Trenton,
Michigan, USA.
Lé 30 dé mai, 1981.
Moussieu l'Rédacteu,
"Un crapaud peut-i' faithe du ma à pèrsonne?" jé d'mandis à Papa eune séthée quand j'tions au pid du feu auprès l'thée.
"Nannîn, man garçon," i' m'dit, "i' sont absolûment înnofensifs, les crapauds. Y'en a tchi craient tch'i' peuvent vouos êclyichi du v'lîn dans l's ièrs si nou les digote dé trop près, mais ch'est eune crianche tch'est absolûment înmaginnaithe."
"Tch'est qu'ch'est qu'du v'lîn?," j'lî d'mandis.
"Ch'est d'la pouaîson," i' m'dit. "Y'a cèrtaines tchilieuvres et des sèrpents - comme lé sèrpent à sonnettes - tch'en êclyichent dans la mordeuse en mordant, et ch'est probabliément ch'la tch'a fait cèrtains craithe qué l'crapaud peut faithe la même chose, mais ch'est à tort dé l'penser. I' n'est pon capabl'ye dé faithe dé ma à personne, ni d'en empouaîsonner."
"Pourtchi qu'les filles en ont peux, don?", j'lî d'mandis. "En r'vénant d'l'êcole, iun des grands garçons en a trouvé iun l'long du fossé à Trodez. I' l'a l'vé dans sa main et a fait la minne dé l'mett' dans la pouchette du calobre à ieune des filles. Ou s'est mînse à faithe des cris comme s'il 'tait à l'assommer. J'tions auprès d'la Vielle Maîson et Mess Coutanche a ouï les cris et est v'nu vaie tch'est tch'est 'tait la cause. Il a fait des rouaux au garçon et li'a dit tch'i' n'faut janmais êffriter les filles ni faithe dé ma à un crapaud."
"Eh bein," s'fit Papa, "Mess Coutanche a raison. I' pathaît tch'i s'en va êt' iun d'nouos préchains Chent'nièrs, et i' faudra qu'les garçons souangnent dé lus comporter comme i' faut en pâssant par siez li.
"Mais ch'est naturel pour les filles d'en aver peux, des crapauds, probabliément viyant tch'i' sont si laids, les pouôrres dgiâtres. Les femmes en ont généralement peux étout. Dans la dêfouithie y'en a tout pliein dans les clios, et l'dêfoueux s'abuse tchiquefais à en pitchi où'est qu'les femmes sont à êtèrrer souotre la frouque ou à gliainer dans les randes. V'là tchi les fait faithe des cris et lus mârri contre lé dêfoueux. Mais j'ai r'mèrtchi qué ta m'mèe n'en est pon êpeuthée, lyi. L'aut' jour j'la vis en ramonter iun dé d'dans l'pits. Ou mînt sa main dans l'sieau souos l'crapaud et lé l'vit hors du sieau dans l'bel. Lé crapaud, tout content, s'en fut dans l'gardîn.
"Il est fanmeux, nouot' crapaud," Papa continnuit. "Y'en a d'la même race en Angliétèrre, pathaît-i', mais l'nouotre est pus gros. Et i' n'y'en a pon en Dgèrnésy, en Sèr, ni en Aur'gny. Ch'est à cause dé ch'la qu'les Dgèrnésiais appellent les Jèrriais des Crapauds. Lé Jèrriais prend sa r'venge en appelant les Dgèrnésiais d's Ânes, probabliément viyant tch'i' y'en a bein pus en Dgèrnésy qu'en Jèrri. La ville dé St. Pièrre Port a un tas d'êtraites pétites rues en amont, et l's ânes sont fanmeuses pour porter marchandises ou fardé amont ches p'tites rues.
"Mais, r'vénant à nouot' crapaud. Il a donné san nom à d's objets tchi n'sont pon d's annimaux ou bêtes. Par exempl'ye, ch'est l'nom qu'nou donne à la fourchette du chabot d'un j'va, ouaithe qué nou l'appelle tchiquefais lé p'tit pid. Un cèrtain paîsson est appelé un crapaud d'mé. Et y'a un vièr griffon appelé un crapaud. Nou n'lé vait pon souvent à ch't heu, mais y'en a acouo tchiques-uns par les c'mîns.
"Les manniéthes d'êcraîssances ou bosses tchi craîssent sus les bouais sont tchiquesfais appelées des crapauds.
"Et sa laideu n'l'a pon empêchi d'êt' mentionné dans nouos vièrs ditons. Y'avait même un jeu d'aut'fais appelé jouer au crapaud mais jé n'pouôrrais pon t'dithe comment qu'nou-s-y jouait. La pé d'crapaud est si duthe et si rude qué rein n'peut y subsister, ch'est en tchi quand un homme est bein pauvre nou dit: 'Il a autant d'sou comme un crapaud a d'puches!' En êté, quand nou reste d'but tout à fait tard au sé, nou dit: 'Il a resté d'but jusqu'ès p'tits crapauds.' Quand eune fille a d's ièrs tchi pétil'yent, ou qu'oulle est manniéthement rêvilyie, nou dit: 'Oulle a d's iès comme des crapauds d'mielle.'
"Mais j'vai qu'tu c'menches à aver Thomas dans les cricots, man garçon. Oublions les crapauds à ch't heu. Il est temps d'nouos en aller dans l'rouoyaume des Taupes."
George d'La Forge
Viyiz étout: