I' n'y'a rein d'miyeu pouor un houmme qué d'mangi et d'baithe et dé s'rêjoui d'san travas. Chennechîn étout j'vis qu'i' vînt d'la main du Bouôn Dgieu. Tchi qui peut mangi ou s'rêjoui si ch'n'est pon mé? Au chein tch'est bôuon l'avant à li, l'Bouôn Dgieu bâle la sagesse et l'saver et la jouaie, mais pouor l'pécheux, i' l'chèrge atout l'avîn dé tâsser et d'amouoch'ler pouor l'beinfait du chein tch'est aimé du Bouôn Dgieu. Né r'véla d'la vandgîthe et d'la courséthie souotre lé vent.
Ch'est en tchi tout est tèrmié, et y'a eune bâle à tout dêm'nîn souos l'solé. Naître, v'là tch'est tèrmié, et mouothi, v'là tch'est tèrmié; plianter, v'là tch'est tèrmié, et êrachi, v'là tch'est tèrmié; tuer, v'là tch'est tèrmié, et r'dgéthi, v'là tch'est tèrmié, passecrithe, v'là tch'est tèrmié, et r'bâti, v'là tch'est tèrmié; plieuther, v'là tch'est tèrmié, et rithe, v'là tch'est tèrmié; pargeindre, v'là tch'est tèrmié, et saûticoter, v'là tch'est tèrmié; env'yer des pièrres hortes, v'là tch'est tèrmié, et ramâsser des pièrres, v'là tch'est tèrmié; embrachi, v'là tch'est tèrmié, et s'èrténîn d'embrachi, v'là tch'est tèrmié; aller qu'si, v'là tch'est tèrmié, et pèrdre, v'là tch'est tèrmié; garder, v'là tch'est tèrmié, et pitchi hors, v'là tch'est tèrmié; trilyi, v'là tch'est tèrmié, et racc'moder, v'là tch'est tèrmié; s'taithe, v'là tch'est tèrmié, et pâler, v'là tch'est tèrmié; aimer, v'là tch'est tèrmié, et haï, v'là tch'est tèrmié; la dgèrre, v'là tch'est tèrmié, et la paix, v'là tch'est tèrmié.
Coumme tchi qu'nou profite dé san travas? J'vis l'avîn atout tchi l'Bouôn Dgieu a chèrgi les fis d'houmme à seule fîn d'les embarrasser. Il a grée tout tch'est bein et l'a tèrmié, et il a mîns tout dans lus tchoeu à seule fîn qu'i' n'comprannent pon chein qu'lé Bouôn Dgieu a grée du c'menchement jusqu'au but.
J'sai qu'i' n'y'a rein d'miyeu pouor un houmme qué dé s'rêjoui et d'faithe du bein tandi qu'i' vit acouo; et pouor un houmme dé mangi et baithe et s'rêjoui d'tout san travas, v'là tch'est un don du Bouôn Dgieu.
Viyiz étout: