J'ai publiè tchic chose!
Un p'tit livre de 32 pages, dans l'vier langage de notre pays.
J'sai bein que ch'n'est pas là le gros livre que j'voudrais publier un jour, mais ch'est un qu'mench'ment.
Tchi trop embrache mal êtreint et j'n'ai pas voulu pour la prumié fais ristchi trop gros.
J'ai voulu vaie d'abord si les lecteurs de la "Nouvelle" voudront bein m'aidji à faithe vivre un mio le Jersiais - et les siens qui l'êcrivent!
J'lus en offre trente deux pages pour siez sous - trais pennins - et j'voudrais trouver le sien qui m'ditha que ch'est trop! J'lis dithais d's'y mettre, li, à faithe du jerriais et à l'imprimer, à travaill'yi des semaines de temps pour faithe du mus qui peut et d'apprendre!
Ch'est vrai que parmi ches trente deux pages là, y'en a une partie qui sont des annonces, mais sans vouler vanter ma marchandise, j'peux dithe que ch'est des annonces coumme ou n'en aviez occouo jamais veu d'votr' vie! Des annonces en Jerriais!
Savous bein qui y'a de chez annonces là qui m'ont prins aussi longtemps à arrangi à man goût, coumme Mess Coxhead en met à êcrithe un article contre l'Esperanto ou les machines à êcrithe, et pus longtemps que Mess Bisson ne met à penser ses "Méditâtions sur l'Mont-ès-Pendus"!
J'vos offre à notr' bureau, en prenant la gazette Samedi! trente deux pages de jerriais - sans pâler des couvertuthes!
Elie
15/2/1913
Viyiz étout: