Abbaye d'La Lucèrne,
En Nouormandie.
Lé 30 dé juin, 1973.
Moussieu l'Rédacteu,
Comme Papa mé l'disait souvent quand j'tais mousse : Y'a bein des temps dans la vie, et j'peux dithe à ch't heu tch'i' y'a bein d'difféthentes pèrsonnes et d'opinnions étout. Par exempl'ye, à m'n idée, les lettres du Révérend Peter Manton, Recteu d'St. Jean, sont bein à point. I' r'présentent mème mes opinnions pèrsonnelles. Comme mé, i' r'grette lé manque dé disciplinne dans la vie actuelle, et i' n'aime pon un tas d'changements dans les sèrvices dé l'Églyise. J'sis absolûment dé s'n avis. Dans man cas, sans doute, les gens peuvent dithe : “Bah! I' r'dote, lé bouanhomme George! Et ch'n'est pon ravissant, à s'n âge!” Il' éthaient p't êt' raison car j'mé sis souvent d'mandé, à mé-mème, si jé c'menchais à r'doter - sustout quand j'oublie où'est qu' j'ai mîns mes leunettes et tch'i' sont sus l'but d'man nez!
Man fréthe Sydney, tchi d'meuthe à Ottawa, au Cannada, m'envyit des papièrs du Diocèse d'Ottawa et d'l'Églyise Anglyicanne du Cannada en général. J'soulais les donner au Révérend Tabb, dé mémouaithe respectée, viyant tch'il avait 'té ordinné Diacre et Prêtre au Cannada. Quand j'vai, dans ches papièrs-là, des portraits d's Êvêques au Synode habilyis en civil à la pliaiche d'aver la dgène et l'habit ecclésiastique que j'ai connu comme l'habit d'l'homme appelé à part par lé Bouan Dgieu pour célèbrer La Sainte Cène et les sèrvices dé S'n Églyise, i' m'sembl'ye tch'i' manquent dé respé pour lus profêssion “sacerdotale”.
Un tas d'monde disent tch'il a la tête cratchie, Moussieu Manton, Et bein, si ch'est d'mème, il est grand temps tch'i' y'en aie un tas, d'têtes cratchies, dans l'monde. Né v'la un cas où'est tch'i' y'a hardi d'difféthentes opinnions. Nou-s-en vai la preuve dans les lettres env'yées au Rédacteu d'la gâzette. Mais v'la tchi n'pathaît pon lî faithe dé peux. Piêsse-t-i' continnuer à sèrvi l'Bouan Dgieu et ses parouaîssiens, et faithe san bouan travas pour lé bein d'Jèrri. J'ai r'mèrtchi qu' cèrtaines églyises ont prînt patron sus li et tch'i' sont à aver des Fêtes dé Flieurs. V'la tch'apporte des sou dans l'trésor, et i' n'faut pon oublier qu'ch'est l'Recteu d'St. Jean tch'a donné l'exempl'ye.
J'ai r'mèrtchi, étout, tch'i' y'a d's annonces toutes les s'maines donnant l's heuthes des sèrvices dans lé “St. Brelade's Group of Churches” mais i' n'y a qu' deux églyises mentionnées - l's Églyises Anglyicannes et Méthodistes. Pourtchi pon l's Églyises Catholiques Romaines et la Sŷnnagogue dé Tabor? Né v'la tchi f'thait un vraie “Groupe” dépis tch'i' sont dans la pâraisse dé St. Brélade étout, et ché s'sait un vraie group oecuménique et un bel exempl'ye pour toutes les pâraisses dé l'Île.
Eune chose tchi m'fait grand pliaîsi quand j'veins en Jèrri est d'vaie la propriété d'nouos églyises. Dans chu temps modèrne nou n's'attend pon à vaie l'ouvriyi trop en peine dé travas. Ch'est pûtôt eune affaithe dé gangni autant qu' possibl'ye pour lé mains possibl'ye d'main d'oeuvre. Ch'est don mangnifique dé vaie qu' les cheins tchi souangnent dé garder l's églyises propres en font eune supèrbe tâche. V'la tchi m'fait penser tch'i' prannent un întéthét spécial dans chu travas-là viyant qu'ch'est la Maîson du Bouan Dgieu sus la tèrre, et qu' lus êffort est, en êffet, eune contribution à San sèrvice.
Au sèrvice annuel dé L'Assembliée d'Jerriais Dînmanche pâssé ch'tait mangnifique dé r'vaie un tas d'amnîns tchi m'font tréjous la beinv'nue. J'èrmèrtchis, quand-mème, qué l'nombre d'pèrsonnes tchi vont à chu sèrvice-là dînminnue touos l's ans. Nou peut dithe qué ieune des raîsons est qué l's anciens dispathaîssent un mio à la fais à m'suthe tch'i' s'en vont au r'pos êtèrnel. J'en vai la preuve touos l's ans. Lé troubl'ye en est qu' les jannes né les rempliaichent pon. Quand j'aîdgis à fonder L'Assembliée en 1951 j'avions eune dgaîngue dé jannes enthousiastes, mais comme les pathents d'à ch't heu n'apprannent pon l'Jèrriais à lus êfants nou n'peut pon s'attendre qué ches êfants-là s'en vont janmais prendre d'l'întéthét dans l'existence et la continnuation d'L'Assembliée tchi fut formée pour prêsèrver, par touos les mouoyens possibl'yes, la langue dé lus anchêtres.
Comme jé l'disais pus haut, y'a d'difféthentes opinnions dans toutes choses. Eune Jèrriaise (tchi dév'thait saver mus) m'disait l'aut' jour : “Pourtchi apprendre l'Jèrriais? À tchi qu' ch'la sèrt? À rein, dépis qu' nou peut s'exprînmer en Angliais!” Eh bein, nouos y v'la. Ch'est la mode dé pâler l'Angliais. Quant à me, i' m'sembl'ye qué la vie est bein pliaîsante quand j'peux m'èrnarder pour eune volée touos l's ans dans la maîson d'mes anchêtres, faithe du feu dans la grande âtre, marchi les vielles rues et les clios dans tchi qu'les anciens d'ma fanmile tchi n'sont pus ont tant vressé dans l'temps jadis, et bavarder auve les vièrs accoints dans nouot' ancienne langue Jèrriaise!
George d'La Forge
Viyiz étout: