|
Salut Moussieu l'Âisditeu! Salut tout l'monde Qy'un châ'tcheun ri à s'naise et qu'persounn' grounne J'airvains occûo ch'tannaîe tout respé vos portant Vos âicrithe chounn'chein, en né sus du byians. Si y'ia tchiqu'zuns à tchiqu' j'pouôrrais m'fié Je s'sais bain content l'histouèthe lus raconté Car ch'nest pon la pâine d'âitre coléthes ou mâris Lorsqu'inn' s'agit qu'd'eun boug'd parap'yïe. Mais! si j'tais saeûx, qu'au'tcheunne persounne j'offens'sais J'aim'thais mûs marchi les kmèins sans mes braïes, Car toute persônne qu'a eune morcé d'râison Avouô'tha qu'nou na pas tréjous eun parap'yïe à la maison. Seull'ment! j'veux môtré ouést qu'p'tite chose peux allé Et dguerni m'zenmeins de bain lus en mâifié, Naccattëts pon d'parap'yïes preincipal'ment au Sam'di Devant qué d'lyiéthe l'histouéthe du vyiër Flip Mâougi. L'bouanhoumme Flip étët' eun houn'nête houmme Pas mentaeûx ni mâime volé persounne, C'hest pourt'chi pour lis porté eun miot d'respé, Âicoutons l'histouéthe, tchi s'en va nos raconté. Ou viyis chounn'chein ou l'prendrëts pour eun jeu Occûo bain qui' n'yieûse pas eun pus fort feu, Mais si j'lâissons l'bouanhoumme Flip s'expli'tchi Bâsyions li eunne chance et i s'en va k'menchi. Ch'tait eun Sam'di dans les huit' heuthes du sé, J'gaba'thions ensembl'ye, mé et ma pouôrre vielle Malhé, L'temps tët si âipais et i t'chi'yet tant d'pyïe Qu'ou' n'tet pon en seuth'tet sans eun fichü parap'yïe. Eun parap'yïe, j'en avions yieu longtemps bésouain, Et mé t'chi pensais que n'yiavait pon grand souain, Mais tout d'mâime l'temps veint que Malhé m'dis Fichons l'camps en ville accatté un parap'yïe. P't'âitre que tchiq'zeuns dithont qué j'sis juthaeûx Mais en pardoun'nant je n'lus f'thai pas d'paeûx Ou viyïs c'hest not manié'the à mé et ma feamme J'y soummes su habituëts que j'n'y trouvons pas d'fanne. En sortant d'siès nous j'avais dit à Malhé Lève tés cotiyions, car y' ia du puté, Bah! Tu m'embaîtes, se fit alle toute mârie, J'fi'llons tout drét par amont la Colombrïe. Quand j'feummes arrivëts âupi d'Mess d'la 'Mathe N'en v'la eunne raide achie qui t'chet à clyiaqu'dathe, Malhé boulle dans l'gotteur, sa caoûche toute moûoyie Et m'feu eune groûn'nie pour eun bouig 'd'parap'yïe. J'lis dis S'set trân'tchille et porte mé r'pos Les geans nos byiêink, partout et ris en drièthe d'not dôs Ou nâites qu'ueun rain tchi vâille fini ou m'dis Ergardëts toûs les geans ov tuôs lus parap'yïes. Les parap'yië n'ou dit qu'chest eunne grande c'moditet Et mé j'ai d'âicouërt que ch'nest qu'eunne boûstr 'd'sall'tet Car a toûos m'zenmeins I faôut que dâiclyia'the Que j'navions pas d'parap'yïe âupi d'Mess d'la Mathe. Mé tché'tais hôntaeûx je n'savais y'iou m'fouôrré Quand' j'vi eunne telle raccachie d'monde à l'entou d'mé J'enrainchi ma feamme, de d'dans l'pus fort du bourbi Et lis dit Vétan vite, j'ithons siès Freïnk Valpi. Tu peux avé là, tout ch'qui yia du miyieu Depis d'zabits d'neuches, jusqu'a d'zabits d'deu Véthe mâime. Câsaques, veste et bräies Et si tu peux t'laffaôurdé, eun parap'yïe d'souaïe. L'dgiâb'ye vôs bat au mains ou m'dît Quand nou pâle de souaïe pour mettre en parap'yïe Allons pus y'ien, j'îthons siès l'ptit Heanmon Et la j'en éthons yieun tchi s'sa âircouërt en cotton. En passant Mess Parpas'yion âupi d'Snow Hill Ne v'la ti pas eunne ein'fernale achïe d'grille J'daihalle ma montre pour vés l'heuthe tchil 'tët Et dans eun clyïn 'dyi l'verre fut câsset. Eunne feamme me d'mande, T'chi l'heuthe est'ti? Mais j'mapperchu bain que d'mé ou voulai s'motchi J'lis dis Missis Bilo' Brème ne m'enbâitëts pon Ou zêtes bain ordgui'yieûse ou' vot parap'yie d'coton. De vrai' ou m'dit Mait Flip y n'vos manqu' pas d'affront De pâlé d'mâime contre les parap'yïes d'cotons Ou dev'thâite pus tôt couôrre siès l'bouanhoumme Gavët Érfaithe mettre eunne ôzainne a vot' vier navet. Man tânpéthâument d'eunne coléthe fut preinse Et pour mains d'giés louis j'éthais hallet ma kmeinse Sinon qu'ma feamme se meint a faithe des cris Et ouâllet souântre mé pour eun bitch d'parap'yïe. Je fus ob'yigis alors de siéthe Malhé Et par la rue d'driéthe nos v'la les daeûx allé Quand jvêinmes a la boutique, Mess' Heanmon tét en frumant Et m'dit Bonsouër Mait Flip; Tchi boug'd salle Temps. Entrëts par icheïn et vos mettëts à l'abri Vot chappé d'égoutte et vot' bonnett moûo'yi Assiévous ichein ch'nest pas ch'qui vos en couôt'ta J'peux vos âispâigni eun parap'yïe d'alpéca. L'brav'houmme fit d'san mus et fut bain comp'yâisant Mé, assis sus eunne scabbelle, Ma feamme sus eun bans Allons! Missis faôut-ti eune grand rouôge de bas prix Ou bain eun p'tit t'chi s'sait né coumme la sie. De vrai Mess Hean'mon 'dites nous lûs val'heu J'aime mus péyi mains et avé du miyieu Toutes les fais que je v'nons ichein je 'soummes bain servies Et j'âime eun bouan grand pour âivité la plyïe. Et bain Missis! N'en v'chein y'iun de treis ch'leins Ou bain eun vert ou byieù tchi n'en coûte que cheinq Mais en v'chein eun rouôge de trann' siès boug'd sous. Ou vos fichëtts du monde et ithëts partout Bâsyis me l'rouôge! bideim'm Mess' Heanmon Ne v'la trann' siés sous, ch'nest qu'l'prix du bâton Allons siés nous Flip pas d'vot boustre gnio'lein Maôugret la p'yïe jairtrouv'thons not Kémein. Je ramôntimes par amont l'vyïer marchi Quand l'ai'glyïse de la ville dgiés'heuthes sounni Malhé m'dis avous yieu vot fichuë montre ergraie Et me tchi l'avait fouôrraïe dans l'fond d'mes braïes. J'lis dis Malhé! As tu toute bouanne raison Me prends tu pour eunne baîte ou eun boustre d'couochon? Tu s'sait bain que quand j'avons veu Missis Bilo Qu'ou s'est mo'tchi d'té et ma traitet d'boug'd'so, Bah! Flip vétan vite et jeanmais n'la ergarde Se fet Malhé en m'hallant eunne pouôgnïe d'barbe C'em'nâge j'vos juthe je l'éthais capuchie Sinon qu'je craignais l'éinterdi parap'yïe. Quand j'vein'mes avaôux la rues ès ronches La grille tchi'yiait ch'tet coumme des balles d'onches J'dis a ma feamme, me v'là ti baïn servi N'en v'la eun brein qui ma crevet eun 'yi. Éindomp'tab'lye! ou m'dis Hélas qu'ou zêtes bâite Faôut qu'ou séyis fo ou mâime qu'ou perdêts la tâite Faoût-i qu'un houmne s'sët trouême et baloque De n'pouvait pon gabathé jusqu'a la Rocque. Enfein m'zenmeins j'piétoun'nimes dans la bôs Dans c'lyié, dans l'âipais, dans l'ptit et dans l'gros. Et quand j'fêummes arrivëts siés nous j'dis à Malhé Ergarde bain a té, n'té lâisse pon attrapé. Le Lundi oprés était eun jour d'enterrement Je n'fus pas priy'iet, mais pour faithe de man t'chan Le temps t'é couvert et pathaissait gris Et j'criyi à Malhé, Dâihalle mé l'parap'yïe. Malhé ma feamme tet ôtchupëts a lavé Et j'criyis a raide braiche, je sis prés a m'n'allé Ou n'avëts pon qu'faithe ditëts vilains cris. S'fit alle, pour l'amour du fichü parap'yïe. M'zenmeins i s'adoun'ni que j'fu preins pour porteûx Ouv' le grand fîs du bouanhoumme Jean L'Sueûx Et coumme ché n'tait pon cm'mode eun parap'yïe pôrté - Je l'pâsse dans les mains d'eun éindividu drièthe mé. Éthais'tous la bontet d'souôgni d'man parap'yïe Et m'lérdounné dans l'chim'tchiéthe j'lis dis? En m'lértouânnant je l'ermer'cyï d'man mus Et m'avïsi tout d'suite qu'eunne balèine tet rompue. Hi! Hi! j'lis dis, en faisant du câs'riyion, M'pran'nous pour une baîte ou eun boug'd couchon? Quoé qu'ouzé'yis la méine si d'giablyiement laïe Pour mains d'mille louis j'vos torché thais l'nèz. Ho! Ho! Mait Flip ou y'êtes bain goglu Qué m'dis chu saloppe la, et d'un ton raîsolu: Prennëts garde a vous que BISTO j'naiyions, Car d'eun objet coumme vous, j'nen fais qu'eun torcheon. L'pâivre m'prend au nèz: tout'suite, je m'stripp' Et dans un clyin d'yi j'lis feu la preumièthe cl'yïpp, De man deuxième coup j'lis bâille un leftènn'deur Et passe man pouôaïn a travers san tappeur. Quand i vi choun'na l'dâip'yiet l'fit pyieu'thé Et I'm pri'yï a mains jouaintes de l'laissi allé. Mé, t'chi pensi en mé mâime ôssi bain l'pardoun'né Et m'en r'allé siès nous conté tout a Malhé. Sitôt dans la tchui'zinne, j'lis racconti tout, Ossi vrai que j'vos l'dis et nett' coumme eun sou, Mais quand ou sut que l'parap'yïe tet d'pichi, Bideim'm? Maiss'ieux, ou mant'chi d's'aïvan'ni. D'la p'aoeûx qu'j'en eu l'cor m'en d'âirangi, Et fallait couôrre bain vite siés eun appotti'chi Cherchi eun boulet et eun vécicatouéthe Pour mé bâsyi d'lappéti et raconté l'histouéthe. Quand j'fu tout fort et Malhé râi'tablyïe, J'airpensîmes pus d'veingt fais au boug'd parap'yïe. Ma feamme me dit: I nos a si mal servi Que j'nai pon grand côuo'thage de l'faithe rabiyï. Mais j'lis dis, Malhé? Aïe don eune br'ein d'avis, Pense que j'ssis eune houmme et qu'tu n'est pas eunne trie. Chu parap'yïe là est tout fein fyiam'bant neu Et tu'as l'affront de voulé l'clyiutté au feu. Par té ni par persounne jen'n'sait traitet d'baîte, Tandi qu'jé'thai eunne pouôgnïe d'pé sus la tâite Et tu verras qué ch'nest pas à dithe je dizais Sam'di t'chi vain l'parapyïie s'sa ergrais. La smâinne en r'venant je l'porti en ville, A la boutique de feu l'vyiër Jean d'Guille. Il agît en brave houmme et pas comme eun pètte, Car quatorze sous pûdre m'paiyi ma dette. En m'enr'vnant j'entri siés George Édfais Pour accaté eunne breinge et un manche de j'nâis, J'entri, sans pensé d'aître jouët d'la sorte, Et aissi mon fichü parap'yïe à la porte. Quand j's'sorti man parap'yië j'cherche, Je fouôlle partou sans en trouvé mèche; J'pensi en mé mâime chounn'chein n'est pas du fann', Et j'fou l'camp siès nous le dithe à ma bouanne feamme. Et bain! Malhé m'dis, ou zêtes eun biaoûx pigeon, Hier ou ztâites eune trôuème, an'gnièt ou zêtes fripon, N'pensëts pas que j'men vais vos fourni d'sou, Boug'd salop' qu'ou zêtes t'chi saccagis tout. S'ou voulëts m'âicouté et suivre m'nopignion, Ou verrëts bain vite que j'pâle avec raison; Allëts vite siés Edfais, n'âicoutëts pas san fann', Pâlëts coumme eun houmme et n'séyis pas tchéth'ouânne. Tchéth'ouânne j'lis dis et bain n'en v'la d'eunne belle, En faisant d'mân mus sans pâlé d'brédelles, J'éthai ma tête l'diab'ye set i en futhie, Bideim'm Malhé, j'éthai man parap'yïe. J'mens fut sié Edfais, l'marchand' graisse a po, Et lis dis vos p'yîais ti m'est'chusé eun miot. jaim'thais trouvé eun houmme qu'ou counn'aissïs, Et qu'est l'mâime objet t'cha preins man parap'yïe. Mait' Flip i m'dit, criyious qu'jsouôs'tchains l'vol! J'n'sis pas voleûx ni eunne boug'd chainôlle, J'vos coun'nais coumme étant eun coss'tom'meur; Mais aôutrement j'daîfonçais vot' vyiër tappeur. Dgiàb'ye s'set du dgiàb'ye et occôuo y'ieun par dessus! Que j'dis en mé mâime, en freumant l'hûs, J'eanmais Edfais de sa salle vie m'âirvêrra Èrmettre man pi dans sa boutique a dra. En m'en r'allant je m'senti bain pâin'gnaeûx, Jé m'trouvais bain fâsyi et pas couôthageûx, J'entri au Vert Chéteur sans menti eun miot, Accatté du p'teun et eunne bouanne pouognïe d'sno. Quand j'fus sorti je m'trouvi râffrâichi. L'couô'thage m'erveint et je m'ravigotti, Mais en pran'nant du sno, j'en meins eune miot d'travers, Et eunne averse de p'yïe mé sorti des yiërs. J'd'âihalle man mouôchet pour m'aissui'yé la goulle, Et dans eun cl'yin d'yi eunne pierre souôs l'pi m'boule; Je n's'ai pon si j'tchi ou si chest eunne idaïe, Mais le lend'main, javais eun boug'd sal'nèz. J'l'poussotti bain avec d'la linette krâin'chie, Que j'avais fricachi dans de l'iaoûx bouôyie, J'avais aïtout meins eun lopéin d'rosèine Pour faithe eun chiment qué nou n'trouve qu'en Chine. Chu chiment là en y pran'nant du souain, Me cl'yiergi l'nèz et m'fis eun grand bain; Chest pourt'chi l'zenmeins de not bouanne Vieille Chronique, Profitt'ont du ermiède que j'mets devant l'public. Mais pour agu'vé la scienche que j'vos ai km'enchi, I'm prendrët bain siés méis pour bain en fini, Tout d'mâime i faôut que j'y feu eun cou d'scie, Et copé l'histouéthe du boug'd parap'yïe. Le lend'main j'men fu d'airchet, l'aircherchi, J'fouôs'yi partout et l'objet j'âirtouvi, Mais t'chi fichü méinséthe j'ai ti yieu dans ma vie, Pour l'amour d'eun éindomptab'lye sall' parap'yïe. L'Baloque t'chi m'lên'lvi n'tait pon eun aîntamperche, Pas aisi a trouvé sans que nou l'cherche, Mais d'parap'yïes jeanmais je n'rî'thai accaté, Par les riselëts t'chi fûdre faites de mé et Malhé. Enféin mes bouannes gens a forche d'fouôsyi Je trouvi l'pandloque qui mé l'voli, E'tant pathents véthe maine tout fein frët nu, J'n'voudrais pas qu'san sall'nom s'set counu. Alors man parap'yïe à la maison j'rapporti, Et Malhé ma feamme d'âirchet m'r'assottisi, La rage me préins et Bideim'me je l'fyian'tchi, Parmi la chendre de vrët en drièthe du trépi. Et d'mâime m'zenmeins depis tchi'l est brulët, Que d'juth'ments et d'bri j'avons ti âivitët. Mais pour jeanmais d'ma vie d'parap'yïes ërtouchi, Cem'nâge j'vos juthe j'aim'thais mus âitre dâis'slotchi. Car quândi que j'leûmes en not' possâission, Ch'tet tréjous bastaôude et eun boug'd câsriyon, Acht'eu ma feamme m'aime et j'aime bain Malhé, Alors Good Bye mes vyiërs, j'vos souhette eune bouan Noué. Lanmin Jean. Chu 22 Novembre, Mil huit chents quatre veingt neuf! |
Viyiz étout: