricquebec, et d'èrtou à Carteret où'est qué j'rencontrînmes lé Juge Alfred Messervy, et j'dînînmes auve li à s'n hôtel dévant r'prandre lé baté pour Jèrri.
J'pensais à tout chu temps-là quand j'tais dans l'Églyise dé Bricquebec Dînmanche pâssé à la Grand' Mêsse, assis auve mes bouâns anmîns d'Jèrri, et dans m'n esprit j'èrmèrciais l'Bouân Dgieu pour m'aver accordé l'privilège d'èrvisiter chu bieau p'tit coin souoxante-deux ans auprès la preunmié fais. En même temps, reunminnant à mé-même, j'pensais au fait qu' un bouân Moussieu comme l'Avocat Nicolle, au-fait, distîndgi et savant, n'avait vêtchu qué jusqu'à l'âge dé chînquante tchiques années, et j'mé d'mandais si ch'tait raisonnabl'ye quand, comme si ch'tait eune rêponse à mes pensées, l'Abbé Lelégard, lé célébrant d'la Mêsse, c'menchit à chanter l' "Pater Noster" et j'pensis en mé-même: Dépis qué j'Lî dîsons. à Notre Père, "Que Ta volonté soit faite sur la terre comme au Ciel" ch'n'est pon à nous d'la tchestchionner, Sa volonté!
George d'la Forge
Viyiz étout: