 Des falaises |
Eune bliâse d'êté enfliubait la côte, et j'mé lôviais sus les falaises à jeûn un dînmanche matîn d'êté y'a tchiques années - sus les falaises du côté d'Gros Nez. J'avais prins, à l'entrée des Landes, lé c'mîn tchi condit au Tchêne et pis j'm'étais sîlyi tout l'long par Lé Creux au Mouo, La Cotte, et La Vallette Haubèrt, La Cappée, Lé Creux des Maufaits et La Crête Rotchette quand né v'là qu'j'arrive lé Châté en veue. Ch'n'est dgéthe qué deux'trais faillies ruinnes, car y'a des chents ans qué v'là tch'est en d'lacres, mais v'là tchi m'faîsait un' té bel êffet en appraichant - eune bliâse tch'annonçait d'la chaleu, tchi muchait eune grand' partie des lieux mais laissait des buts d'muthâles et l'tafaît d'l'arche vîsibl'yes - qué j'dêhalis un crèyon et du papi dé d'dans ma paûte et j'mé mîns à dêtailli ch'la pouor man pliaîsi, en extase, à m'suthe qué j'allais. Les rotchièrs, à tchiques chents pids en d'ssous lé tou du Pont d'la Mouaie, mé pathaissaient comme des ombres ouaithe qué l'ciel en d'ssus fusse bliu: pas eune aube dé vent - silence tout à l'entou, comme si l'restant du monde vivant avait dispathu.
Pis né v'là qu'la bliâse sé lève et s'dissipe et tout un mèrveilleux portrait ensolilyi s'présente à mes yeux, J'm'appique sus l'bord dé la falaise à r'garder rotchièrs, tapis d'flieurs à l'entou et la mé au large, et l's Iles - toute la Natuthe tchi disait bonjour au solé. Et tout à coup j'réalisis qué j'avais là ieune des pus belles veues tchi y'eusse au Monde. A mes pids, châque brîn d'hèrbîn, châque flieur dé sèrcl'ye et châque pétite ithangnie - tout 'tait trempé d'rôsée. La bliâse 'tait l'vée, lé solé c'menchait à cauffer et j'heunmais eune bouonne odeu extchise dé la Natuthe à l'entou d'mé.
Un rouoge linnot l'vit l'avant à mé et des papillotes - blianches et bliues et breunes et bigathées - se mîntent à voltilyi à la chaleu. Un coupl'ye d'cormouothants prannaient du paîsson là-bas en d'ssous d'mé dans eune ieau tellement cliaithe qué nou pouvait quâsi vaie l'fond. Lé cri des mauves tchi s'êmoûtchaient mé faîsait envie d'prendre l'vol étout, mé, et en r'gardant en haut j'avisis un êcouffl'ye tchi fliottait dans l's airs en grand' touônnées; restant comme suspendu pouor un p'tit brîn à chutte hauteu dans l'grand bliu ciel, i' paque ses ailes et, d'un embront, vithe à tèrre.
J'entris dans l'gardîn du Châté et fis l'tou en d'ssus d'la Prison et du Creux au Français, pis en r'sortant du Châté j'continnuis ma prom'nade lé long d'la falaise - en d'ssus d'La Néthe Falaise et Les Maillots, Lé Rouoge Nez et jusqu'au S'tchez, Lé Bieau Vallet, Lé Pinnacl'ye, La Falaise à Brébis et L'Mont ès Anes en d'ssus du Pûlé. Des blianche-coue, des vèrmîngnons et des cardrinnettes lévaient partout l'avant à mé sus c'mîn, et l's alouettes chantaient sans r'lâche mais bein liain, i'sembliait, comme v'nant d'un aut' monde - doux et mystéthieux. Les mèrvelles dé la Natuthe étaient là à châque pas. Lé paysage mé pathaissait tremblier souos la calinnette, et la mé au liain s'pèrdait dans un hathîn qué l'solé n'touchait pon. Tout 'tait si trantchile, à part des sons d'la Natuthe - dé l'ouaîs'lîn, des critchets et des moûques à myi.
Tchi paradis, don, sus la tèrre! Tout ch'la m'pathut si mangnifique et d'licieux qu' j'éthais voulu n'arrêter qu'au but du Monde...
Mais j'c'menchais à aver l'fliâtchet, car ma montre disait méjeu. J'tais quâsi à L'Eta et fallait bein vite èrbrousser c'mîn, par La Landelle et Les Palliéthes - pouor être en temps au r'pas tch'était seux et cèrtain à m'attendre, apprêté par la milieuthe des tchuîsinniéthes Jèrriaises - et laîssi mes doux rêves à eune aut' fais quand j'èréthais l'temps et lé d'si...
'Jean l'Extâsie'
Viyiz étout: