Les Pages Jèrriaises

Lé Cantonn'yi


Je n'sis qu'un pouorre gratteux de c'mins,
J'gagne avec peine deux-trais hérpins,
Man gn'êt, man rabot, ma chuvièthe
M'asseuthent du mangi et du baithe.

Je n'possède ni rentes ni maisons,
J'sis d'hors par touos temps et saisons.
Lé solei' m'rôtis tout l'êté,
L'hiver, la pl'yie lave man blianchet!

J'cope les ronches au pi' des fossés
Sans m'gêner s'i y'a des pitchets;
Car dépis longtemps man travas
M'a enduèrchi les mains et les bras!

Pour dounner libre cours à l'ieau
Et la renvier dans les cannieaux,
Je joue d'la pelle a lond'gheu' d'jours
Et j'arrondis bein mes détours.

Je soign' d'arrangi l's'écarceurs
Et j'boule des pierres dans les cacheurs,
Je fais de bouans lopins d'bannelais.
Et j'les pièche bein l'long des fossés,

Elie

 

Viyiz étout:

 

Les Pages Jèrriaises