Les Pages Jèrriaises

L'Êpitre ès Éphésiens, Chapitre 5

Vèrsets 15-20

Prannez grand soin d'la manniéthe qu'ou vivez; pas comme des gens sans sagesse mais comme hommes et femmes tchi sont sages,
profitant dé toute opporteunité car les jours sont mauvais.
Ch'est pouortchi, né séyiz pas bêtes mais comprannez tch'est qu'est la volanté dé Dgieu.
N'vos soûlez pon auve du vîn tchi mène à la débauche. À la pliaiche séyiz remplyis dé l'Esprit.
Commeunitchez les uns auve les autres auve des psaumes, des cantiques et des chants spirituels. Chantez dé tout vot' tchoeu au Seigneur,
étant trejous èrconnaîssant à Dgieu, not' Péthe, pouor tout au nom dé not' Seigneur Jésû-Christ.

 

Vèrsets 22-33

Femmes, vououy'-ous à vos hoummes, coumme au pouver du Seigneu. Ch'est en tchi l'bouonhoumme est l'chef d'la bouonnefemme, coumme Christ est l'chef d'l'églyise, étant lî-même lé saûveux du corps. Et coumme l'églyise est dans l'pouver d'Christ, qu'les femmes saient gouvèrnées par lus hoummes en toutes choses. Hoummes, aimez vos femmes, dé même qué Christ aimait l'églyise et s'donnit pouor lyi, à seule fîn qu'i' l'sanctifyîsse un co qu'i' l'avait netti atout la lav'thie dg'ieau par la pathole, et qu'i' la prînsse à lî-même, eune églyise remplyie d'glouaithe sans tatchet ni ohi, et sans êt' autrément enteuthée mais qu'ou fûsse sainte et d'charme. Dé même il est d'mêtchi qu'les hoummes aiment lus femmes coumme lus propre chai. Lé chein tch'aime sa femme aime sé-même. Véthe, n'y'a pon ieu d'houmme tch'a détesté sa chai, mais i' la nouôrrit et la souongne, dé même qué Christ fait pouor l'églyise, par cause qué j'soummes des parties d'san corps. Et né v'là pouortchi qu'un houmme tchitt'ta san péthe et sa méthe pouor s'èrjouaindre à sa femme, et les deux dg'ieux s'sont eune chai. Chennechîn est un grand s'gret, mais j'pâle entouor Christ et s'n églyise. Mais touos vous, aimez vos femmes coumme ou vos aimez vos-mêmes, et qu'la femme ait du respé pouor s'n houmme.

 

Vèrsets 22-33

Femmes, séyiz sujettes à vos propres Hoummes coumme au seigneu, ch'est en tchi l'Bouonhoumme est l'chef d'la Bouonnefemme, s'lon chein étout qué Christ est l'chef dé l'Églyise, et pathellement est d'Saûveux d'san corps; coumme don l'Églyise est sujette à Christ, qué sembliabliément étout es Femmes saient sujettes à lus propres Houmme en toutes choses. Vous hoummes, aimez vos femmes, coumme Christ étout a aimé l'Églyise, et s'est bailli sé-même pouor lyi à seule fîn qu'i' la sanctifyîsse auprès l'aver netti par la lav'thie dg'ieau par la pathole, à seule fîn qu'i' s'la rendîsse eune Églyise glorieuse, n'ayant ni taque ni ride ni rein d'aut' d'ité, mais à seule fîn qu'ou fûsse sainte et sans taque. Dé même les hoummes daivent aimer lus femmes coumme lus propres corps. Tch'aime sa femme i' s'aime sé-même. Viyant qu'fis d'âme n'eut janmais en haine sa chai, mais la nouôrrit et l'entrétcheint, coumme étout l'Seigneu fait l'Églyise. Ch'est en tchi j'sommes membres dé san Corps, étant d'sa chai et d'ses os. Pouor chenna l'houmme dêlaîss'sa Péthe et Méthe et s'adjouaindra à sa femme, et les deux s'sont eune même chai, chu S'gret est grand: mais j'pâle entouor Christ et s'n Églyise, et pouor dé vous étout châtchun à sa pliaiche aime sa femme, coumme sé-même.

 

Viyiz étout:

 

Les Pages Jèrriaises