Fort Lauderdale,
Florida, USA.
Lé 20 d'janvyi, 1979.
Moussieu l'Rédacteu,
Quand nou-s-est à l'êtrangi nou-s-a tréjous envie d'èrchéver des nouvelles dé Jèrri. Ou-s-avez sans doute èrmèrtchi que j'mé pliains souvent qué j'peux couôrre pus vite qué les transports dé lettres tchi prannent au mains un mais, tchiquefais siez s'maines, à v'nîn d'Jèrri. Eh bein, comme nouos l'dit l'vièr diton, à tchiquechose malheur est bouan, et dépis qué j'vouos êcrivis y'a eune sémaine j'ai r'chu trais gâzettes, les cheinnes des 23 et 30 dè novembre et du 7 dé dézembre. J'en ai-t-i', don, d'tchi liéthe!
Comme d'habitude, ch'est les décès tchi c'mandent priorité, car quand nou dêpasse octante ans nou sait bein qu' nou c'menche à châtchi (prîncipalement quand nou dêhale les longues-veues et qu' nou vait qu' nénante n'est pon bein liain!). Chutte fais j'vai acouo des connaîssances et d's anmîns tch'ont pâssé l'pas et tchi sont au r'pos êtèrnel, entr'autres lé Docteu et Sénateu Avarne et l'Révérend Edwin Albert Dentith.
J'n'ai pon l'honneu d'pouver dithe qué j'connaîssais Moussieu Avarne întinmement. J'eus l'honneu et l'pliaîsi d'châtchi d'main auve li et d'pâsser la séthée en sa compangnie dans l'Pavillon d' “West Park” eune séthée en août, 1946, quand sa charmante fille Rozel (pus tard Madame Maitland-Harford) m'învitit à aller à eune danse dans l'Pavillon pour célébrer la fête du “Jersey Progressive Party”, dé tchi Moussieu Avarne 'tait iun des grands. Jé v'nais m'èrtither d'affaithes dans l'temps et j'tais en visite en Jèrri et j'ouiyais tout l'monde lé loûser à plieine couôtuthe, nou peut même dithe jusqu'ès nues!
J'avais rencontré Mdlle. Rozel Avarne siez un docteu à Chatham, Ontario, Cannada, où'est qu' san p'pèe l'avait env'yée à l'êcole pour êt' en seûtheté duthant la dgèrre en Europe. Chose assez drôle, quand j'allis dans la gal'lie publyique dé la Chambre d's Etats pour ouï les débats tchiques jours auprès m'n arrivée dans l'Ile, j'mé trouvis assis à côté d'lyi, et ch'tait d'même qué j'fus învité à la fête du Parti Progressif.
J'connaîssais l'Révérend Moussieu Dentith gentiment bein et j'ai r'gret d'vaie san décès dans la gâzette, prîncipalement quand l'Eglyise est si à court dé minnistres en Jèrri. I' n'y'a pon d'doute qué l's églyises d'a ch't heu manquent d'înspither les jannes d'êt' minnistres. Quand j'tais à St. Simon d'vant la preunmié dgèrre, au mains quat' dé ma connaîssance dans ch't églyise-là lus présentîdrent pour chutte sainte vocâtion et d'vîndrent les Révérends Gordon Hibbs, Percy Lobb, Raymond Hornby et Thomas Ronald Godfray. I' n'y'a qu' Moussieu Hornby tch'est du nombre des vivants. Mais j'liêsais dans la gâzette du 16 dé novembre qué Moussieu l'Vice Douoyen Peter Manton dît au Synode qué y'a un triste manque dé “postulants” pour la prêtrîse Anglyicanne et tch'i' y'a dangi d'aver à freunmer cèrtaines églyises si l'affaithe n'amende pon.
A tchi point d'folletéthie qué j'sommes arrivés? Un înmense agrandissement d'populâtion mais trop p'tit d'maîsons pour la louogi. Et l'run en Jèrri raptiche à m'suthe qué l's autorités însistent d'en bâti pus. J'liêsais dans la gâzette du 7 dézembre qué lé “Economic Adviser” considéthe tch'i' s'en va faller quat' mille maîsons d'ichîn 1987 et qué v'la tchi r'présente dé la bâtithie sus huit chents à mille vrégies d'tèrre. Et i' sont à couvri 195,000 pids carrés d'tèrre auve du vèrre à St. Louothains. I' n'y'étha pus d'tèrrain à l'ouvèrt si l'affaithe continnue. Et ch'est à m'n idée, eune tragédie qué la grand' partie des maîsons bâties avau l's années n'sont pon otchupées par des vrais Jèrriais. Et des pèrmins d'bâti sont souvent accordés à d's êtrangièrs, tchiquefais des spétchulateurs, et qu'les Jèrriais ont d'la peine à l's aver.
Mais pour èrvénin ès décès. J'vai qu'un aut' vièr St. Ouennais, Francis Rault, est décédé à l'âge dè nénante ans. Acouo un mio d'St. Ouen dispathu. Et eune vielle anmie à Montréal n'est pus - Mdme. Henry John Renault, née Louisa Ann Michel, aut'fais dé “Wheatlands” à St. Pièrre, à l'âge dé 94 ans. Dans l'temps qué j'tais Ségrétaithe du Connêtabl'ye L'Feuvre à St. Pièrre, j'allais ès partis à “Wheatlands” dans les temps d'Noué. La fanmil'ye Miché, comme toutes les vielles fanmil'yes Jèrriaises, 'tait hardi hospitaliéthe et nou pouvait tréjous s'attendre à du bouan rêvillon ès partis d'Noué.
Henry Renault et sa femme vîndrent en Jèrri sus l'même baté qu' mé et Fraînque, j'crai qué ch'tait en 1922, auve l'idée d'y rester pour bouan, mais i' n'taient pus à lus aise dans l'Ile et r'vîndrent démeuther à Montréal. Henry mouothit y'a tchiques années. Lé nombre d'Jèrriais au Cannada à ch't heu nés en Jèrri, dînminnue à grands pas.
George d'La Forge
Viyiz étout: