L'Êpitre ès Galatchiens
Chapitre 1
Dé Paul, un apôtre tchi n'a pon 'té envyé ni par des hoummes ni par un houmme, mais par Jésû l'Onguenné et Dgieu l'Péthe tchi l'souôl'vit des morts - et d'touos les fréthes et soeurs acanté mé, ès églyises dé la Galatie:
qu'la grâce et la paix vos saient baillies par Dgieu not' Péthe et l'Seigneu Jésû Chri tchi s'donnit pouor nos péchés à seule fîn d'nos saûver du mauvais âge d'achteu, s'lon la volanté d'not' Dgieu et Péthe, à tchi qui sait la glouaithe à tout janmais. Âmen.
J'sis ravi qu'ous êtes si dêliêment pouor èrnonchi l'chein tchi vos a app'lé à vivre dans la grâce dé l'Onguenné et vos dêtouônner à eune aut' bouonne nouvelle - tchi n'est pon en tout eune bouonne nouvelle. À chein tchi pathaît y'a tchiqu'uns tchi sont à vos trélûther et êprouver à renvèrtchi la bouonne nouvelle dé l'Onguenné. Mais même ni nous ou un m'sagi du Ciel veindrait prêchi eune bouonne nouvelle tch'est difféthent d'la cheinne qué j'vos avons prêchi, qu'i' sait maudit du Bouôn Dgieu! Coumme j'avons dêjà dit, j'vos l'èrdis achteu: si tchitch'un vos prêche eune bouonne nouvelle tch'est difféthente dé la cheinne qu'ous avez r'chu, qu'i' sait maudit du Bouôn Dgieu!
Achteu j'sis-t-i' à chèrchi la faveu d's hoummes ou du Bouôn Dgieu? Ou j'sis-t-i' à êprouver à pliaithe ès gens. Si j'tais tréjous à êprouver à pliaithe ès gens, jé n'sais d'aut' un sèrvant d'l'Onguenné.
J'voudrais vos faithe assaver, mes fréthes et soeurs, qué la bouonne nouvelle qué j'prêche né veint pon d's hoummes. Jé n'l'ai ni r'chu ni apprîns d'autchun houmme; j'l'ai r'chu pus à co d'eune révélâtion d'Jésû Chri.
Ch'est en tchi ous avez ouï pâler d'coumme tchi qué j'soulais vivre dans l'Judaïsme, et d'combein sévéthement qué j'soulais pèrsétchuter l'églyise du Bouôn Dgieu et êprouver à la dêtruithe. J'tais avanchi dans l'Judaïsme pus d'bein d'gens dé m'n âge, et 'tais entchétchinné pouor les couôteunmes dé mes péthes. Mais quand i' pliut au Bouôn Dgieu, tchi m'cârrit d'la bielle dé ma méthe et m'app'lit par sa grâce, dé m'dêmuchi san Fis à seule fîn qué j'pûsse lé prêchi parmi les païens, jé n'm'mîns pon à consulter autcheune pèrsonne. Jé n'mé ramontis pon à Jéthusalem pouor vaie les cheins tchi 'taient d'a apôtres d'vant mé, mais j'm'en fus en Arabie. Et pus tard j'èrvîns à Damas. Trais an pus tard, jé ramontis à Jéthusalem à seule fîn d'm'accouainter auve lé Rotchi et d'meuthit siez li tchînze jours. Jé n'vis fis d'âme des aut' apôtres, raîque Dgémîn l'fréthe au Seigneu. J'vos asseûthe l'avant au Bouôn Dgieu qué jé n'vos êcris pon des menn'ties.
Épis j'm'en fus en Sythie et Cilicie. Les églyise dé Judée tchi sont dans l'Onguenné né m'connaîssaient pon d'fache, mais en ouîdrent lé rapport: qué l'chein tchi soulait nos pèrsétchuter est achteu à prêchi la fouai qu'i' 'tait pouor dêtruithe. Et i' glorifiaient l'Bouôn Dgieu par cause dé mé.
Chapitre 2, vèrsets 15-16
Nous tchi sommes des Juis par naîssance et pon des Païens pécheurs savent qu'eune pèrsonne n'est pon justifiée par les oeuvres d'la louai, mais par la fouai en Jésû l'Onguenné. J'avons, nous étout, mîns not' fouai en Jésû l'Onguenné pouor qué j'séyons justifiés par la fouai en l'Onguenné et pon par l's oeuvres d'la louai, par cause qué fis d'âme né s'sa justifié par les oeuvres d'la louai.
Chapitre 2, vèrset 19-Chapitre 3, vèrset 9
Ch'est en tchi par la louai j'sis mort à la louai à seule fîn qué j'piêsse êt' vivant au Bouôn Dgieu. J'ai 'té clioué à la crouaix acanté l'Christ et ch'n'est d'aut' mé tch'est vivant mais l'Christ tch'est vivant en mé, et la vie qué j'sis à vivre dans la chai est qué j'vis atout la fouai, la fouai du Fis d'Dgieu tchi pouor l'amour dé mé s'donnit pouor mé. Jé n'mets pon à rein la grâce dé Dgieu, par cause qué si la justice veint par la louai, lé Christ mouothit pouor rein.
Peûles qu'ous êtes, Galatchiens! Tchi qui vos a enchorchélé? Ou savez bein qu'Jésû Chri fut clioué à la crouaix; rêponnez-mé don raîque chennechîn: Ch'est-i' qu'l'Esprit vînt à vous par l'adgèvement d'la louai ou par l'êcout'tie d'la fouai? Êt'-ous bêtes dé même? Ayant c'menchi dans l'Esprit, vos'n'all'-ouos ag'ver tout dans la chai. Av'-ous êcanchi tant d'tchi pouor rein faithe, s'ou n'faites rein en êffet? Eh bein, l'chein tchi vos envyie l'Esprit et fait des mithacl'yes parmi vous, fait-i' chenna par l'adgèvement d'la louai ou par l'êcout'tie d'la fouai? Coumme Âbréhan criyait en Dgieu et chenna lî fut accompté coumme la justice, viy'-ous don qu'les cheins tchi craient d'même sont les fis d'Âbréhan, et l's Êcrituthes, en prédîthant qu'lé Bouôn Dgieu justifiêthait les païens par la fouai, dêcliathîdrent la bouonne nouvelle à l'avanche à Âbréhan en dîthant, "Touos les païens s'sont bénis en té." Et né v'là pouortchi qu'les cheins tchi craient sont bénis auve Âbréhan tch'avait creu.
Chapitre 5, vèrset 1
Ch'est pouor la libèrté qué l'Onguenné nos a libéthé. T'nez bouôn don et n'vos laîssiz pon suffâtchi souos l'joutchet d'l'escliavitude.
Chapitre 5, vèrsets 2-25
Attendez-mé! Mé, Paul, jé vos dis qu's'ou vos laîssiz coper l'fouôrré, l'Onguenné n'vos sèrvitha d'rein. Et acouo eune fais j'dêcliathe à châque houmme tchi s'laîsse coper l'fouôrré qu'il est oblyigi d'obéï la louai entchiéthe. Vous tch'êprouvez à êt' justifiés par la louai avez 'té cârrés d'l'Onguenné; ous avez tchée hors d'la grâce. Ch'est en tchi par l'esprit j'espéthons entchéthinnêment par la fouai la justice tch'est not' espé. Ch'est en tchi en Jésû l'Onguenné n'y'a pon d'valeu ni dans la cop'thie ni dans la gardéthie du fouôrré. Tout chein tchi compte est la fouai tchi s'exprînme par l'amour.
Ous avez bein couothu. Tchi qu'i' vos a dêladgi pouor vos empêchi d'obéï à la véthité? Chutte manniéthe dé pèrsuâsion n'veint pon du chein tchi vos appelle. Un mio dé l'vain lève toute la pâte. J'ai la confianche dans l'Seigneu qu'ou n'craithez pon autrément. Mais l'chein tchi vos embliûtre, létché qu'i' sait, en portétha la peine. Mes fréthes et soeurs, si j'sis acouo à prêchi la cop'thie d'fouôrré, pouortchi qué j'sis acouo pèrsétchuté? La hannicroche dé la crouaix a don dispathu! Pouor des embliûtreurs, j'voudrais qu'au run d'lus coper l'fouôrré, i' lus copent entchiéthement.
Vous mes fréthes et soeurs fûdrent app'lés pouor êt' libres. Mais n'faites pon sèrvi vot' libèrté pouor accompli lé d'si d'la chai; au run, sèrv'-ous vos-mêmes les iuns et l's aut' humbliément dans l'amour. Ch'est en tchi la louai entchiéthe est cont'nue en gardant chutte quémande-chîn: "Aime tan vaîthîn coumme té-même." S'ou vos mordez et vos d'vouothez, mêfi'-ous sénon ou s'sez dêtruits l's uns par l's aut'.
J'vos dis don: marchiz s'lon l'Esprit, et ou n'accompliéthez pon lé d'si d'la chai. Ch'est en tchi la chai d'sithe chein tch'est contraithe à l'Esprit, et l'Esprit chein tch'est contraithe à la chai. I' lus entr'-opposent dé sorte qu'ou n'faichyiz pon cheint qu'ou voudrêtes. Mais s'ous êtes ménés par l'esprit, ou n'êtes pon souos la louai.
Les actions d'la chai sont êvidentes: la foutot'tie, l'împuth'té et la dêbauche; l'idolâtrie et la chorchell'lie; la haine, lé d'saccord, la jalousie, l'èrgolinne, l'ambition, l'hèrtchîn, les divisions, et l'envie; l'ivrouongn'nie, lé tinné et tout chenna. J'vos dgèrnis coumme jl'ai fait d'vant qu'les cheins tchi lus comportent dé même n'héthit'tont pon l'rouoyaume dé Dgieu.
Mais l'frit d'l'Esprit est l'amour, la jouaie, la paix, la charité, la toléthanche, la bouonté, la fidélité, la douocheu, et la tempéthanche. Contré d'itelles choses n'y'a pon d'louai. Les cheins tch'appartcheinnent à l'Onguenné, Jésû, ont clioué à la crouaix la chai auve ses pâssions et san d'si. Viyant qué j'vivons par l'esprit, gardons l'pas auve l'Esprit. Né séyons pon ordgilleurs, en nos entré-tempêtant et nos entr'-enviant.
Chapitre 5, vèrsets 13-14
Ch'est en tchi, mes fréthes, ous avez 'té dêhalés à la libèrté. Tout coumme né faites pon sèrvi vot' libèrté pouor vos abuser à la chai, mais auve l'amour entré-sèrv'-ous. Car toute la louai est accomplyie atout chennechîn, coumme nou dit, "Aime tan vaîthîn coumme té-même."
Chapitre 6
Mes fréthes et soeurs, si tchitch'un est happé dans un péché, vous tchi vivez par l'Esprit dévthaient rêtablyi ch'tî-là douochement. Mais mêfi'-ous, et n'séyiz pon tentés vos-mêmes. Portez l'suffat l's uns d's aut', et d'même ou rempliéthez la louai d'l'Onguenné. Si tchitch'un crait qu'il est tchiquechose qu'i' n'est pon, i' s'trompe. Châtchun dévthait souôb'ser ses propres actions. Épis i' pouôrra s'glorifier pouor li-même, sans s'compather à tchitch'un d'aut', ch'est en tchi châtchun dévthait porter san propre suffat. Tout coumme lé chein tchi r'chait d'la duithie dans la pathole dévthait chârer tout chein tch'est bouôn auve san duitheux.
N'vos trompez pon: nou n'peut pon s'motchi du Bouôn Dgieu. Un houmme tchil'ye chein qu'i' sème. Lé chein tchi sème pouor pliaithe à sa chai, tchil'la d'la destruction d'la chai; l'chein tchi sème pouor pliaithe à l'Esprit, tchil'la la vie êtèrnelle dé l'Esprit. Né séyons pon lâssés d'faithe lé bein, ch'est en tchi au bouôn moment j'tchil'lons eune récolte si j'n'èrnonchons pon. Dé même, quand j'avons l'opporteunité faîthons l'bein à tout l'monde, sustout ès cheins tchi sont membres dé la fanmil'ye des criyants.
Viyiz coumme tchi qu'i' sont grandes les lettres qué j'êcris atout ma propre main!
Les cheins tchi veulent faithe eune împression s'lon la chai sont pouor vos forchi d'coper l'fouôrré. Ch'est raîque pouor n'êt' pon pèrsétchutés pouor la crouaix d'l'Onguenné. Même les chein au fouôrré copé n'gardent pon la louai, tout coumme i' veulent qu'ous ayiz l'fouôrré copé à seule fîn d'cratchi entouor la chai. Que jé n'craque janmais sénon dans la crouaix dé not' Seigneu Jésû Chri, par tchi qu'lé monde a 'té pouor mé clioué à la crouaix et qué j'l'ai 'té pouor lé monde. Ch'n'est rein d'aver l'fouôrré copé ou gardé; chein tchi compte ch'est la neuve criâtion. Qu'la paix et la mînséthicorde saient à touos les cheins tchi gardent chutte règl'ye, et à l'Israël du Bouôn Dgieu!
Qu'la grâce dé not' Seigneu Jésû Chri sait auve vot' esprit, mes fréthes et soeurs! Âmen.
Chapitre 6, vèrset 8
Lé chein tchi sème pouor plaithe à sa chai, d'la chai tchil'la la ruinne; lé chein tchi sème pouor pliaithe à l'Esprit, d'l'Esprit tchil'la la vie êtèrnelle.
Viyiz étout: